Azərbaycan Yazıçılar Birliyində Azərbaycan Dövlət Pedaqoji Universitetinin (ADPU) professoru, Türkoloji Mərkəzin Türk ədəbiyyatı bölməsinin müdiri Elman Quliyevin 65 illik yubileyinə həsr olunmuş tədbir keçirilib.
Tədbiri giriş sözü ilə Azərbaycan Yazıçılar Birliyinin beynəlxalq əlaqələr və tərcümə məsələləri üzrə katibi Səlim Babullaoğlu açaraq yubilyarın həyatı, yaradıcılığı haqqında məlumat verib. Qeyd edib ki, Elman Quliyevin yaradıcılığının əsas xəttini Türk dünyası ədəbiyyatının öyrənilməsi təşkil edir.
ADPU-nun rektoru, tarix elmləri doktoru, professor Cəfər Cəfərov, prorektor Mahirə Hüseynova, Milli Məclisin deputatları Sabir Rüstəmxanlı, Jalə Əliyeva, Qəzənfər Paşayev, Lerik Rayon İcra Hakimiyyətinin başçısı Əkbər Abbasov, yazıçı-dramaturq Hüseynbala Mirələmov və başqaları çıxış edərək müəllifin Azərbaycan ədəbiyyatının çağdaş mərhələsini əhatə edən ədəbiyyatşünaslıq sahəsindəki araşdırmalarından danışıblar. Bildirilib ki, Elman Quliyev bir çox beynəlxalq elmi konfranslarda məruzə ilə çıxış etmiş, elmi əsərləri Türkiyə, İran, İraq, Türkmənistan, Şimali Kipr və s. xarici ölkələrdə çap edilmişdir. Onun çoxsaylı tədqiqat əsərlərinin elmi ictimaiyyət tərəfindən haqlı təqdir olunduğu nəzərə çatdırılmışdır. Elman Quliyevin monoqrafiya, dərslik və dərs vəsaitləri ölkəmizin universitetlərində mötəbər tədris materialı olaraq sevilə-sevilə oxunur, bəhrələnilir və təqdir olunur.
Sonda Elman Quliyev çıxış edərək ona göstərilən diqqətə görə təşəkkürünü bildirib.
Leyla AZAD, “Xalq qəzeti