Ölkə Prezidentinin tapşırığı ilə keçirilən belə görüşlər Tovuzda ictimai məmnunluq doğurur

Tovuzda rayon icra hakimiyyəti başçısının hər həftə bir kənddə, qəsəbədə keçirdiyi səyyar qəbullar elə həmin axşam və ya ertəsi gün geniş müzakirələrə səbəb olur. Elə ki, sakinlərdən hansısa pürrəngi çaydan bir qurtum alıb ucadan “dünən səyyar qəbul idi...” dedi, diskussiya başlanır. Biri deyir ki, “daha əvvəlki vaxtlar deyil, indi sağ olsunlar, özləri gəlir yanımıza, biz də dərd-sərimizi deyə bilirik”, bir başqası “Məmməd müəllim sözünün üstündə duran adamdır, görəcəksiniz günü sabah texnika göndərəcək, kəndimizin əsas yolu xırlanacaq da, genişləndiriləcək də”...Bax, beləcə istirahət guşələrində, parklarda, adamların daha çox toplaşdığı yerlərdə söhbətlərin əsas mövzusu bir neçə gün səyyar qəbullar olur. Təkliflərin, şikayətlərin necə həll edilməsi, işlərin gedişi də beləcə müzakirə obyektinə çevrilir.

– Bilirsiniz, adətən, əvvəlki səyyar qəbullar zamanı qaldırılan məsələ həll olunmayıbsa, növbəti qəbulda həmin kəndə getməyə dəyməz, – deyə rayon icra hakimiyyəti başçısının sosial-iqtisadi məsələlər üzrə müavini Niftalı Qasımov söhbətimizə aydınlıq gətirir. – Söz ver­misənsə, gərək ona əməl edəsən. Doğ­rudur, bəzən bu görüşlərdə elə problem­lər ortaya çıxır ki, o, artıq nə rayon icra hakimiyyətinin səlahiyyətindədir, nə də daxili imkanlar hesabına onu həll etmək mümkündür.

Bir dəfə şura iclasında səyyar qəbul­larda qaldırılan məsələlərin həlli ilə bağlı icra vəziyyətini müzakirə edirdik. Müxtə­lif şöbələr, təsərrüfat rəhbərləri, icra nü­mayəndələri hesabat verirdilər. İcra nü­mayəndələrindən biri çıxış edib dedi ki, o məsələnin həlli bizdən asılı deyil. Başçı­mız çox sərt şəkildə qayıtdı ki, “80 yaş­lı Hüseynqulu kişinin nəyinə lazımdır o iş kimdən asılıdır?! Kişi istəyir ki, evində normal istilik olsun, dəqiqədə bir elektrik lampası sönməsin...”

Həmin müşavirədən sonra rayon icra hakimiyyətində “bu, bizlik deyil” söhbəti birdəfəlik yığışdırıldı.

Niftalı müəllim sonra izah elədi ki, re­gional idarələr, onların nazirlikləri və baş idarələri, müvafiq şirkətlər bu işlərə cəlb olunur, vətəndaşların qaldırdıqları prob­lemlərin bir çoxunun bilavasitə onlardan asılı olduğu nəzərlərinə çatdırılır və işin gedişi nəzarətə alınır.

Qeyd edək ki, vacib məsələyə bu cür yanaşma son illər yerlərdə bir sıra problemləri həll etmişdir. İcra hakimiy­yətində vətəndaşlar tərəfindən qaldırılan məsələlərin vaxtında və obyektiv həl­li istiqamətində ardıcıl tədbirlər həyata keçirilmişdir. Xüsusilə səyyar qəbulların yerlərdə daha çox keçirilməsi vətəndaş­ların razılığına səbəb olmuş və onun səmərəli nəticələri artıq göz qabağında­dır. Bir məsələni də qeyd edək ki, qəbul­lar zamanı vətəndaşların müraciətlərinin böyük əksəriyyətinin elə yerindəcə həll olunması dövlətə və dövlətçiliyə, yerli icra orqanlarına inamı bir qədər də artırmışdır. Adamlarda artıq belə bir əhval-ruhiyyə yaranıb ki, müraciət etmək, problemi dilə gətirmək lazımdır, çünki o nəyin bahası­na olursa- olsun, həll ediləcəkdir. Məsələ yerində həll olunursa, yuxarı orqanlara yazmaq, necə deyərlər, müxtəlif qapıları döymək nəyə lazmdır?! Yeri gəlmişkən, son vaxtlar Tovuz Rayon İcra Hakimiyyə­tinin fəaliyyətindən, digər idarə, müəssisə və təşkilat rəhbərlərinin işindən Prezident Administrasiyasına, Nazirlər Kabinetinə, hüquq-mühafizə orqanlarına ərizə və şikayətlər, müraciətlər nəzərəçarpacaq dərəcədə azalmışdır. Bu da əvvəlki illər­lə müqayisədə müraciətlərin azalmasına səbəb olmuşdur.

