Son vaxtlar Gəncə avtomobil zavodu İB-də istehsalın həcmi artır. Bu, traktorların yığım istehsalında özünü daha çox büruzə verir.
Müəssisənin mətbuat katibi Məqsəd Rəhimovun sözlərinə görə, bu ilin 6 ayı ərzində traktor istehsalı ötən ilin müvafiq dövrü ilə müqayisədə 60 faiz artıb. Əgər ötən il bu müddət ərzində 230 traktor yığılmışdısa, bu il onun sayı 364-ə çatmışdır.
Bundan başqa, 2023-ci ilin 6 ayı ərzində Gəncə avtomobil zavodu İB-də müxtəlif təyinatlı 147 KAMAZ, 50 ədəd kombayn və digər nəqliyyat vasitələri, o cümlədən 18 ədəd sərnişin avtobusu yığılmışdır.
Qeyd edək ki, müəssisədə indiyədək 13 minə yaxın müxtəlif modeldə və modifikasiyada traktor, 2908 MAZ, 668 KAMAZ, 591 URAL, 6 ədəd MAZ avtobusu, 4 ədəd elektrobus, 879 traktor qoşqusu, 301 ədəd MAZ qoşqusu yığılıb.
Hamlet QASIMOV,
“Xalq qəzeti”nin bölgə müxbiri