Sosial şəbəkələrdə təbiətin qeyri-adi gözəllikləri ilə bağlı duyğulu paylaşımlar edən bir ziyalı xanım dünən özünün “Facebook” səhifəsində respublikanın bəzi dağətəyi rayonlarında yayın ilk günündə yağan yağışla əlaqədar belə yazıb:
“Yay yağışı çox gözəldir. Bəlkə də mən yayda yagışı çox sevirəm deyə, o, belə gözəldir? Kim bilir? Hər halda yay yağışının qeyri-adi bir sehri, əsrarəngizliyi var.
...Yadımdadır, uşaqlıq çağlarımda yağış yağarkən çox sevinərdim. Bir dəfə əlində dəryazla kəndimizdəki çəmənliyə ot biçininə getməyə hazırlaşan babam dedi ki, ay bala, sən yağışa sevinirsən, mənim isə işim tökülüb qalır.
Nənəm babamı qınayıb dedi:
--Uşağın xətrinə dəymə! Yağış göylərin nurudur...
İndi hər dəfə yayda yağış yağanda rəhmətlikləri xatırlayıram. İstər-istəməz, kövrəlirəm.
Bu məqamda yadıma Müşfiqin “Yağış yağır, rəqs eləyir gur damcılar” misrası ilə başlanan şeri düşdü.
Təqdim etdi: M.HACIXANLI, “Xalq qəzeti”