Bakı Dövlət Universitetinin (BDU) professor-müəllim heyəti Mir Cəlal Paşayevin 115 illik yubileyinə həsr olunmuş tədbirlər çərçivəsində görkəmli ədibin Gəncə şəhərində yerləşən ev-muzeyini ziyarət edib. 

BDU-nun rektoru Elçin Babayev görkəmli alim, pedaqoq Mir Cəlal Paşaye­vin xatirəsini özündə yaşadan bu muzeyi ziyarət etməyin mənəvi borc olduğunu bildirib. 

“BDU-nun nüfuzlu professoru, sevim­li müəllimi kimi xatirələrdə daim yaşayan Mir Cəlal müəllim həqiqət, düzlük, səmi­miyyət aşiqi, ailəsini, övladlarını, tələbələ­rini sevən, qoruyan şəxsiyyət olub. Onun bu kəlamı indi də dillər əzbəridir: "Həya­tımda yaratdığım ən böyük əsər ailəmdir". Bu, Mir Cəlal müəllimin ailəsinə, övlad­larına olan məhəbbətinin təzahürü idi”, - deyə o əlavə edib. 

ADA Universitetinin rektoru Hafiz Pa­şayev Mir Cəlal irsinin öyrənilməsi və təb­liği istiqamətində BDU-nun təşəbbüsünü alqışladığını, tələbələrin də bu işdə yaxın­dan iştirak etdiyini məmnunluqla bildirib. Hafiz Paşayev qeyd edib ki, Mir Cəlalın ailəsi həm də Bakı Dövlət Universiteti, bu­radakı minlərlə tələbəsi idi. 

Gəncə Şəhər İcra Hakimiyyətinin baş­çısı Niyazi Bayramov Mir Cəlal Paşayevin ədəbi irsinin bütün nəsillər üçün əsl mək­təb olduğunu vurğulayıb. 

Daha sonra BDU-nun tələbələri ara­sında böyük yazıçı və alimin 115 illik yubi­leyi münasibətilə elan edilmiş qısa hekayə müsabiqəsinin nəticələri elan olunub. 

BDU-nun nümayəndə heyəti Mir Cə­lal Paşayev adına 39 nömrəli tam orta məktəbdə də olub. “Bestcomp” şirkətinin dəstəyi ilə alınan kompüter dəsti təhsil ocağına hədiyyə edilib. 

***

Bakı Dövlət Universitetinin (BDU) təş­kilatçılığı ilə görkəmli yazıçı, ədəbiyyatşü­nas alim və pedaqoq Mir Cəlal Paşayevin 115 illik yubileyinə həsr olunmuş tədbirlər çərçivəsində Qazax Müəllimlər Seminari­yasında da görüş keçirilib. 

Görüşdə seminariyanın baş məs­ləhətçisi Yeganə Göyüşlü bildirib ki, ADA Universiteti 2021-ci ilin may ayında "Bir müəllimin manifesti" adlı layihə təşəbbü­sü ilə çıxış edərək, milli təhsil sistemimizin başlanğıcı olan Qazax Müəllimlər Semi­nariyasının təlim-tədris ənənələrini yaşat­maq üçün onun tarixi binasının bərpasını və təhsil missiyasını yerinə yetirib. 

BDU-nun rektoru Elçin Babayev se­minariyanın müasir görkəm almasında böyük rol oynadığına görə ADA Universi­tetinin rektoru, professor Hafiz Paşayevə minnətdarlığını bildirib. Rektor diqqətə çatdırıb ki, professor Hafiz Paşayevin rəhbərliyi ilə Qazax Müəllimlər Semina­riyasının tarixi binasının bərpası, 1918-1920-ci illərdə çap edilmiş “Azərbaycan” qəzeti və XIX əsrin axırlarında işıq üzü görmüş iki hissədən ibarət “Vətən dili” dərsliyinin latın qrafikasında nəşrləri, “Bir müəllimin manifesti” kimi dəyərli layihələr milli-mənəvi dəyərlərimizin qorunmasına və təbliğinə xidmət edir. Əsası Azərbay­can Xalq Cümhuriyyəti dövründə qoyul­muş Qazax Müəllimlər Seminariyası bu gün artıq müasir dövrün tələblərinə cavab verən təhsil mərkəzinə çevrilib. 

ADA Universitetinin rektoru Hafiz Paşayev Qazax Müəllimlər Seminariya­sının bərpasının Azərbaycan təhsilinin inkişafına xidmət edəcəyini bildirib və bu istiqamətdə BDU ilə birgə əməkdaşlıq la­yihələrinin keçirilə biləcəyini vurğulayıb. 

Tədbirin sonunda BDU tələbələrinin ifasında Mir Cəlal Paşayevin “Müalicə” hekayəsindən səhnəcik və universitetin Mədəniyyət-yaradıcılıq Mərkəzinin təqdi­matında ədəbi-bədii kompozisiya nüma­yiş olunub.