“Elm və Təhsil” nəşriyyatında jurnalist Pünhan Əfəndiyevin Xüsusi Təyinatlı Qüvvələrin giziri, “Azərbaycan Bayrağı” ordenli şəhid Elvin Abdurahmanova həsr edilmiş “Uğrunda ölməyəcəyin bayrağın kölgəsinə sığınma” kitabı nəşr edilib.
Kitabda Elvinin həyatından, hərbi xidmət illərindən, 44 günlük Vətən müharibəsindəki döyüş yolundan bəhs edilir. Onun döyüş yoldaşlarının şəhid haqqında xatirələrinə də geniş yer verilib. Qeyd olunub ki, müharibənin 5-ci günü düşmən gülləsinə tuş gələn Elvin az vaxtda bir sıra strateji yüksəkliklərin azad edilməsində qəhrəmanlığı ilə seçilib.
Zabit şərəfini hər şeydən üstün tutan, ölümün gözünə dik baxan Elvinin şəxsi keyfiyyətlərinə də kitabda diqqət cəlb edilib. “Şuşada olmamışam, oranı görməyi çox istəyirəm”, – deyirmiş Elvin. Təəssüf ki, bu ona qismət olmadı. Amma qəhrəman ordumuzun 44 günə Qarabağı və Şuşanı işğaldan azad etməsi onun da, digər şəhidlərimizin də ruhunu şad etdi.
Kitabın mütaliəsindən yaranan ümumi nəticə bundan ibarətdir ki, Vətən sevgisi Elvin kimi qəhrəmanların dilində yox, əməllərində olub.
Ə.DOSTƏLİ
XQ
