Onlar qüdrətli dövlət qurdular və Qarabağı bizə qaytardılar
Hər bir sahədə, o cümlədən hərbi sahədə gənc peşəkar kadrlara ehtiyac vardır. Ulu öndər Heydər Əliyev bu məsələlərlə hələ 1970-ci illərdə məşğul olmuşdur. Onun təşəbbüsü ilə Naxçıvanski adına Hərbi Məktəbin yaradılması bizim o illərdəki tariximizdə çox önəmli hadisələrdən biri idi. Ulu öndər hələ o zaman yaxşı görürdü, yaxşı başa düşürdü ki, bizə yerli hərbi kadrların hazırlanması lazımdır –gün gələcək Azərbaycan müstəqil dövlətə çevriləcəkdir və müstəqil dövlətin güclü ordusu olmalıdır. Bu proses bu gün də davam etdirilir. Azərbaycanda hərbi kadrların hazırlanmasına böyük diqqət göstərilir. Mən çox şadam ki, hərbçilərimizin peşəkarlığı, döyüş qabiliyyəti ildən-ilə artır, ruh yüksəkliyi yüksək səviyyədədir.
Azərbaycan Prezidenti, Silahlı Qüvvələrin Ali Baş Komandanı İlham Əliyevin Bakıda Heydər Əliyev adına Azərbaycan Ali Hərbi Məktəbində xüsusi təyinatlı hərbi təhsil müəssisələrinin buraxılışına həsr olunmuş mərasimdəki nitqindən
Əslində, “Heydər Əliyev məktəbi” deyəndə ilk növbədə ulu öndərin həm 1969 – 1982 - ci illərdə, həm də müstəqillik dövründə siyasi hakimiyyətə qayıdandan sonra tikintisinə, açılışına və fəaliyyətinə nail olduğu yüzlərlə orta məktəb, ondan çox universitet, institut və texnikum, hərbi məktəblər yada düşür. Bundan başqa onun ötən əsrin 70-80-ci illərində azərbaycanlı gəncləri ali təhsil almaq ücün SSRİ-nin müxtəlif şəhərlərinə və xarici ölkələrə göndərmək ənənəsi də sonradan bir məktəb kimi formalaşdı.
“Heydər Əliyev məktəbinin məzunları” deyəndə isə ulu öndərin dövlətçilik, idarəetmə və diplomatiya təcrübəsini dərindən mənimsəmiş siyasətçi, diplomat, iqtisadçı və müasir Azərbaycanın tərəqqisində iştirak edən digər sənət-peşə adamlarımız xatırlanır. Yeri gəlmişkən, bir neçə ay əvvəl qəzetimizdə silsilə müsahibələrini verdiyimiz görkəmli dövlət xadimləri Həsən Həsənov və Arif Rəhimzadə, eləcə də, Əhməd Əhmədzadə və Abid Şərifov... sözün həqiqi mənasında, Heydər Əliyev məktəbinin dəyərli məzunlarıdırlar.
Ancaq mütəxəssislərin fikrincə, Heydər Əliyev siyasi məktəbinin ən uğurlu məzunları bugünkü müstəqil Azərbaycanı regionun ən qüdrətli dövlətinə çevirən, işğalçı və terrorçu qonşularımızın otuz ilə yaxın əsarətdə saxladığı torpaqlarımızı öz sahiblərinə qaytaran, dünya siyasətçilərinin böyük hörmət və ehtiramla qəbul etdiyi cənab Prezident İlham Əliyev və Birinci vitse-prezident, ümummilli liderimizin adını daşıyan fondun rəhbəri Mehriban xanım Əliyevadır.
