Yaxud rəsmi İrəvanın 5 aprel Brüssel görüşünə bağladığı qurtuluş ümidləri
Fransanın şübhəli oriyentasiyalı xarici işlər naziri Stefan Sejurne Parisdə ABŞ Dövlət katibi Antoni Blinkenlə birgə mətbuat konfransında əlinə düşən fürsətdən yararlanaraq, Azərbaycan əleyhinə təbliğat aparmağa girişib. Ermənistanın “ərazi bütövlüyünə” Azərbaycan tərəfindən “təhdidlərin olduğunu” iddia edən müsyö Sejurne bununla da kifayətlənməyib, guya, “Ermənistanın regionda münaqişənin qarşısını almağa çalışan “yeganə tərəf” olduğunu, “Azərbaycanın isə eskalasiyaya görə məsuliyyəti Ermənistanın daşıyacağı barədə “yalançı təbliğat” apardığını izhar edib.
Paris Bakının mövqeyindən niyə narahatdır?
Fransanın başı hər cür “macəralara” öyrəncəli xarici işlər naziri ölkəsinin Ermənistanı silahlandıraraq, yeni müharibəyə sürüklədiyini görməzdən gələrək, Bakının sadəcə ritorikasından əndişələndiyini deyib. Elementar məntiqlə 30 il ərzində Azərbaycanın beynəlxalq səviyyədə tanınmış ərazisini işğal altında saxlayan Ermənistanın ünvanına bir dəfə də olsun irad səsləndirməyən Yelisey sarayının müvəqqəti yiyələrinin durub ölkəmizi hayları “təhdiddə” ittiham etməsi siyasi şantajdan başqa bir şey deyil. Axı, ortalıqda, faktiki olaraq, işğalı, təhdidi nişan verən heç nə yoxdur. Bunun tam əksinə olaraq, Azərbaycanın suveren ərazisinə aid 8 kəndi Ermənistan hələ də işğal altında saxlayır. Gözə girən bu hüquqi-siyasi reallığa toxunmayan Sejurnenin mətbuat konfransında növbəti açıqlamasına diqqət yetirin: “Biz bu gün Azərbaycan tərəfindən mübahisələndirilən Ermənistanın ərazi bütövlüyü barədə danışdıq və icazə verin deyim ki, Azərbaycanın ritorikasının getdikcə nəzarətdən çıxdığını nəzərə alaraq, bundan çox narahatıq”.
Müsyö Sejurne Ermənistanın son günlər Azərbaycanla şərti sərhədə hərbçi və zirehli texnika daşımasını özündə əks etdirən videogörüntüləri, eləcə də Aİ mülki missiyası ilə müştərək sərhədboyu yerləşdirməyə çalışdığı kəşfiyyat qüllələrini “görməzdən gələrək”, bütün bu əşyayi-dəlilləri həyasızcasına Bakının “feyk xəbərləri” kimi ictimaiyyətə təqdim edir. Belə məlum olur ki, “regionda münaqişənin qarşısını almağa çalışan “yeganə tərəf” kimi “sülhsevər” Ermənistana yüz milyonlarla dəyəri olan zirehli texnika, HHM sistemləri satan, müdafiə nazirini İrəvana göndərən, burada hərbi-texniki əməkdaşlığa dair sazişlər imzalayan Paris, sən demə, bütün bunları Azərbaycanın təhdidinə qarşı həyata keçirirmiş.
Bu, həmin müsyö Sejurnedir ki, bir müddət bundan əvvəl “Ouest France” nəşrinə müsahibəsində Rusiyanın yaxın illərdə NATO ərazisinə hücumunu istisna etmədiyini söyləmiş, Avropa İttifaqını Fransadan nümunə götürməyə və hərbi proqramlarına ayırdıqları maliyyəni iki dəfə çoxaltmağa çağırmışdı. Bunu “ekzistensial məsələ” adlandıran nazir Avropanın özünün təhlükəsizliyinə “təminat tapmalı” olduğunu bəyan etmişdi.
COP29-un ev sahibinə qarşı qısqanclıq
Fransanın xarici işlər naziri çıxışında maniakal təxəyyülünü işə salaraq, Bakının “hərbi xarakterli feyk-xəbərlərində” Rusiyanın Ukraynaya bağlamağa çalışdığı bir çox ümumi elementləri görə bildiyini irəli sürür. Bununla da açıq siyasi şantaja baş vuran Sejurne bu “fakta” Bakıda keçirələcək COP29-a altı ay qalmış “xüsusi diqqət yetirməyin vacibliyini” önə çəkib. Ermənistanın “böyük bacısı” missiyasını bütün müstəvilərdə yerinə yetirən Fransanın Azərbaycanın COP29-a evsahibliyi etməsinə qısqanc yanaşması, bu reallığı həzm edə bilməməsi, ənənəvi böhtan və yalan kampaniyasını indi də şantajla əvəzləməsi göz qabağındadır.
