Kinoa susuzluğa çox davamlı, torpaqdan isə duzluluğu götürən bitkidir. Ondan həm ərzaq, həm də yem bitkisi kimi istifadə edilir. 100-dən çox növü olan bu bitki ağ, qara və açıq qəhvəyi rənglərinə görə fərqlənir. Vətəni Cənubi Amerikanın And dağları bölgəsi olan bu bitki Azərbaycana Türkiyədən gətirilib və Əkinçilik Elmi-Tədqiqat İnstitutu bölgələrdə onun sınaq əkinlərini keçirib.
Naxçıvanda isə təcrübə məqsədilə bu il Əliabad qəsəbəsində 0,5 hektar ərazidə kinoa əkini həyata keçirilib. Əkini muxtar respublikanın Kənd Təsərrüfatı Nazirliyinin Toxumçuluq və Bitkilərin Mühafizəsi İdarəsinin mütəxəssisləri aparıblar. Kinoa yerli torpaq iqlim şəraitinə uyğunlaşarsa və məhsuldarlığı yüksək olarsa, gələcəkdə onun əkinlərinin genişləndirilməsi nəzərdə tutulur.
Səbuhi HƏSƏNOV,
“Xalq qəzeti”nin bölgə müxbiri