Azərbaycan və Pakistan arasında ümumi maraqlara və qarşılıqlı dəstəyə əsaslanan strateji tərəfdaşlıq, qardaşlıq münasibətlərinin uzun tarixi var. Bu strateji münasibət siyasi, iqtisadi, hərbi və mədəni-humanitar sahələri əhatə edir. Yüksək səviyyəli müntəzəm səfərlər və müxtəlif sahələrdə əməkdaşlığın genişləndirilməsinə yönəlmiş mühüm sazişlərin imzalanması ilə möhkəmlənməkdə davam edir. Bu mənada Pakistanın Baş naziri Məhəmməd Şahbaz Şərifin son səfəri də ikitərəfli münasibətlərin inkişafı baxımdan xüsusi maraq doğurur.
Bu fikirləri Milli Məclisin deputatı, YAP İdarə Heyətinin üzvü Rəşad Mahmudov söyləyib.
O bildirib ki, səfər çərçivəsində imzalanmış sənədlər belə deməyə əsas verir ki, Azərbaycan və Pakistan çoxtərəfli əlaqələrin sürətlə inkişaf etməsində maraqlıdır.
Ümumiyyətlə, Azərbaycan Prezidenti İlham Əliyev Pakistanla əlaqələrin inkişafına xüsusi önəm verir və bu ölkənin ali siyasi rəhbərliyi ilə etimad münasibətlərini yüksək səviyyədə saxlayır. Bu, ölkələrimiz arasında ikitərəfli münasibətlərin inkişaf dinamikasına mühüm təkan verir və müxtəlif sahələrdə əməkdaşlığın genişləndirilməsində xüsusi rol oynayır. Bu da təsadüfi deyil, siyasi, hərbi, iqtisadi və mədəni sahələrdə ikitərəfli əlaqələrin möhkəmləndirilməsinə yönəlmiş fəal xarici siyasət yürüdən Bakı Pakistana Cənubi Asiya regionunda özünün əsas strateji tərəfdaşlarından biri kimi baxır.
İki ölkə beynəlxalq arenada birgə işləyir, müxtəlif qlobal və regional məsələlərdə bir-birini dəstəkləyir. Pakistan Qarabağ münaqişəsi ilə bağlı Azərbaycana davamlı dəstək göstərir, Azərbaycan da qardaş ölkəyə öz dəstəyini əsirgəmir. Qarşılıqlı dəstək Azərbaycan-Pakistan münasibətlərini möhkəmləndirir, strateji tərəfdaşlığın inkişafına töhfə verir. Bu fəal siyasətin nəticəsidir ki, bu gün Pakistan Azərbaycanın ən sadiq müttəfiqlərindən biri sayılır.
Bu əlaqələr həm də ticarət, iqtisadiyyat, enerji və hərbi əməkdaşlıq kimi sahələrdə əməkdaşlığın dərinləşdirilməsi üçün hər iki ölkənin imzaladığı bir çox anlaşma memorandumları ilə və sazişlərlə möhkəmlənir. Məsələn, birgə hərbi təlimlər və müdafiə sahəsində təcrübə mübadiləsi ölkələr arasında yüksək etimadı nümayiş etdirir.
Azərbaycan və Pakistan arasında tərəfdaşlıq bir neçə istiqamətdə regiona əhəmiyyətli təsir göstərir. Bu əməkdaşlıq regionda siyasi sabitliyin möhkəmlənməsinə töhfə verir. Hər iki ölkə BMT və İslam Əməkdaşlıq Təşkilatı kimi beynəlxalq təşkilatlarda bir-birini dəstəkləyir ki, bu da onların beynəlxalq aləmdə mövqelərinin möhkəmlənməsinə kömək edir.
Xatırlatmaq yerinə düşər ki, 1993-cü il aprelin 30-da BMT Təhlükəsizlik Şurasının iclasında Qarabağ münaqişəsi ilə bağlı 822 saylı qətnamənin qəbul edilməsi Pakistanın sədrliyi zamanı reallaşmışdı. Bundan başqa, işğal dövründə Ermənistanın bütün cəhdlərinə baxmayaraq, Pakistan İrəvandan Azərbaycanın işğal olunmuş ərazilərini azad etməyi hər zaman tələb etmişdi və məhz bu səbəbdən bu günə kimi onu bir dövlət kimi tanımır və onunla diplomatik əlaqələr qurmur.
Eyni zamanda, Azərbaycan və Pakistan arasında ticarət-iqtisadi əməkdaşlıq infrastruktur layihələrinin və enerji sektorunun inkişafına töhfə verir. Bu da öz növbəsində regionun iqtisadi yüksəlişinə və inkişafına təsir göstərir.
Birgə hərbi təlimlər və müdafiə sahəsində təcrübə mübadiləsi də regionda təhlükəsizliyi gücləndirir. Bu əməkdaşlıq hər iki ölkəyə öz müdafiə qabiliyyətini artırmağa, sülh və sabitliyi qorumağa kömək edir.
Bundan başqa, mədəniyyət və təhsil mübadiləsinin inkişafı Azərbaycan və Pakistan xalqları arasında dostluq əlaqələrini möhkəmləndirir. Bu, ölkələr arasında daha sıx əlaqələr və anlaşma yaratmağa kömək edir. Bu amillər regional təhlükəsizliyin möhkəmlənməsinə, iqtisadi inkişafa və siyasi sabitliyə töhfə verir ki, bu da bütün regiona müsbət təsir göstərir.
Bakı ilə İslamabad arasındakı münasibətlər iki xalq arasında tarixi, mədəni yaxınlığa və qarşılıqlı hörmətə əsaslanan əsl dostluğun nümunəsidir. Təsadüfi deyil ki, Pakistan Türkiyədən sonra Azərbaycanın müstəqilliyini tanıyan ikinci ölkədir. Azərbaycanın Pakistandakı siyasəti bütün əsas sahələrdə strateji tərəfdaşlığa və uzunmüddətli əməkdaşlığa yönəlmişdir.
Deputat yekunda qeyd edib ki, Qarabağ müharibəsi dönəmində küçələrə axışan xalqımız əllərində Azərbaycan, Türkiyə, Pakistan bayrağı qələbə sevincinin xoşbəxtliyini yaşayırdılar və bu da təsadüfi deyildi. Çünki Pakistan Azərbaycanın yanında oldu, öz siyasi və mənəvi dəstəyi ilə bizi böyük Zəfərə ruhlandırdı. Xalqımız bu qardaşlıq dəstəyini heç zaman unutmayacaq.
İftixarla qeyd etmək olar ki, möhkəm təməllər üzərində qurulan Azərbaycan - Pakistan qardaşlığı digər ölkələr üçün nümünədir. Cənab baş nazirin qeyd etdiyi kimi dostluğumuz, siyasi anlaşmamız, beynəlxalq səviyyədə düşüncə və hərəkət vəhdətimiz əfsanəvi olub. Bu əfsanəvi dostluq zirvəsinin yaranmasında Prezident İlham Əliyevin dosta sevgi, düşmənə güzəştsiz xarici siyasəti müstəsna əhəmiyyət kəsb edir. Bu gün Azərbaycan Pakistan münasibətləri dünya ölkələri üçün birlik və bərabərlik kontekstində qurulan əməkdaşlıq kimi dünyaya sülh çağırışıdır. Pakistan liderinin Bakı səfəri də bu çağırışın bir mesajı oldu.
