Əmək və Əhalinin Sosial Müdafiəsi Nazirliyində BMT-nin Əhali Fondunun (UNFPA) Azərbaycan nümayəndəliyi ilə görüş keçirilib. Söhbət zamanı qadınlara qarşı zorakılıqla mübarizə üzrə BMT-nin Əhali Fondunun qlobal proqramı çərçivəsində nazirliklə birgə fəaliyyət müzakirə edilib. 

Əmək və əhalinin sosial müdafiəsi nazirinin müavini Hidayət Abdullayev na­zirlik və BMT-nin Əhali Fondu arasında uğurlu əməkdaşlıq təcrübəsini, icra olu­nan birgə layihələrin əhəmiyyətini vur­ğulayıb. O, ölkəmizdə həssas qrupların, həmçinin gender əsaslı zorakılıq qurban­larının sosial dəstəklə təmin olunması sahəsində aparılan işləri diqqətə çatdırıb. 

Görüşdə Sosial Xidmətlər Agentliyinin Həssas Əhali Qrupları üçün Sığınacaq və Sosial Reabilitasiya Müəssisəsində 2 il əvvəl yaradılmış məişət zorakılığından zərər çəkmiş şəxslərin sosial reabilitasi­yası şöbəsinə qəbul olunanların müvafiq dəstəklə əhatə olunduğu qeyd edilib.

BMT-nin Əhali Fondunun Azərbay­candakı nümayəndəliyinin rəhbəri Fərid Babayev qadınlara qarşı zorakılıqla mü­barizə üzrə qlobal proqramın önəmini və müvafiq sahədə görülən işlərə mühüm dəstək məqsədi daşıdığını bildirib. 

Görüşdə gender əsaslı zorakılıq qur­banlarına dəstək göstərilməsi sahəsi üzrə kadr potensialının artırılması və mövcud sistemin təkmilləşdirilməsi yolu ilə zora­kılıq qurbanlarının keyfiyyətli xidmətlərlə təmin edilməsi məqsədilə BMT-nin Əhali Fondunun qlobal proqramı çərçivəsində görüləcək birgə işlər müzakirə olunub.

Z.HÜSEYNOVA, 

“Xalq qəzeti”