Bütövlükdə, cari ildə 33 yaşayış məntəqəsində icra hakimiyyəti başçısının səyyar qəbul-görüşləri keçirilmişdir. Bu görüşlərdə 221 müraciət qeydə alınmış, onların 109-u həll edilmiş, 33-ü ilə bağ­lı müvafiq izahat verilmiş, 11 məsələ ilə əlaqədar aidiyyəti qurumlar qarşısında məsələ qaldırılmış, 68 məsələnin həlli müvafiq idarə və müəssisə rəhbərlərinə tapşırılmışdır.

Səyyar qəbullardan sonra həllini tap­mış məsələlər az deyil. Təbii ki, onların hamısı haqqında məlumat vermək müm­kün deyil. Amma Şıxheybət, Mollalar, Al­malıtala dağ kəndləri yollarının texnika ayrılaraq xırlanması, Qəribli, Sarıtala, Ağacqala, Ağbulaq, Kirən kəndlərində qəzalı vəziyyətdə olan elektrik dirəklərinin dəyişdirilməsi, Tovuz şəhərinin E.Quliyev küçəsində ikimərtəbəli binanın həyətinin asfaltlanması, bilavasitə icra hakimiyyəti­nin səyyar qəbullarda qaldırılan problem­lərə biganə qalmamasının nəticəsidir.

Hər həftənin çərşənbə axşamı ra­yon icra hakimiyyəti başçısı aparatında vətəndaşların qəbulu da rayonda bir sıra problemlərin həllinə kömək edir. Məsələn, avqust ayında vətəndaşların qəbulu za­manı Qazıqulu kəndinin sakinlərinin mü­raciəti əsasında 2 kilometr uzunluğunda kəndin mərkəzi yollarından birinə texnika və işçi qüvvəsi ayrılmış, yol genişlənmiş və hamarlanmışdır. Sakinlərin istəyinə əsasən həmin küçəyə dayanacaq quraş­dırılması məqsədilə Azərbaycan Avto­mobil Yolları Dövlət Agentliyinə müraciət olunmuş və məsələ həllini tapmışdır. 

Rayon icra hakimiyyəti başçısının səyyar qəbulu təkcə görüşlə məhdudlaş­mır. Belə görüşlərdən ya əvvəl, ya sonra Məmməd Məmmədov sakinlərin məişət şəraiti ilə tanış olur, onların təsərrüfatla­rına baş çəkir, əkin-biçinlə məşğul olanla­rın sahələrinə gedir, öz tövsiyələrini verir, problemlərinin həllinə kömək göstərir. Xü­susilə texnika, toxum, dərman preparat­larının alınması ilə bağlı yarana biləcək hər hansı bir problem həll olunur, müvafiq təşkilatların rəhbərləri ilə əlaqə saxlanılır, məsələlər nəzarətə götürülür. Bu işlərə bir sıra sahibkarlar da cəlb olunur ki, əkin-bi­çinlə məşğul olanların qayğıları azalsın. Məhz bunun nəticəsidir ki, son illər To­vuzda taxılçılıq, kartofçuluq, tərəvəzçilik xeyli inkişaf edib. Digər tərəfdən, məhsul istehsalı hər dəfə əvvəlki illəri üstələyir. Məsələn, keçən il 50 min 381 ton buğda, 173 min 500 tona yaxın kartof istehsal edildiyi halda, bu il 59 min 656 ton buğda, indiyədək isə 136 min tondan çox kartof tədarük edilmişdir. Biçin kampaniyasının hələ bir sıra yerlərdə başa çatmadığını nəzərə alsaq, kartofçuluqda əvvəlki ilin göstəricisinin üstələnməsi gözlənilir.

Səyyar qəbullar hər cür rəsmiyyətçi­likdən uzaqdır, sadədir, səmimidir, başlı­cası isə səmərəlidir. Belə qəbulların əsas təşkilatçılarından biri, RİH ərazi idarəet­mə və yerli özünüidarəetmə orqanları ilə iş şöbəsinin müdiri Fuad Rzayev deyir ki, daha əvvəllər olduğu kimi, rayon icra hakimiyyəti aparatına gələnlərin sayı çox deyil. Çünki icra hakimiyyətinin rəhbərliyi kənd və qəsəbə icra nümayəndələrinin fəaliyyətinə həm də bu aspektdən yana­şır. Məmməd müəllim deyir ki, “icra nü­mayəndəsi yerdə bizim görən gözümüz­dür. Onun başının üstündən bizə və ya daha yuxarı orqanlara müraciət, şikayət gedirsə, deməli, o nümayəndə ümidləri doğrultmur.

... Tovuz son illərdə inkişaf edib, abad kəndlərin sayı artıb. Şəhərdə də az iş gö­rülməyib, yeni obyektlər istifadəyə verilib, yollar təmir olunub, bir sıra küçələr as­faltlanıb. Adamlar haqlı olaraq deyirlər ki, səyyar görüşlər bu işlərin bir növ təkanı olub, istiqamət verib. Həm icra strukturla­rı razı qalıb, həm də Tovuzun on minlərlə sakini. Nədənsə, kimdənsə narazı olanlar isə heç darıxmırlar. Bilirlər ki, səyyar qə­bulların vaxtı onlara da gəlib çatacaq və heç kimin ürəyində sözü qalmayacaq.

Hamlet QASIMOV,
XQ

Tovuz rayonu