Təbii ki, bu iki dövlət xadiminin ictimai-siyasi fəaliyyəti haqqında ölkəmizdə və beynəlxalq aləmdə çox yazılıb. Elə “Xalq qəzeti” də bu istiqamətdə az iş görməyib. Ona görə də biz söhbətin bu istiqamətini yekunlaşdıraraq, sözün həqiqi mənasında, “Heydər Əliyev məktəbi” statusunu qazanmış Heydər Əliyev adına Hərbi İnstitutun məzunları barədə söz açmaq istəyirik. Dövlət başçımızın dediyi kimi, həmin məktəbin məzunları həm Birinci Qarabağ müharibəsində, həm Aprel döyüşlərində, həm ermənilərin 2020-ci ilin iyunundakı təxribatlarının qarşısını almaq üçün başlanan hərbi əməliyyatlarda, həm də İkinci Qarabağ müharibəsinin gedişində, sözün həqiqi mənasında, hərbçi peşəkarlığı, mərdliyi, mübarizliyi nümayiş etdirmişlər.
Mən fəxr edirəm ki, doğulub böyüdüyüm Qəbələ rayonunun yetirməsi, Azərbaycanın Milli Qəhrəmanı, Azərbaycan Silahlı Qüvvələrinin general-mayoru, Azərbaycan Silahlı Qüvvələrinin 3-cü Ordu Korpusunun Komandir müavini — Qərargah rəisi, Silahlı Qüvvələrimizin hərbi əməliyyatlar zamanı şəhid olan birinci və yeganə generalı Polad Həşimov məhz həmin ali məktəbin məzunudur. Onunla da fəxr edirəm ki, həmin ali məktəbin yerləşdiyi küçə indi məhz şəhid generalın adını daşıyır.
... Xatırladaq ki, ulu öndərin 1969-cu ildə siyasi hakimiyyətə gəlişindən sonra müstəsna xidmətləri sayəsində ölkəmizdə hərbi kadrların hazırlanması prosesi geniş vüsət almışdı. Məhz onun təşəbbüsü ilə Bakıda Cəmşid Naxçıvanski adına Hərbi Məktəb yaradılmışdır. Təsadüfi deyil ki, bu hərbi məktəb Azərbaycan öz dövlət müstəqilliyini bərpa edəndən sonra ordu quruculuğunda əsas bazalardan birinə çevrildi. Zaman keçdikcə isə bu istiqamətdə yeni addımlar atıldı və nəhayət, bu gün Bakıda dünya miqyasında tanınan Heydər Əliyev adına Hərbi İnstitut fəaliyyət göstərir. Bu ali məktəbin əvvəlki adları Həzi Aslanov adına Bakı Ali Birləşmiş Komandirlər Məktəbi və Heydər Əliyev adına Azərbaycan Ali Hərbi Məktəbi idi.
Əlavə edək ki, Azərbaycan Respublikası Prezidentinin 24 dekabr 2015-ci il tarixli sərəncamına əsasən, Azərbaycan Ali Hərbi Təyyarəçilik və Azərbaycan Ali Hərbi Dənizçilik məktəbləri ləğv edilmiş, Quru Qoşunları, Hərbi Hava Qüvvələri, Hava Hücumundan Müdafiə və Hərbi Dəniz Qüvvələri fakültələri yaradılmaqla Heydər Əliyev adına Azərbaycan Ali Hərbi Məktəbinə birləşdirilmişdir. Azərbaycan Respublikasının Prezidentinin 5 mart 2022-ci il tarixli fərmanı ilə Ali Hərbi Məktəbin əsasında Heydər Əliyev adına Hərbi İnstitut yaradılaraq Milli Müdafiə Universitetinin tabeliyinə verilmişdir.
Bu gün həmin institutda Azərbaycan Silahlı Qüvvələrində ehtiyacı olan bütün ixtisaslar üzrə zabitlər hazırlanır. Tankçı, yerüstü artilleriya ixtisası üzrə mütəxəssis, qoşun kəşfiyyatı ixtisası üzrə mütəxəssis, radioelektron kəşfiyyat və radioelektron mübarızə ixtisası üzrə mütəxəssis, rabitəçi, mühəndis-istehkam ixtisası üzrə mütəxəssis, raket və artilleriya silahlarının istismarı və təmiri ixtisası üzrə mütəxəssis, tərbiyəvi işin təşkili ixtisası üzrə mütəxəssis, quru qoşunlarının idarə olunmasının avtomatlaşdırılmasının təşkili ixtisasına yiyələnən gənclərimiz İkinci Qarabağ müharibəsi günlərində nəyə qadir olduqlarını yüksək səviyyədə nümayiş etdirmişlər.
