Gənc yazar Gülgün Quliyeva Azərbaycanda yeni olan şəxsi inkişaf kouçu – “Mind Academy MMC”nin təsisçisi və rəhbəridir. Bu sahənin özəlliklərini araşdıraraq, arzuladığı həyatı yaşamaq istəyən hər kəsə motivasiya aşılamağa çalışır. Onun Nizami Kino Mərkəzində təqdimatı keçirilən kitabı – “Qoy, işığı yandırım” də elə bu aspektdən qələmə alınıb.
Kitabın “Ön söz”ünün müəllifi, fəlsəfə elmləri doktoru, professor Rahid Ulusel yazır: “Əslində, Gülgün işığı ona görə yandırmaq istəyir, çünki içindəki işığa dərindən nüfuz edərək hər bir zərrəciyi seçməyə çalışır”. Bakıdakı Qərb Universitetindən sonra Türkiyənin İzmir şəhərində şəxsi inkişaf kouçu sahəsində təhsil alan Gülgün hazırda yaratdığı müvafiq quruma rəhbərlik edir. Onun sosial şəbəkələrdə geniş izləyici auditoriyası qazanan maarifləndirmə videolarının izahı “Qoy, işığı yandırım” kitabında cəmlənib.
Mərasimdə çıxış edən “Xalq qəzeti”nin baş redaktoru, Əməkdar jurnalist Əflatun Amaşov kitabın özünü axtaran hər kəs üçün faydalı vəsait olduğunu qeyd edərək dedi: “Hətta ilk baxışda bizim bildiyimiz, yaşadığımız və tanış duyğuların alt qatında anlaya və duya bilmədiyimiz çox şeylər yatır, onların hamısını işığa çıxarmaq lazımdır və Gülgün Quliyevanın yandırdığı işıq bu mənada çox gərəkli və hər kəsə lazım ola bilən bir işıqdır..”
Təqdimatda qeyd edildiyi kimi, Gülgün Quliyevanın əksər qismi real təcrübələrdən, intellektual fəhmdən və orijinal mühakimələrdən qaynaqlanan kitabını oxuyanların yeni düşüncələrə dalacağı, özündə yaxşılığa, xeyirə, əzmkarlığa doğru dəyişiklik hiss edəcəyi şübhəsizdir. Bu əsərdə müəllif öz ardınca aparmaq istədiyi oxuculara – arzu, istək vurğunlarına qətiyyən hökm etmir, inandırıcı bir şəkildə yaşam variantlarını nişan verir. Bu, sadəcə kitab deyil, çətin həyat yollarında sıxıntılardan xilas olmağın ən uğurlu layihəsini canlandıran bir ürəyin təsviri, könüllü çağırış, müəllifin düşüncələr aləminə maraq göstərənlərə tərəf uzanmış xeyirxah, etibarlı və düşərli bir əldir.
Gülgünün atası – tanınmış şair, tərcüməçi, publisist, Əməkdar mədəniyyət işçisi Vaqif Bəhmənlinin redaktoru olduğu kitab “Təhsil” nəşriyyatında çapdan çıxıb. Nəşrin üzqabığının tərtibçisi Əziz Sadıqzadə, illüstrasiyaların müəllifi Narınc Mustafayevadır. Gənc yazarın təqdimat mərasiminə toplaşan oxucuların əldə etdikləri kitablara həvəslə avtoqraf yazaraq onları imzalamasından belə bir qənaət hasil olurdu ki, əsərin mütaliəsinə həsr edilən saatlar, günlər hədər getməyəcək.
Əli NƏCƏFXANLI, “Xalq qəzeti”