“Ermənistanın geniş şəkildə silahlanmasını həyata keçirən, bölgədə militarizmi təşviq edən Fransa tərəfinin Azərbaycanı aqressiv ritorikada təqsirləndirməsi qəbuledilməzdir. Aprelin 2-də Fransanın xarici işlər naziri Stefan Sejurnenin Parisdə ABŞ Dövlət katibi Antoni Blinkenlə birgə mətbuat konfransında Azərbaycana qarşı səsləndirdiyi əsassız iddialar növbəti dəfə Fransanın bölgədə açıq-aşkar gərginlik yaratmaq və sülh prosesinə mane olmaq səylərinin bariz nümunəsidir”.
Stefan Sejurnenin mətbuat konfransında Azərbaycana qarşı səsləndirdiyi iddiaları şərh edən Azərbaycanın Xarici İşlər Nazirliyinin mətbuat katibi Ayxan Hacızadə deyib ki, Azərbaycan ərazilərini 30 ilə yaxın müddətdə işğal altında saxlayan, 1 milyona yaxın azərbaycanlını öz doğma torpaqlarından didərgin salan, kütləvi qırğınlar və insanlıq əleyhinə cinayətlər törədən Ermənistanın Fransa tərəfindən “sülhpərvər ölkə” kimi təqdim edilməsi Parisin həm vasitəçiliyi dövründə, həm də 44 günlük Vətən müharibəsindən sonra yürütdüyü siyasətin nə qədər saxta olduğunu göstərir.
Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) evsahibliyi kimi məsul vəzifəni yerinə yetirdiyi bir dönəmdə ölkəmizin imicinə xələl gətirmək məqsədi güdən və sədrliyimizi hədəfə alan bu kimi çağırışlardan çəkinməsinin Fransa və dünyamız üçün daha faydalı olacağını hesab edən XİN rəsmisi şərhində məhz Fransa kimi ölkələrin Ermənistanın təcavüzünü ört-basdır edən siyasətinin heç bir fayda vermədiyinin hər kəsə aydın olduğunu vurğulayıb: “Rəsmi Paris anlamalıdır ki, onun tərəfindən həyata keçirilən bu kimi destruktiv fəaliyyətə nə qədər ki, son qoyulmayıb, bu, həm Fransanın zədələnmiş imicinə, həm də hər vəchlə müdafiə etdiyi Ermənistana xeyir gətirməyəcək”.
İrəvanın Brüssel gözləntiləri
Bu arada rəsmi İrəvanın böyük ümidlər bəslədiyi, nəinki hakimiyyəti, hətta ölkəni böhrandan qurtaracağı kimi düşünülən 5 aprel Brüssel görüşü ətrafında Ermənistanın daxilində geniş diskussiya gedir. Mövzu ilə bağlı yerli “Hraparak” qəzeti yazır ki, Ermənistanın baş naziri Nikol Paşinyanın aprelin 5-də Brüsseldə qatılacaq “üçlər”in görüşünə hakim “Mülki Müqavilə” partiyasının deputatları böyük ümid bəsləyirlər. Bu görüşün ölkənin və hakimiyyətin qüdrətinin xilası üçün müstəsna əhəmiyyət kəsb edən hadisə olacağına işarə vuran nəşr mövzunu bir qədər də genişləndirərək yazır: “Bu, Ermənistanın sonda hansı səmtə gedəcəyini müəyyən edəcək görüşdür. Əgər Qərb ümumi “dəstək” bəyanatları ilə yanaşı, əməli addımlar atsa, Ermənistana külli miqdarda pul ayırsa və bunun sayəsində Rusiya iqtisadiyyatından qurtulmaq mümkün olarsa, Paşinyan iqtidarı tərəddüd etmədən təhlükəsizlik vektorunun səmtini dəyişməyi öhdəsinə götürəcək. Burada söhbət bir neçə milyard ABŞ dollarından gedir”.
İrəvanın və Parisin Azərbaycana qarşı bütün bu diplomatik yürüşlərinin Blinken–Lyayen–Paşinyan üçlüyünün 5 aprel Brüssel görüşü ərəfəsində müşahidə olunması təsadüfi sayıla bilməz. Ermənistana birbaşa dəstək nümayişi kimi düşünülmüş, xüsusu yardım paktının imzalanacağının gözlənildiyi sabahkı görüşlə bağlı Vaşinqtondan da müəyyən çağırışlar eşidilməkdədir.
