Dünya şöhrətli siyasətçi və dövlət xadimi Heydər Əliyevin dünyaya göz açdığı Naxçıvanda Ulu öndərin anadan olmasının 100 illik yubileyinə həsr olunmuş daha bir kitab işıq üzü görüb. Azərbaycan Jurnalistlər Birliyinin üzvü, Naxçıvan Muxtar Respublikasının Əməkdar jurnalisti, redaksiyanın məsul katibi Muxtar Məmmədoğlunun “O yaşayır, yaşayacaq ürəklərdə” adlı kitabında Ümummilli liderə əbədiyaşarlıq qazandıran tarixi xidmətlərdən əhatəli bəhs olunub.
“Şərq qapısı” qəzeti redaksiyasında keçirilən təqdimat mərasimində qəzetin baş redaktoru, filologiya üzrə fəlsəfə doktoru, Naxçıvan Muxtar Respublikasının Əməkdar jurnalisti Mehriban Sultan bildirib ki, redaksiyanın məsul katibi Muxtar Məmmədoğlunun sayca beşinci olan “O yaşayır, yaşayacaq ürəklərdə” kitabında Ümummilli lider Heydər Əliyevin xalqa xidmətdə keçmiş mənalı ömür yoluna, zəngin siyasi irsinə geniş nəzər salınmışdır.
Bildirilib ki, “Əcəmi” Nəşriyyat-Poliqrafiya Birliyində nəfis tərtibatla çapdan çıxan kitab ön söz, giriş və dörd bölmədən ibarətdir. Kitabın “Esselər”, “Dəyirmi masa, müsahibələr və söhbətlər”, “Bu ünvanlar xalqımızın böyük oğlunun adını yaşadır”, “Bu da bir ömürdür...” bölmələrində jurnalistin ürəyindən keçən və qələminin gücü ilə ərsəyə gələn səmimi fikirləri, düşüncələri aparıcı yer tutur. Elmi-kütləvi səpkidə yazılmış və müasirlərimizə ünvananmış yeni nəşr indiki nəsillərin Ulu öndərin həyat və faəliyyətini dərindən öyrənməsinə kömək edən salnamə ədəbiyyatı sayıla bilər.
Kitabın ön sözünün müəllifi, Yeni Azərbaycan Partiyası Naxçıvan şəhər təşkilatının sədri, Muxtar Respublika Ali Məclisinin deputatı, tarix üzrə fəlsəfə doktoru, dosent Elman Cəfərli, Naxçıvan Mətbuat Şurasının sədri Rövşən Hüseynov, Naxçıvan Dövlət Universitetinin prorektoru, tarix üzrə fəlsəfə doktoru Arzu Abdullayev, Naxçıvan MR-in Əməkdar jurnalisti Hüseyn Əsgərov kitabda Ümummilli lider Azərbaycanın hərtərəfli inkişafı, dövlət müstəqilliyi qazanması və dünya birliyində layiqli yer tuması uğrunda tarixi mübarizəsinin müxtəlif məqamlarının jurnalist peşəkarlığı ilə qələmə alındığını söyləyiblər. Natiqlər kitabı Naxçıvan jurnalistika məktəbinin Ulu öndərin yubileyinə layiqli töhfəsi kimi dəyərləndiriblər.
Kitabın müəllifi Muxtar Məmmədoğlu Heydər Əliyev şəxsiyyətinə sonsuz sevginin onda daim yeni düşüncələr doğurduğunu, qəlbində yeni-yeni mövzulara çevrildiyini söyləyib, xalqımızın böyük oğlu barədə araşdırmaları bundan sonra da davam etdirəcəyini bildirib.
Səbuhi HƏSƏNOV, “Xalq qəzeti”