– Övladlarımın yaşca ən kiçiyi idi. Hamısı mənim balamdır, əzizlərimdir, amma nə gizlədim, sanki onunla nəfəs alirdım. Deyirdi ordudan başqa heç yerdə qulluq etmək, işləmək fikrim yoxdur. Mən yalnız hərbçi peşəsini seçmişəm. Özü də bir gün əvvəl danışmışdıq. Dedi ki, sabah, yəni mayın 12-də evə gələcəyəm. Özünü gözləyirdik, tabutu gəldi…
Şəhid Orxan Novruzəlizadənin atası Elxan Novruzəliyev bu sözləri deyib üzünü yana çevirərək hönkürdü. Toxdaqlığını saxlamaq istəyirdi, bacarmadı. Səsi titrəsə də, ətrafına toplaşanlara baxmadan astadan “Vətən sağ olsun!” – deyə bildi.
…Əvvəlcə Ağstafanın Vurğun qəsəbəsində, doğma evində vida mərasimi keçirildi. Sonra da doğulub boya-başa çatdığı həmin qəsəbənin qəbiristanlığında dəfn olundu.
Dəfn mərasimində rayon icra hakimiyyətinin başçısı Seymur Orucov, Müdafiə Nazirliyinin nümayəndələri, şəhid ailələrinin üzvləri, qazilər, rayonun hüquq-mühafizə orqanlarının rəhbərləri, şəhidin döyüş yoldaşları, ictimaiyyət nümayəndələri iştirak etdilər.İcra hakimiyyətinin başçısı üçrəngli Azərbaycan Bayrağını şəhidin atası Elxan Novruzəliyevə təqdim etdi.
Qeyd edək ki, hələ 25 yaşı tamam olmamış Orxan Novruzəlizadənin özündən başqa daha bir qardaşı, iki bacısı var. O, evin sonbeşiyi idi. Zəhmətkeş bir ailədə böyümüşdü. Orxanı tanıyan hər kəs ona sakit təbiətinə, vətənsevər, layaqətli bir gənc olduğuna görə dərin rəğbət bəsləyirdi.
Məlumat üçün bildirək ki, Orxan Novruzəlizadə 44 günlük Vətən müharibəsinin də iştirakçısı idi və “Vətən müharibəsi iştirakçısı” medalı ilə təltif edilmişdi. Srağagün, mayın 11-də Ermənistan silahlı qüvvələrinin Kəlbəcər rayonu istiqamətində törətdiyi növbəti təxribat zamanı xidməti döyüş tapşırığını şərəflə yerinə yetirərkən şəhid olmuşdur. Allah rəhmət eləsin!
Hamlet QASIMOV,
“Xalq qəzeti”nin bölgə müxbiri
Ağstafa