Əmək və Əhalinin Sosial Müdafiəsi Nazirliyinin İctimaiyyətlə əlaqələr və Kommunikasiya şöbəsinin verdiyi məlumata görə, Dövlət Məşğulluq Agentliyi beynəlxalq “Business Awards UK” müsabiqəsində qalib olub. Qeyd edilir ki, müsabiqəni İngiltərənin nüfuzlu marketinq və konsaltinq şirkəti keçirib.

Agentlik 13 istiqamətdə qiymətləndirmənin aparıldığı müsabiqəyə ölkəmizin son illərin mühüm rəqəmsal sosial layihələrindən olan “Əmək və Məşğulluq“ altsistemini (ƏMAS) təqdim edib. Dövlət və özəl sektorda çalışan peşəkar münsiflərdən ibarət komissiya tərəfindən ƏMAS yüksək dəyərləndirilib və Dövlət  Məşğulluq Agentliyi müsabiqənin “Rəqəmsal Transformasiya–2023” (2023–Digital Transformation Awards) kateqoriyasında “Ən Yaxşı Çevik Transformasiya” nominasiyası üzrə qalib seçilib.

Xatırladaq ki, 2022-ci ilin may ayında istifadəyə verilən ƏMAS  bundan əvvəl “IDDA Awards” müsabiqəsində “İlin Rəqəmsal Layihəsi” nominasiyasında qalib olub, habelə Beynəlxalq Telekommunikasiya İttifaqının “Çempion layihə” mükafatına layiq görülüb. Bugünlərdə ƏMAS, həmçinin BMT-nin Cənub–Cənub əməkdaşlığı platformasında uğurlu innovativ həll nümunəsi kimi də təqdim edilib. 

ƏMAS əmək və məşğulluq sahəsi üzrə xidmətlərin e-qaydada təqdim edildiyi, rəqəmsal kadr uçotunun qurulduğu, insan resurslarının effektiv idarə edilməsinə və əmək bazarına e-sistem üzərindən çevik və effektiv nəzarətə imkan yaradan vahid elektron platformadır.

Zərifə BƏŞİRQIZI 
XQ