Ankarada “Çağdaş Azərbaycan şairi Əlizadə Nurinin şeir dünyasına yolçuluq” kitabı, eləcə də Bakıda “Sənə yağış dərirəm...” adlı şeir və poemalar toplusu çapdan çıxıb.
Qardaş ölkədə işıq üzü görmüş kitabın müəllifləri İlkin Gülüsoy və Habibe Aydır. İlk bölümdə şairin ədəbi şəxsiyyətindən bəhs edilir, sonrakı bölümlərdə isə onun şeirləri çözümlənir və bədii nümunələri oxuculara təqdim olunur.
Özünü obrazlı şəkildə “Payız adam” adlandıran Əlizadə Nurinin “Sənə yağış dərirəm...” kitabında isə yaşı 60-ı haqlamış şairin pəncərəsində “ağlayan yağış”la bağlı assosiativ gəzişmələri, həmçinin Vətən, sevgi duyğulu könül çırpıntıları əks etdirilib. Orijinal təşbehlər, metaforalarla zəngin şeirlər maraqla oxunur.
Ə.DOSTƏLİ
XQ
