Ümummilli lider Heydər Əliyevin 100 illik yubileyi ilə əlaqədar Azərbaycan Həmkarlar İttifaqları Konfederasiyası Naxçıvanda yaşayan şəhid və qazi ailələrinə, sağlamlıq imkanları məhdud və aztəminatlı 2 min 200 ailəyə ərzaq yardımı edib. 

Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfliyə məlumat verilib ki, Naxçıvan şəhərində və muxtar respublikanın rayonlarında yaşa­yan aztəminatlı ailələr üçün verilən bağ­lamalar müxtəlif zəruri ərzaq məhsulların­dan ibarətdir. 

AHİK-in sədri, Milli Məclisin deputatı Səttar Möhbalıyev açıqlamasında bildirib ki, 2022-ci ildən bugünədək Naxçıvanda 7 mindən artıq vətəndaşa ərzaq yardımı göstərilib. Ümumilikdə isə ölkə üzrə 75 min ailəyə ərzaq yardımı edilib, 100 min­dən çox insana maliyyə dəstəyi göstərilib. 

Sonra ərzaq məhsulları ilə yüklənmiş 6 avtomobil təyinatı üzrə ünvanlara yola salınıb. 

***

Ulu öndər Heydər Əliyevin 100 illik yubileyi münasibətilə Naxçıvan və Tür­kiyə alpinistlərinin muxtar respublika­nın məşhur zirvəsi Haçadağa ekstre­mal yürüşü təşkil olunub. 

Naxçıvan Gənclər və İdman Nazirliyi­nin mətbuat xidmətindən verilən məluma­ta görə, 11-i yerli idman federasiyalarının, 23-ü isə "İğdır Gençlik ve Spor Dağcılık", "İğdır Dağcılık ve Bisiklet Spor", "Kars Dağcılık ve Arama Kurtarma" klublarının üzvləri olmaqla, 34 alpinist dəniz səviyyə­sindən 24 min 15 metr yüksəklikdə olan təbiət abidəsinin zirvəsinə qalxıb.

Yürüşün son nöqtəsində Azərbaycan Respublikası və Türkiyə Cümhuriyyətinin Dövlət himnləri səsləndirilib. 

***

AMEA Naxçıvan Bölməsində ümum­milli lider Heydər Əliyevin anadan olma­sının 100 illiyi münasibətilə “Ümummilli lider Heydər Əliyevin həyatı və fəaliyyə­ti xalqa və Vətənə xidmət nümunəsidir” mövzusunda elmi konfrans keçirilib.

Konfransda bölmənin sədri, akademik İsmayıl Hacıyev çıxış edərək ulu öndərin zəngin və şərəfli həyat yolu, bənzərsiz siyasi və dövlətçilik fəaliyyəti haqqında məlumat verib. Sonra Tarix, Etnoqrafiya və Arxeologiya İnstitutunun baş direkto­ru, AMEA-nın müxbir üzvü Hacıfəxrəddin Səfərlinin “Azərbaycanın inkişafında dö­nüş mərhələsi (1969-1982-ci illər)”, ins­titutun şöbə müdirləri, AMEA-nın müxbir üzvü Vəli Baxşəliyevin “Ulu öndər Heydər Əliyev müstəqil Azərbaycan dövlətinin qu­rucusudur”, tarix elmləri doktoru, dosent Emin Şıxəliyevin “Ümummilli lider Heydər Əliyevin ermənilərin Azərbaycana ərazi iddialarına qarşı mübarizəsi” və tarix üzrə fəlsəfə doktoru, dosent Asəf Orucovun “Ulu öndər Heydər Əliyev və Azərbayca­nın xarici siyasəti” mövzularında çıxışları dinlənilib. 

Çıxışlarda ümummilli lider Heydər Əli­yevin mənalı ömür yolu və ictimai-siyasi fəaliyyətindən, həmçinin Naxçıvana rəh­bərliyi dövründə həyata keçirilən tədbirlər­dən geniş söhbət açılıb.

***

Xəbər verdiyimiz kimi, ümummilli li­der Heydər Əliyevin anadan olmasının 100 illik yubileyi münasibətilə Bakıda və Ankarada yerləşən diplomatik kor­pusun nümayəndələri – 80-dək ölkənin 140 diplomatı və hərbi attaşesi ulu ön­dərin doğulduğu torpağı ziyarət edib, onun xatirəsini ehtiramla anıblar.

Səfər iştirakçısı olan Türk Dövlətləri Təşkilatının baş katibinin müavini Yerjan Mukaş qəzetimiz üçün açıqlamasında bil­dirib: 

– Heydər Əliyevin yüzillik yubileyinə həsr olunmuş tədbirdə iştirak etmək üçün buradayam. Naxçıvanda olmağıma çox şadam. Bu ziyarət rəmzidir, çünki təşkilatımız 2009-cu ildə ilk sammit za­manı Naxçıvanda yaranıb. Mənim üçün ikiqat şərəfdir, çünki mən Qazaxıstanın Azərbaycandakı səfirliyində də çalışmı­şam. Azərbaycan xalqını ümummilli lider Heydər Əliyevin yüzillik yubileyi münasi­bətilə təbrik edirəm. Heydər Əliyev təkcə Azərbaycanın deyil, bütün türk dünyasının dahi şəxsiyyəti idi. O, türk dünyası arasın­da körpü rolunu oynayırdı.

Səbuhi HƏSƏNOV,

“Xalq qəzeti”