Bu günlərdə Nizami Xəzər Hasiloğlu adlı bir nəfər özünün “Facebook” səhifəsində Sumqayıtda şahidi olduğu ibrətamiz bir hərəkət barədə “Bu gün şahidi olduğum hadisədən çox duyğulandım...” sərlövhəli paylaşım yerləşdirib. Orada deyilir:
“Sumqayıtda “Əşya bazarı” adlanan ərazidə bir azyaşlı uşaq çiynində çantası ilə 10 nömrəli marşrutun arxasınca qaçırdı ki, avtobusa minib gedəcəyi ünvana tez çatsın. Avtovağzalın yaxınlığından təxminən beş yüz metr qaçdı.
Sürücü ya onu görmürdü, ya da dayanacaq deyil deyə saxlamırdı. Bu an ərazidə xidmət aparan Sumqayıt şəhər Polis İdarəsinin PPX-nin (Post Patrul Xidməti) əməkdaşları yağışlı havada üst-başı islanmış və təngnəfəs olmuş uşağı yoldan götürərək avtobusa çatdırdılar. İnanın, həmin an gözlərim doldu. Düzü, həmin PPX əməkdaşlarını tanımıram. Amma, çox təşəkkür edirəm”.
Bu kiçik qeydlərlə bağlı “Facebook”a çox sayda rəylər daxil olub. Onların demək olar ki, hamısında həmin polis əməkdaşlarının bu nəcib hərəkəti təqdir olunur. Məsələn, Nicat Dadaşov adlı bir nəfər hadisəyə münasibətini bu sözlərlə bildirib: “Həqiqətən, vicdanlı polislərimiz çoxdur ki, az deyil”.
Sosial şəbəkə izləyicisi Əminə Abdullayeva isə düşüncələrini daha pafoslu şəkildə ifadə edib: “Eşq olsun polislərimizə!”
Yeri gəlmişkən, paylaşım gözəl lirik bir musiqi ilə müşayiət olunur. Bu məqamın özü də “Facebook” izləyicilərinin diqqətindən yayınmayıb. Onların bir neçəsi paylaşımı müşayiət edən lirik musiqi parçasına görə də müəllifə ayrıca təşəkkür etməyi özlərinə borc biliblər.
Sonda bir məqama da diqqət yetirmək istəyirəm. Böyük ehtimalla haqqında bəhs olunan polis əməkdaşları sosial şəbəkədə populyarlaşan paylaşım barədə eşidiblər. Amma bunu “biz etmişik” deyib “forslanmağı” özlərinə rəva görməyiblər. Biz də adlarını bilmədiyimiz Sumqayıtın həmin ictimai asayiş əməkdaşlarına ürəkdən deyirik: Çox sağ olun!
Hazırladı:
M.HACIXANLI, “Xalq qəzeti”