BMT Uşaq Fondunun (UNICEF) Azərbaycandakı nümayəndəliyinin təşkilatçılığı ilə ölkəmizdə ətraf mühit amillərinın uşaqların sağlamlığına təsirinə dair vəziyyətin təhlilinə həsr olunmuş dəyirmi masa keçirilib.
UNICEF-in Azərbaycan nümayəndəliyinin rəhbəri Aleks Haykens vurğulayıb ki, iqlim dəyişikliyi, bunun uşaqlara təsiri və ətraf mühit sağlamlığına aid məsələlər təmsil etdiyi təşkilatın fəaliyyətinin prioritet sahələrindən biridir. Onun sözlərinə görə, Azərbaycan Respublikasının Səhiyyə Nazirliyinin dəstəyi ilə 2023-cü ilin mart–iyun aylarında bir qrup milli ekspert tərəfindən ölkəmizdə uşaqların ətraf mühit amilləri ilə bağlı sağlamlığı məsələlərinə dair çevik qiymətləndirmə aparılıb: “Nəticələri, o cümlədən müvafiq problemlərin potensial həlli yollarını müzakirə etmək üçün dəyirmi masa təşkil olunub”.
Tədbirdə çıxış edən səhiyyə nazirinin müavini İlqar Qasımov dəyirmi masanın əhəmiyyətli mövzuya həsr edildiyini vurğulayıb. Bildirib ki, Səhiyyə Nazirliyi vətəndaşların sağlamlığına yanaşmada praktiki mövqeyin tərəfdarı və təşviqatçısıdır. Əhalinin sağlamlığının qiymətləndirilməsi ictimai səhiyyənin əsas istiqamətlərindən biridir. Bundan başqa, o, ekoloji təhlükələrin nəinki uşaqlara, ümumiyyətlə, insan sağlamlığına birbaşa və dolayı təsirlərindən də bəhs edib.
Dəyirmi masada Azərbaycan Tibb Universitetinin uşaq - yeniyetmələrin sağlamlığı və əmək sağlamlığı kafedrasının müdiri Şəhla Balayeva, nazirliyin mütəxəssis-eksperti, Azərbaycan Pediatriya Cəmiyyətinin sədri Erkin Rəhimov, ATU-nun I daxili xəstəliklər kafedrasının dosenti, Azərbaycan Toksikoloqlar Dərnəyinin sədri İsmayıl Əfəndiyev və digərləri çıxış ediblər. Aparılmış təhlillərin nəticələri – əsas ekoloji problemlər, səhiyyə sisteminin təhlili, uşaqların ətraf mühit təhlükələrinə məruz qalması, havanın çirklənməsi və digər amillərlə bağlı təqdimatlar edilib və müzakirələr aparılıb.
Zərifə BƏŞİRQIZI, “Xalq qəzeti”