Azərbaycanın milli futbol komandası bu gün Estoniyanın paytaxtı Tallin şəhərinin qonağıdır. Yığmamız Avropa çempionatı–2024-ün seçmə mərhələsi çərçivəsində növbəti görüşünü bu Baltikyanı ölkə komandası ilə keçirəcəkdir. “F” qrupunda mübarizə aparan hər iki kollektiv turnir məsafəsinin birinci yarısında pərəstişkarlarının ümidini doğrultmamışdır.
Rəqiblərin hərəsinin hesabında ötən yay “Dalğa Arena”da heç-heçə (1:1) oynadıqları görüşdə qazandıqları 1 xal var. İndi onlar arzuolunmaz mövqelərdə—turnir cədvəlinin son iki pilləsində qonşudurlar. Estonlar beş, Azərbaycan futbolçuları dörd görüş keçirmişlər.
Qrupun liderləri isə beş oyunda hərəyə 13 xal qazanan Belçika və Avstriyadır. Üçüncü pillədə irəliləyən İsveç 6 xal toplamışdır.
Xarici ölkə klublarında çıxış edən Azərbaycan millisinin hücumçuları komandamızın düşərgəsinə yaxşı əhval-ruhiyyə ilə gəlmişlər. Rinat Dadaşovun şərəfini qoruduğu “Hatayspor” Türkiyə Superliqasının 8-ci turunda “Konyaspor”a qalib gəlmiş (3:1) və qollardan ikisinin müəllifi Rinat olmuşdur. “Dinamo” (Zaqreb) Xorvatiya birinciliyinin növbəti turunda “İstra”üzərində böyük hesabla qələbə qazanmışdır (3:0). Toplardan biri Mahir Emrelinin ötürməsi ilə vurulmuşdur. Tərkibində Musa Qurbanlının da çıxış etdiyi Stokholmın “Yurqorden” komandası İsveç çempionatının 26-cı turunda səfərdə “Varberq”i məğlubiyyətə uğratmışdır (1:0). Bütün bunlar Tallin matçı ərəfəsində yaxşı əlamətdir.
Estonlarla görüşdən üç gün sonra, oktyabrın 16-da Azərbaycan komandasını Bakıda Avstriya ilə daha ağır sınaq gözləyir. Bugünkü oyunda qələbə liderlə görüş ərəfəsində yerinə düşər, komandanın öz qüvvəsinə inamını artırar.
Estoniya—Azərbaycan görüşündə topa ilk zərbə Bakı vaxtı ilə saat 20-də endiriləcək. Meydanda ədaləti qorumağı isə UEFA almaniyalı hakimlər briqadasına həvalə etmişdir.
Bu gün bizim qrupda keçiriləcək digər oyunda liderlər “münasibətləri aydınlaşdıracaqlar”: Avstriya–Belçika. Görək bu görüşlərdən sonra kimin üzü güləcək…
Oqtay BAYRAMOV,
Əməkdar jurnalist