Azərbaycan Mətbuat Şurasının sədri Rəşad Məcid Rusiya Erməniləri İttifaqının bu ölkənin Prezidenti Vladimir Putinin Azərbaycana səfəri ilə bağlı müraciətini media üçün şərh edərək bildirib ki, bu anti-Azərbaycan aksiya erməni diasporunun fürsətçiliyini və avantüraya meyliyini bir daha aydın nümayiş etdirir. 

Açıqlamada göstərilir: “Görünür, quru­mun rəhbəri Ara Abramyan və onun yaxın ətrafı belə əsassız çağırışlarla Rusiya rəh­bərliyinin mövqeyinə təsir göstərəcəklərini və bu yolla Azərbaycanı öz mövqeyindən çəkinməyə məcbur edə biləcəklərini düşü­nürər. Bu faktın özü bir daha göstərir ki, erməni lobbi təşkilatları hansı ölkədə fəa­liyyət göstərmələrindən asılı olmayaraq, dünya erməniliyinin və Ermənistan döv­lətinin maraqlarını əsas götürür və həmin ölkənin rəsmi siyasətinə təsir göstərməyə çalışırlar. Bir çox hallarda irəli sürülən tələblər həmin ölkələrin milli maraqları ilə tam ziddiyyət təşkil edir və ikitərəfli müna­sibətlərin zədələnməsinə, hətta pozulması­na gətirib çıxarır”. 

Erməni lobbisinin maraqlarının ifa­dəçisinə çevrilmiş Fransanı və onun pre­zidenti Emmanuel Makronu bədnam nü­munə kimi xatırladan AMŞ sədri qeyd edir ki, məhz Fransa rəhbərinin əsassız iddialarının, ermənipərəst siyasətinin və beynəlxalq hüquq normalarına hörmətsiz münasibətinin nəticəsidir ki, vaxtilə inki­şaf edən Fransa–Azərbaycan əlaqələri bu gün tarixinin ən acınacaqlı dövrünü ya­şayır: “İndi isə Ara Abramyan, Marqarita Simonyan, Aram Qabrielyanov və bu kimi digər erməni diaspor rəhbərləri və fəalları zənn edirlər ki, analoji ssenarini Rusiyada təkrarlayaraq rəsmi Moskvanı Azərbaycanla təzyiq və tələb dili ilə danışmağa məcbur edə bilərlər”.

Açıqlamanın davamında deyilir ki, Rusiya illərlə Ermənistana hərtərəfli dəstək göstərməsinə baxmayaraq, bu gün Nikol Paşinyanın hökuməti Qərblə yaxın­laşmaq və rəsmi Moskva ilə əlaqələrini kəsmək yolunu tutub: “Bu riyakarlıq fo­nunda Rusiya rəhbərliyinin, ələlxüsus da Vladimir Putin kimi nüfuzlu siyasətçinin erməni lobbisinin istək və arzularına uyğun şəkildə dost ölkələrlə münasibətlərə xələl gətirəcək addımlar atacağını gözləmək yal­nız primitivliyin və sadəlövhlüyün əlaməti ola bilər. Artıq Rusiyanın rəsmi dairələ­ri, siyasətçiləri, tanınmış ictimaiyyət nü­mayəndələri də yaxşı bilirlər ki, nə Ermə­nistana, nə də onun maraqlarının ifadəçisi olan erməni lobbisinə inanmaq, bel bağla­maq olmaz”.

Media qurumu rəhbəri sonda onu da bildirir ki, Prezident Vladimir Putinin Azərbaycana dövlət səfəri proqramının zənginliyi, səfər çərçivəsində Prezident İlham Əliyevlə apardığı müzakirələr, səs­ləndirdiyi fikirlər Azərbaycan–Rusiya mü­nasibətlərinin bu gün yüksək səviyyədə olduğunu göstərir: “Buna görə də erməni lobbisi pozucu əməllərini davam etdirmək və müxtəlif avantüralarla öz naqis məqsəd­lərinə nail olmaq yolundan çəkinməli, bu­nunla Azərbaycanın dünyadakı nüfuzuna, ayrı-ayrı ölkələrlə, o cümlədən də Rusiya ilə münasibətlərinə xələl gətirə bilməyəcə­yini anlamalıdır”.

XQ