Xəbər verildiyi kimi, avqustun 26-da yağan leysan yağışlar nəticəsində Göyçay rayonunun Qarayazı, Qaraməryəm, Yekəxana, Aşağı Qaraməryəm və Qarabaqqal kəndlərinin ərazisini sel basıb və yol, elektrik, təbii qaz, rabitə, içməli su xətlərinə, şəxsi təsərrüfatlara, avtomobillərə, ərazidəki obyektlərə ciddi ziyan dəyib. Selin nəticələri əsasən aradan qaldırılıb və hazırda dəyən ziyanın həcmi dəqiqləşdirilir.
Rayon Fövqəladə Hallar Komissiyasından aldığımız məlumata görə, respublika əhəmiyyətli Bakı–Şamaxı–Yevlax magistralının 194–205-ci kilometrliyində, rayonun Qaraməryəm kəndinin ərazisindən keçən hissəsində subasma nəticəsində yolun bir hissəsi yararsız vəziyyətə düşmüş və nəqliyyatın hərəkəti müvəqqəti olaraq məhdudlaşdırılmışdı. Həmçinin Aşağı Qaraməryəm kəndi ərazisində 3 avtomobil və 2 piyada körpüsü uçmuşdu.
Elə ertəsi gün sözügedən yolda hərəkət qismən, dünən isə tam bərpa edilib. Eyni zamanda, rayonun Qarabaqqal kəndi ərazisində yerləşən məişət tullantıları poliqonunu su basması nəticəsində oradakı tullantılar əraziyə yayılıb.
Həmçinin Aşağı Qaraməryəm kəndində uçmuş körpülərin bərpa edilməsi ilə bağlı Azərbaycan Avtomobil Yolları Dövlət Agentliyi tərəfindən layihələndirmə işləri aparılır. Rayonun 5 kəndinə (Qarayazı, Qaraməryəm, Yekəxana, Aşağı Qaraməryəm və Qarabaqqal) elektrik enerjisinin verilişi tam bərpa edilib, təbii qazla təminat və içməli suyun verilməsi ilə bağlı təmir-bərpa işləri davam etdirilir.
Öyrəndiyimizə görə, rayonun 5 yaşayış məntəqəsində 65 fərdi evə, 1 fərdi evin çöl barı hissəsinə, 1 sahibkarlıq obyektinə, 1 tövləyə, 8 avtomobilə, 6 fiziki şəxsə məxsus kənd təsərrüfatı təyinatlı torpaq sahəsinə, 1 nəfər vətəndaşa məxsus 1 ton buğda, 5,5 ton həcmində arpa və 10 ədəd arı yeşiyinə sel suları ziyan vurub, 500 ədəd ev quşu tələf olub.
Aşagı Qaraməryəm kəndində 8 ədəd 0,4 kV-luq dayaq, 1600 metr elektrik naqili, Qaraməryəm kəndində isə 150 metr elektrik naqili yararsız hala düşmüş, elektrik enerjisi kəsilmişdi ki, operativ tədbirlər sayəsində ziyan aradan qaldırılıb.
Qeyd edək ki, Aşağı Qaraməryəmdəki yerüstü qaz xətlərinin 50 paqonometr, Qarayazı kəndindəki daşıyıcı qaz xəttinin isə 80 paqonometr hissəsi istismara yararsız hala düşüb. Təbii fəlakətin yaratdığı qəza nəticəsində müvəqqəti olaraq rayonun İnçə (1100 abonent), Aşağı Qaraməryəm (221 abonent), Dövranlı (76 abonent), Alxasava (192 abonent), Alpout (507 abonent), Qarayazı (416 abonent) kəndlərində “mavi yanacaq”la təminat dayanmışdır.
Rabitə xidmətinə gəlincə isə, Qaraməryəm kəndində 4 dirək və 300 metr kabel, Aşağı Qaraməryəm kəndində 15 dirək, 750 metr kabel yararsız vəziyyətə düşüb, Alpout, İnçə, Alxasava kəndlərinin rabitə və internet xidmətlərində fasilə yaranıb. İçməli su xətlərinə də müəyyən qədər ziyan dəyib.
Qarayazı beton kanalının 5 kilometrlik hissəsi, Aşağı Qaraməryəm kəndində isə 4 kilometr təsərrüfatdaxili suvarma şəbəkəsi lillə dolub, həmçinin Aşağı Qaraməryəmdə yerləşən suvarma arxının su götürən hissəsi sel suları nəticəsində yuyulub. Ziyanın nəticələrinin bütünlükdə aradan qaldırılması üzrə tədbirlər davam edir.
Leysan yağışlar və sel İsmayıllı rayonunda da müəyyən fəsadlar törədib. Rayon Fövqəladə Hallar Komissiyasının verdiyi məlumata görə, Mollaisaqlı kəndinə yağan güclü yağış nəticəsində qaz xəttinə ziyan dəyib və bununla əlaqədar olaraq kəndə qazın verilişi müvəqqəti olaraq dayandırılıb. Həmçinin leysan yağışı nəticəsində 5 tövlə, 1 taxıl anbarı və 2 avtomobil yararsız hala düşüb, 3 evin həyətini və həmin evlərin bir hissəsini su basıb. Bundan başqa, şəxsi təsərrüfatlar da ziyan çəkib. Belə ki, 10 xırda, 5 iri heyvan tələf olub. Görülən tədbirlər nəticəsində həyətləri basmış su nasoslarla kənara vurulub və hazırda kəndin təbii qaz təchizatının bərpası üzrə tədbirlər görülür.
İ.MUSAOĞLU,
“Xalq qəzeti”
