“Sazbəndlik sənəti və sazbəndlər” adlı kitabı Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə“Ozan Dünyası” Aşıq Yaradıcılığının Təbliği İctimai Birliyi hazırlayıb.
Nəfis tərtibatda işıq üzü görən kitab aşıq sənətinin və bu sənətə bağlı olan instrumental ifaçılığın inkişafında mühüm rol oynayan sazbəndlik sənətinə və sazbəndlərə həsr olunub. Kitabda sazbəndlik bir sənət sahəsi kimi diqqət önünə gətirilir, onun incəlikləri araşdırılır. Eyni zamanda mahir sazbəndlər haqqında qısa tanıtım məlumatları verilir.
Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının “Ön söz” yazdığı kitabın müəllifi Əməkdar mədəniyyət işçisi Musa Nəbioğludur. Əsərin elmi redaktoru ADPU-nun prorektoru, filologiya üzrə elmlər doktoru, professor Mahirə Hüseynovadır.
Ə.DOSTƏLİ
XQ
