“Zolqensma” dünyanın ən bahalı dərmanlarından biridir. İsveçrənin “Novartis” şirkəti tərəfindən istehsal olunan dərmanın bir dozasının qiyməti 2 milyon dollardır. Preparat onurğa əzələlərinin atrofiyasının müalicəsində innovativ terapiya üsulu kimi tətbiq edilir.
Körpələrdə bu xəstəlik özünü iflic, əzələ zəifliyi və hərəkət qabiliyyətinin davamlı olaraq itməsi kimi göstərir. Atrofiyanın 1-ci dərəcəsi ilə doğulmuş uşaqlarda orta ömür müddəti cəmi iki ildir. “Zolqensma” dərman vasitəsinin tətbiq edildiyi körpələr bir dozanın inyeksiyasından sonra süni tənəffüz aparatı olmadan nəfəs ala, özləri otura və iməkləyə bilirlər.
Tədqiqatçılar dərmanın körpələrin ömrünü uzatdığını təsdiqləyirlər. “Zolgensma” dərmanı dünyanın ən bahalı dərmanı kimi Ginnesin Rekordlar Kitabına düşüb. Rusiyada dərmanın bir dozası hazırda təxminən 160 milyon rubla atılır.
Pünhan ƏFƏNDİYEV, “Xalq qəzeti”
