Dünən Bakı Slavyan Universitetində Elm və Təhsil Nazirliyi yanında İctimai Şura, qeyri-hökumət təşkilatları və media nümayəndələrinin iştirakı ilə tədris ilinin yaz semestrinin imtahan sessiyasını izləmək məqsədilə mediatur keçirilib.
BSU-nun rektoru Anar Nağıyev bakalavriat və magistratura səviyyələri üzrə imtahanlarda 3 min 868 tələbənin iştirak etməsi barədə qonaqlara məlumat verib. O bildirib ki, bu il ilk dəfə olaraq əsas binada keçirilən imtahanlar mərkəzləşdirilmiş qaydada təşkil edilib.
Rektor yeni tədris ilində universitetdə balkanistika ixtisasının açılacağını, bu istiqamətdə tədrisi həyata keçirmək üçün müvafiq işlər görüldüyünü vurğulayıb. Bu ixtisasın balkanşünaslıq istiqamətində yeni mütəxəssislərin hazırlanmasına, eyni zamanda, gələcəkdə həmin məzunların tədris prosesinə cəlb olunmasına imkan yaradacağını bildirib. Bu il bakalavriat səviyyəsinə “politologiya”, “tarix müəllimliyi”, “tərcümə” (rus dili-türk dili), “filologiya” (türk dili və ədəbiyyatı) ixtisaslarına, magistratura səviyyəsinə isə “menecment” (təhsil sahəsi üzrə) ixtisasına qəbul aparılır. Nəticədə, BSU-nun tələbə kontingentinin sayı 1500 nəfərə çatacaq.
Anar Nağıyev iyunun 1-dən başlayan və əyani formada təşkil olunan sessiyada bu günədək 1357 imtahanın keçirildiyini vurğulayıb. O, imtahanların müvafiq qaydalara uyğun təşkil edildiyini, şəffaf və ədalətli keçirilməsinin təmin olunduğunu bildirib. Ali məktəb rəhbəri mediatur iştirakçılarının suallarını da cavablandırıb. Sonra mediatur iştirakçıları ilk imtahanların gedişini izləyiblər.
Qeyd edək ki, BSU-da cari tədris ilinin yaz imtahan sessiyasının təşkilinə, gedişinə nəzarəti həyata keçirmək, yarana biləcək münaqişə və şikayətlərin yerində operativ həllini təmin etmək məqsədilə universitet rəhbərliyinin, valideyn şuralarının, tələbə-gənclər təşkilatlarının, mətbuat xidmətinin nümayəndələrindən ibarət “İmtahan qərargahı” yaradılıb. İimtahan sessiyasının keçirilməsi üçün əlaqədar struktur bölmələrə müvafiq tapşırıqlar verilib.
İyulun 6-dək davam edəcək sessiyada, ümumilikdə, 1416 imtahanın keçirilməsi nəzərdə tutulur.
“Xalq qəzeti”
.jfif)
