Bu il Masallı rayonunda 7 min 790 hektar sahədə buğda, 2 min 800 hektarda arpa yetişdirən taxılçıların nəticələri fərəhləndiricidir. Zəmilərdə məhsul yığımı başa çatıb. Rayonda 18 min 759,6 ton buğda tədarük edilib, hektarın məhsuldarlığı 24,3 sentnerə çatdırılıb. Arpa sahələrindən 6 min 216 ton məhsul əldə olunub, hektarın məhsuldarlığı isə 22,2 sentnerə yüksəlib. 

Rayonda qarğıdalı, günəbaxan, noxud, paxla, lobya, lərgə, mərci əkin­lərinə də önəm verilir. Carı təsərrüfat ilində Masallıda 750 hektardan çox paxlalı bitkilər yetişdirilib. 

Kartofçuluq da rayon iqtisadiyyatın­da mühüm yer tutur. Ötən illər bu sahə­dən yaxşı gəlir gətirən zəhmət adam­ları cari mövsümdə də müsbət nəticə gözləyirlər. Kartof ustaları 903 hektar sahədə əkin keçiriblər. Bir aydan çox­dur ki, sahələrin bol məhsulu fermerləri ruhlandırır. Sevindirici haldır ki, yığılan məhsul sahələrdə qalmır. Hər gün yüz tonlarla məhsul qonşu Rusiya şəhərlə­rinə yola salınır. Rayon statistika idarə­sindən aldığımız məlumata görə, möv­sümün əvvəlindən tarlalardan 15 min 892,8 ton kartof çıxarılıb. 

Son illər Masallının iqtisadiyya­tına daxil olan və məhsuldarlığı ilə fərqlənən sahələrdən biri də bostançı­lıqdır. Əvvəllər Sabirabad, Saatlı, İmişli və başqa rayonlardan gətirilən qarpız, yemiş, kudu məhsulları bu gün rayonun tarlalarından yığılıb bazarlara göndəri­lir.

Statistika idarəsindən aldığımız mə­lumata görə, bostançılar cari ilin məh­sulu üçün 246 hektar sahədə yemiş, 60,5 hektarda qarpız yetişdiriblər. Cari mövsümdə 2 min tondan artıq bos­tan məhsullarının istehsal edilməsi bu sahənin getdikcə inkişafından xəbər verir. 

Əlihüseyn ŞÜKÜROV,
Masallıda çıxan “Yeni həyat” qəzetinin redaktoru