Bakı Slavyan Universitetinin konfrans salonunda devizi Nizami Gəncəvinin “Sirlər xəzinəsi” poemasından götürülmüş “Sən ki, Huma quşusan, şərəfli iş gör, əlbət!” hikməti olan “Huma quşu” Təhsilə Yardım Fondunun təqdimatı keçirilib. Mərasim iştirakçılarına mərhum Humay Quliyeva və onun xatirəsinə yaradılmış fondun fəaliyyəti, tərəfdaşları, layihələri və təqaüd proqramları barədə məlumat verilib, qonaqların sualları cavablandırılıb.

Bakı Slavyan Universitetinin rek­toru Anar Nağıyev fondun qayəsinin bəşəri və mənəvi dəyərlərə bağlı oldu­ğunu bildirib. O qeyd edib ki, fondun nəcib və xeyirxah məramı var. Humay Quliyevanın xatirəsinə yaradılan fon­dun məqsədi təhsilin, bilikli insanların yetişməsinə töhfə verməkdir. Rektor fond rəhbərliyinə universitetin tələ­bələri üçün də bu imkanı yaratdıqları­na görə öz təşəkkürünü bildirib.

“Huma quşu” Təhsilə Yardım Fon­dunun prezidenti Şəhla Vəzirova bil­dirib ki, qurum kommersiya məqsədi güdməyən qeyri-hökumət təşkilatıdır. Ailə üzvlərinin təşəbbüsü ilə yaradılan fondun maliyyə qaynağını Humayın beynəlxalq təşkilatlarda çalışdığı illər­də toplanmış vəsait təşkil edir. Fondun əsas məqsədi imkansız və aztəminatlı ailələrin istedad və bacarığı ilə seçilən övladlarının ölkəmizdə və Azərbayca­nın hüdudlarından kənarda keyfiyyətli bakalavr və magistr pilləsi üzrə təhsil almasına və cəmiyyət üçün fayda­lı insanlar, Humay kimi xeyirxah və vətənpərvər gənclər yetişməsinə ma­liyyə yardımı göstərməkdir. Bundan başqa, Fond Qarabağ müharibəsi qa­zilərinin müxtəlif kurslarda ixtisaslarını artırmağa və yeni ixtisaslara yiyələn­mələrinə maliyyə dəstəyi göstərəcək.

Xeyriyyəçilik fəaliyyəti üçün təh­sil sahəsinin seçilməsi isə Humayın sağlığında elmə, biliyə, kitaba, oxu­yub-öyrənməyə sonsuz məhəbbəti olmasıdır. Fondun təsisi zamanı onun halal zəhmətlə qazanılmış vəsaitinin bu istiqamətdə xərclənməsinin istək və arzularının məqsədəuyğun şəkildə həyata keçməsi, nəcib fəaliyyətinin özündən sonra da davam etdirilməsi ideyası əsas götürülüb.

“Huma quşu” Təhsilə Yardım Fon­dunun Himayəçilik Şurasının üzvü Leyla Tağızadə, fondun nümayəndəsi Səidə Abdullayeva və digər qonaqlar çıxış edərək Humayın qısa ömrün­də keçdiyi şərəfli həyat yolundan söz açıblar. Natiqlər fonda gələcək fəaliy­yətində uğurlar arzulayıblar. 

Mərasimdə Humay Quliyevanın həyatından bəhs edən videoçarx nü­mayiş olunub.

Elçin ABBASOV, “Xalq qəzeti”