2018-2021-ci illərdə həftədə bir dəfə Türkiyə telekanallarından birində yayımlanan və Azərbaycan mədəniyyətini, tarixini, coğrafiyasını təbliğ edən “Azərbaycan rüzgarı” televiziya proqramı yenidən fəaliyyətə başlayıb.

“Xalq qəzeti”nə bu barədə proqramın müəllifi, telejurnalist, İstanbul Universitetinin aspiran­tı Səidə Ömər bildirib. O deyib ki, proqramının əsas məqsədi Azərbay­canın qədim tarixi, ecazkar coğra­fiyası, tarixi şəxsiyyətləri və zəngin mədəniyyəti ilə bağlı məlumatların Türkiyə ictimaiyyətinin diqqətinə çat­dırmaq, ölkəmizi təbliğ etməkdir: “Hazırda Türkiyə ictimaiyyətində bu məlumatlara çox ehtiyac var. Xüsu­silə, dövlət, ordu, xalqın birliyi ilə 44 günlük müharibədə əldə etdiyimiz Qarabağ Zəfərindən sonra Türkiyə cəmiyyətində Azərbaycanı, Qarabağı daha yaxından və daha ətraflı tanı­maq istəyirlər”.

Telejurnalist onu da bildirib ki, ölkə­mizi Türkiyə tamaşaçısına tanıtmaq üçün azərbaycanlı olmaq, o torpaq­larda böyümək, musiqimizi, ədəbiyya­tımızı, incəsənətimizi, adət-ənənələ­rimizi, təbiətimizi bilmək vacibdir: “Bir azərbaycanlı olaraq mənim də məqsədim həm mədəniyyətimizi təb­liğ etmək, həm də dünyada alternativi olmayan Azərbaycan-Türkiyə müna­sibətlərinin möhkəmlənməsinə bacar­dığım xidməti göstərməkdir”.

Qeyd edək ki, layihə yeni format­da Türkiyənin “Ulusal” kanalında hər həftənin bazar günləri efirə çıxacaq. Proqrama dəvət edilən ilk qonaqlar, Türkiyənin Azərbaycandakı səfirliyi­nin baş katibi Aygün Qocayeva, Azər­baycan parlamentinin millət vəkili, ta­rixçi, professor Musa Qasımlı Türkiyə və Azərbaycan arasında diplomatik əlaqələrdən Türkiyədə baş verən güclü zəlzələnin Azərbaycanda döv­lət və cəmiyyət tərəfindən necə həs­saslıqla qarşılanmasından, iki qardaş ölkənin sarsılmaz əlaqələrinin tarixi faktlara əsaslanmasından bəhs edib­lər. Türkiyədə yaşayan, gənc azər­baycanlı müğənni Elgün Quliyev isə Azərbaycan və Türkiyə haqqında ifa­ları ilə iki ölkənin qardaşlığını musiqi ilə dilə gətirib.

“Azərbaycan rüzgarı” proqra­mının tamaşaçı rəğbətinə səbəb olduğunu diqqətə çatdıran S.Ömər layihə ilə bağlı bunları deyib: “He­sab edirəm ki, bu layihə Türkiyədən dünyaya açılan pəncərədir və bu pəncərə vasitəsi ilə iki ölkə qardaş­lığının, müttəfiqliyinin ən yaxşı nü­munə kimi bütün dünyaya yayılma­sını istəyirəm. Odur ki, hər həftənin bazar günü dünya türklərini Türkiyə vaxtı ilə saat 18.30-da ekran başına dəvət edirəm”.

M.SULTANOVA,

Ankara