Həyat qarşılıqlı elm və təcrübə mübadiləsi ilə daha rəngarəng olub. Müxtəlif mədəniyyətlərin bir araya gəldiyi nadir ölkələrdən olan Azərbaycan məhz bu zənginliyi özündə təcəssüm etdirir, multikultural dəyərləri qoruyur. Ölkəmizin nüfuzlu mədəni mərkəzlərindən biri olan Azərbaycan Milli İncəsənət Muzeyində bütün ölkələrin mədəniyyətinə diqqətlə yanaşılır.
Bu günlərdə muzeydə açılan “Çin İncəsənəti Azərbaycan Milli İncəsənət Muzeyinin kolleksiyasından” sərgisi də bu baxımdan böyük əhəmiyyət kəsb edir. Sərgidə nümayiş etdirilən qiymətli mədəni yadigarlar qədim xalqın sivilizasiyasının bütün dövrlərinə aiddir. Beş zalda nümayiş etdirilən sərgi ilə tanış olarkən bənzərsiz Çin mədəniyyətinə, incəsənətinə sanki səyahət edirsən.
Mədəniyyət Nazirliyi, Çinin Azərbaycandakı səfirliyi və Milli İncəsənət Muzeyi tərəfindən ərsəyə gələn sərginin kuratoru və ideya müəllifi muzeyin direktoru Çingiz Fərzəliyevdir.
Öyrəndik ki, muzey 2016-cı ildən başlanılan multikultural ənənəyə sadiq qalaraq Fransa, Yaponiya, Almaniya kimi ölkələrin diplomatik nümayəndəlikləri ilə birlikdə bu xalqlarının mədəniyyətini özündə əks etdirən sərgilər təşkil edib.
Muzeyin Elmi-kütləvi işlər şöbəsinin müdiri Rəfiqə Quliyeva dedi: “Çin sərgisində, əsasən, XVII–XX əsrlərə aid 300-ə yaxın bədii sənət nümunəsi nümayiş etdirilir. Onların hər biri özünəməxsus gözəlliyi və təbiilik fəlsəfəsi, dekorativ-tətbiqi sənətin bədii üsullarının incə zənginliyi ilə diqqəti cəlb edir. Beş min ildən artıq tarixə malik, qədim dövrlərdən açıq və inklüziv olması ilə tanınan Çinə aid eksponatlar buraya gələnlərin böyük marağına səbəb olub. Sərgini ziyarət edənlər arasında orta məktəb şagirdlərindən, tələbələrdən tutmuş, yaşlı nəslin nümayəndələrinə qədər hamı Çin farfor nümunələrinə, pannolara, ipək üzərində tikmələrə, böyük sənətkarlıqla hazırlanmış metalişləmə və ağacişləmə sənət nümunələrinə xüsusi diqqət göstərir. Sərgi 3 aya qədər davam edəcək”.
Sərgidə nümayiş olunan eksponatlar işlənmə texnikasının nəfisliyi, parlaq və füsunkar rəsmləri ilə göz oxşayır. İstehsal tarixinin neolit dövrünə təsadüf etdiyi Çin farfor nümunələri xüsusi peşəkarlıqla hazırlanıb. Bu qədim ölkənin dekorativ tətbiqi sənətində mifoloji, quş, nəbati, at və digər ornamentlərin təsvirinə tez-tez rast gəlmək olar. Onlardan Əjdaha totemi çini, metalişləmə və digər sənət nümunələrinin üzərində təsvir edilir. Sərgidə də belə nümunələr kifayət qədər var. Eyni zamanda, XVII əsrə aid dekorativ vaza, boşqab, çaydan, güldan və bir sıra dekorativ fiqurların yer aldığı sərgi Çin incəsənətinin bənzərsizliyini bir daha sübut edir.
Sərgi təkcə Çin mədəniyyəti və incəsənətinə maraq göstərənlər üçün deyil, eyni zamanda bu qədim ölkənin mədəni irsi və tarixi haqqında geniş məlumat almaq istəyən hər kəs üçün böyük maraq kəsb edir. O, həm də Azərbaycan və Çin kimi müxtəlif mədəniyyətlərə malik iki ölkə arasında tarixi bağların daha da möhkəmlənməsi baxımından əhəmiyyətlidir. Əminik ki, sərgi geniş kütlələrin Çin mədəniyyəti ilə daha yaxından tanış olması üçün böyük imkanlar yaratmaqla yanaşı, iki ölkə arasında dostluğun gücləndirilməsinə də layiqli töhfəsini verəcək.
Leyla AZAD, “Xalq qəzeti”