Lənkəran Regional Mədəniyyət İdarəsinin təşkilatçılığı ilə şəhər Mədəniyyət Mərkəzində mərhum sənətkar Kamil Ramazanovun fərdi rəsm sərgisi keçirilib. Sərgidə regional idarənin tabeliyində fəaliyyət göstərən müəssisələrin əməkdaşları, rayon ziyalıları, rəssamlar və digər qonaqlar iştirak ediblər.
Əvvəlcə Vətən torpaqlarının azadlığı uğrunda canlarını fəda edən şəhidlərin əziz xatirəsi bir dəqiqəlik sükutla anılıb. Lənkəran Regional Mədəniyyət İdarəsinin rəisi Şahin Şahbazov bildirib ki, mərhum rəssam Kamil Ramazanov özündən sonra qoyub getdiyi gözəl rəsmləri ilə ikinci həyat qazanıb. 1978-ci ildə SSRİ Rəssamlar İttifaqına üzv qəbul edilib. Bir çox respublika və ümumittifaq sərgilərinin, eləcə də M.Füzulinin 500 illik yubiley ilə əlaqədar Fransada təşkil olunmuş sərginin iştirakçısı olub. Rəssamın sağlığında 30-dan çox fərdi sərgisi keçirilib, əsərləri Bakıda Nizami, İstiqlal, İncəsənət muzeylərində və Dövlət Rəsm Qalereyasında nümayiş etdirilib.
Qeyd edilib ki, Kamil Ramazanovun yaradıcılığı əsasən rəngkarlıq sahəsinə aiddir. O, süjetli tablo, portret, mənzərə və bir çox maraqlı əsərlərin müəllifi kimi tanınır. Əsərlərində vətənpərvərlik mövzusuna xüsusilə geniş yer ayırıb.
Rəssamın ailə üzvləri onun mədəni irsini qədirbilənliklə qoruyub saxlayır.
Rəssamlar Firudin Quliyev, Adil Əsədli, Şöhrətdin Səbziyev və başqaları, həmçinin mərhum rəssamın ailə üzvləri çıxış edərək təəssüratlarını bölüşüb, xatirələr söyləyiblər. Mərhumun qardaşı nəvəsi, Lənkəran şəhər Uşaq Rəssamlıq Məktəbinin şagirdi Rüqəyya Ramazanova onun bir zaman qələmə aldığı “Qarabağ” adlı şeiri məharətlə səsləndirib və alqışlanıb.
Sonda mərhum sənətkarın yaradıcılığına aid 60 yaxın rəsm əsərinə baxış olub.
Zəfər ORUCOĞLU,
Azərbaycan Jurnalistlər Birliyinin üzvü