Nyu-York Məhkəməsi uzun sürən araşdırmalardan sonra, nəhayət, amerikalı ermənipərəst senator Bob Menendezlə bağlı qərarını açıqlayıb. Məhkəmə heyəti Nyu-Cersi ştatından Demokratlar Partiyasının Senatdakı təmsilçisini ABŞ Cinayət Məcəlləsinin nə az, nə çox, 16 maddəsi üzrə təqsirli sayıb. Prokurorlar sübuta yetiriblər ki, bu “məşhur” senator Misirin hərbi maraqlarına xidmət edib, cinayət təqiblərinə müdaxiləyə, eləcə də Qətər rəsmilərinin sərmayələrinin təhlükəsizliyini təmin etmək üçün səlahiyyətlərindən sui-istifadə hallarına yol verib. İddialara əsasən, Bob Menendez və onun erməni əsilli həyat yoldaşı bu “fəaliyyətləri” müqabilində qızıl külçələr, zinyət əşyaları, yüz minlərlə dollar nağd pul, bahalı avtomobillər və digər formada rüşvəti rahatca mənimsəyiblər.
Bundan əvvəlki məhkəmə prosesində senatorun həyat yoldaşı, erməni əsilli Nadine Arslanyanın da adı keçirdi. Fəqət, onun məhkəməsi “qəfil xəstələnməsi” səbəbindən hakim tərəfindən qeyri-müəyyən müddətə təxirə salınmışdı. Yəni, Nadinenin “xəstəliyi” ilə bağlı quraşdırdığı “tamaşa” onun və ərinin həbsxanaya aparan yolunu müvəqqəti olaraq uzatmışdı. Amma “tamaşanın” ikinci pərdəsi mütləq oynanılmalı idi.
Nyu-York Məhkəməsi sübuta yetirib ki, Bob Menendezlə yanaşı, Nyu-Cersi ştatından olan iş adamları Vael Hana və Fred Daybes də dövlətin yox, şübhəli qrupların maraqlarına xidmət ediblər. Onlar hətta Ağ evin xarici siyasətinə təsir göstərməyə çalışıblar.
Yada salaq ki, ABŞ Senatının xarici əlaqələr komitəsinin rəhbəri vəzifəsindən kənarlaşdırılan Menendez ermənipərəst fəaliyyətini Konqresin yuxarı palatasında davam etdirirdi. Yeri gəlmişkən, bir maraqlı faktı da oxucuların diqqətinə çatdıraq ki, 2006-cı ildən Nyu-Cersi ştatının senatoru olan Bob Menendez federal agent kimi müttəhimlər kürsüsünə oturdulan ilk senatordur. Ümumiyyətlə, son 20 ildə Senatın bu ermənipərəst, rüşvətxor üzvünə qarşı məhkəmə ikinci dəfədir ki, korrupsiya ittihamı ilə cinayət işi qaldırır. Bundan əvvəlki məhkəmə prosesi həm Nadine Arslanyanın “xəstəliyi”, həm də andlı hakimlərin yekdil hökm çıxara bilməməsi üzündən yarımçıq qalmışdı.
ABŞ-dakı erməni lobbisinin dəstəklədiyi, ölkəmizə qarşı düşmən mövqeyi ilə tanınan Bob Menendezi məhkəmə rüşvətxorluq, fırıldaqçılıq, xarici agent kimi fəaliyyət göstərmək, Femidaya maneçilik törətmək və elektron əlaqə vasitələri ilə dələduzluq daxil olmaqla 16 ittiham üzrə təqsirli bilib. Onu 20 ilə yaxın həbs cəzası gözləyir.
Hay sevgilisi Nadine Arslanyandan təkcə rüşvətxorluğu deyil, həm də həyasızlığı əxz etmiş senator bu ilin iyununda Nyu-Cersi ştatından müstəqil namizəd kimi Senata yeni seçkilərdə iştirak etmək barədə müraciət edibmiş. Əslində, “Haykanuşun” toruna düşmüş ispan əsilli başabəla hüquqşünasın qollarının qandallanmasını onun Bakıya qarşı məkrli planlarının Femida tərəfindən ifşa edilməsi faktı kimi də qəbul edə bilərik. İntəhası, bu ifşa bir qədər vaxt apardı və “iki pərdədən ibarət tamaşa” ilə müşayiət olundu. Hamının maraqla izlədiyi bu tamaşanın acı sonluğu, bədbin epiloqu ən çox amerikalı erməniləri “sarsıdıb”.
Bəli, bu adamlar çörəyini yedikləri “supergücün” milli mənafeyini yox, işğalçı Ermənistanın maraqlarını əsas götürüblər. Tarixin arxivinə göndərdiyimiz Qarabağ münaqişəsi dönəmində “demokratiya, insan hüquqları” bəhanəsi ilə Azərbaycana qarşı qəbul edilən bütün qərarların mahiyyətini məhz ermənilərin maraqlarının qorunması siyasəti təşkil edirdi. Bob Menendez Bakıya qarşı məkrli planların icrası prosesində daim fəal iştirakçı olub. Misal üçün, o, Senatın xarici əlaqələr komitəsinin sədri kimi Xankəndidən çıxmağa tələsməyən separatçı–xunta rejiminin müdafiəsi üçün bütün üsullardan istifadə edir, hətta ABŞ Dövlət Departamentinin rəhbərliyi ilə mübahisəyə girişirdi. Elə o zaman Menendezin və hayların “təəssübünü çəkən” digər senatorların Kaliforniyadakı erməni diasporundan böyük məbləğdə “ənam” aldıqları çoxlarına məlum idi. İndi məhkəmənin menendezlərə qarşı irəli sürdüyü bütün ittihamların təsdiqlənməsi həm də deyilənlərin həqiqət olduğunun sübutudur.
Beləliklə, ABŞ Femidası tarixində növbəti qalmaqallı prosesə – “menendezqeyt”ə nöqtə qoyuldu və erməni lobbisi bu dəfə də pərdə arxasında qaldı...
İ.HƏSƏNQALA
XQ