Məhz həmin səviyyənin nəticəsidir ki, bu ali təhsil müəssisəsinin məzunlarından polkovnik Şükür Həmidov, general-mayor Fəxrəddin Cəbrayılov, polkovnik Eldar Ağayev, polkovnik-leytenant Şikar Şikarov (ölümündən sonra), mayor Rasim İbrahimov (ölümündən sonra) mayor Əfqan Hüseynov (ölümündən sonra), kursant Kərim Kərimov (ölümündən sonra) və digərləri Azərbaycanın Milli Qəhrəmanı adına layiq görülmüşlər. Onlar, məhz Heydər Əliyev məktəbinin məzunları idilər.
2020-ci il sentyabrın 27-də başlanan İkinci Qarabağ müharibəsinə Heydər Əliyev adına Azərbaycan Ali Hərbi Məktəbinin 4-cü kurs kursantları və zabit-gizir heyəti də qatılmışdır. 29 sentyabr 2020-ci ildən etibarən Ali Hərbi Məktəbin 500-dən çox 4-cü kurs kursantı və yüzlərlə zabit-giziri Vətən Müharibəsində iştirak üçün cəbhə xəttinə yollanmış, kursantlar kiçik leytenant hərbi rütbəsi ilə müxtəlif vəzifələrdə strateji döyüşlərdə iştirak etmişdir. Kursantlardan Yaqub Nəcəfov, Seymur Abbasov, Namaz Allahverdiyev, Vüsal Muradov, Sadiq Nəcəfli şəhid olmuşlar. Məktəbin zabitlərindən, “Uçuş mühəndisliyi” kafedrası rəisinin müavini, polkovnik Zaur Nudirəliyev şəhid olmuş, ölümündən sonra Vətən Müharibəsi Qəhrəmanı adına layiq görülmüşdür. Həmçinin, “Artilleriya” kafedrasının baş müəllimi, mayor Fərid Ələkbərov, “Ümumi fənlər” kafedrasının baş müəllimi polkovnik-leytenant Qərib Baxşəliyev, “Kəşfiyyat” kafedrasının baş müəllimi, mayor Rüfət Əsgərov, kursant taqımı komandiri, kapitan Elvin Kazımov şəhid olmuş, orden və medallarla təltif edilmişdir. Eləcə də, 23 zabit və kursant müxtəlif dərəcəli yaralar almış və qazilik mərtəbəsinə yüksəlmişdir.
Sonda fikirlərimizi Heydər Əliyev məktəbinin ən uğurlu məzunu Prezident İlham Əliyevin bu il iyunun 23-də Müdafiə Nazirliyinin komando hərbi hissələrinin birində yaradılan şəraitlə tanış olarkən səsləndirdiyi fikirlərlə tamamlayırıq: “Biz demişdik ki, düşməni torpaqlarımızdan qovacağıq, düşməni torpaqlarımızdan qovduq, Azərbaycan Bayrağını bizim tarixi torpaqlarımızda qaldırdıq. Yəni, bu, böyük tarixi nailiyyətdir. Bu şanlı tarix Azərbaycan xalqının qəlbində əbədi yaşayacaqdır... Azərbaycan xalqı bu il ulu öndər Heydər Əliyevin 100 illiyini qeyd edir. Ulu öndərin Azərbaycan Ordusunun formalaşmasında xüsusi rolu vardır. Hələ sovet dövründə Naxçıvanski adına Hərbi Məktəbin yaradılması məhz bu məqsədi güdürdü ki, Azərbaycanda peşəkar zabit təbəqəsi yaransın”.
İttifaq MİRZƏBƏYLİ, “Xalq qəzeti”