Bu arada Vaşinqton Ermənistan və Azərbaycan arasında düşmənçiliyə səbəb ola biləcək ritorikadan çəkinmək barədə tərəflərə xəbərdarlıq ünvanlayıb. “Biz Ermənistan və Azərbaycan sərhədində eskalasiyaya və hərbi əməliyyatlara səbəb ola biləcək ritorikaya qarşı xəbərdarlıq edirik və bunu bundan sonra da edəcəyik”. Bu sözləri ABŞ Dövlət Departamentinin sözçüsü Metyu Miller ənənəvi brifinqdə bildirib. “Biz regionda hamının hüquqlarına hörmət edilən ədalətli və layiqli sülh üçün şəraitin yaradılmasını təşviq edirik” – deyən Millerin sözlərinə görə, davamlı sülhün təminatının yeganə yolu danışıqlardır.
“Ədalətli və layiqli sülh”dən danışan Ağ Ev rəsmisi Ermənistanın şərti sərhədə canlı qüvvə və hərbi texnika cəmləməsi ilə bağlı Azərbaycan hökumətinin bəyanatından da söz açıb. “Avropa İttifaqının missiyası bəyanat yayıb ki, Ermənistan–Azərbaycan sərhədi sakit və sabitdir və qeyri-adi hərbi hərəkətlər müşahidə olunmur”, – deyə Miller bildirib.
Vaşinqton artıq Aİ-nin Ermənistanda kəşfiyyat fəaliyyəti ilə məşğul olan “mülki missiyasının” açıqlamalarını güvəndiyi, İrəvandan isə Cənubi Qafqazdan uzaqlaşdırmağa çalışdığı Rusiyaya və İrana qarşı maşa kimi yararlanmağa çalışdığı gerçəklikdir. Amma Ağ Evin bu kimi cəhdlərə baş vurarkən hesablaşmağa məcbur olduğu başqa bir gerçəklik də var. Bu, altı ay əvvəl bölgədə hərbi-siyasi, eləcə də iqtisadi-coğrafi cəhətdən qüvvələr nisbətini öz xeyrinə tamamilə dəyişərək söz və güc sahibinə çevrilmiş Azərbaycanın ortaya qoyduğu gerçəklikdir!
Rasim MUSABƏYOV,
Milli Məclisin deputatı, politoloq
Fransa Azərbaycana qarşı özünün ənənəvi münasibətini nümayiş etdirir. İndi onlar tamam azğınlaşıblar. Amma, şükürlər olsun ki, əllərindən Azərbaycana pislik etmək deyil, ancaq çığır-bağır etmək gəlir. Guya, Fransa COP29-u boykot edə bilər. Qoy eləsin, məgər onları Bakıda gözləyən var? Parisdən möhtəşəm tədbirimizə nümayəndələrin gəlməməsi diqqət yetirilməli məsələ sayıla bilməz. Özlərinin keçirməyə hazırlaşdıqları olimpiada ilə bağlı canlarına vəlvələ düşüb. Yəni, xoşagəlməz hadisələrin baş verə biləcəyindən və bunun qarşısını ala biləcəkləri ilə bağlı ciddi narahatlıqları var. Getsinlər bu barədə ciddi fikirləşsinlər.
Fransanın ölkəmizə qarşı ənənəvi mövqeyi dəyişməyib. Biz, sadəcə, bunu bir fakt olaraq qeydə almışıq və onların Azərbaycana zərər verməyə əlləri çatdığı hər yerdə adekvat cavablarını alırlar. Yaxşısı budur, Sakit okeandakı Yeni Kaledoniya ada-dövlətinin problemini həll eləsin. Onun neokolonializmə söykənən yaramaz siyasətinə qarşı Korsikada da kütləvi etirazlar başlayıb. Orada əhaliyə öz dilində danışmağa imkan verməyən Fransa gəlib Azərbaycanın qarşısında hansısa hüquqlardan bəhs edir, Qarabağ erməniləri üçün “göz yaşları tökür”. Bəli, bu gün Emmanuel Makron hakimiyyəti Azərbaycana qarşı düşmənçilik siyasəti yeridir. Bakının da buna uyğun davranışını görür. Mövcud reallıq bundan ibarətdir və biz bunu nəzərə almalıyıq.
İmran BƏDİRXANLI
XQ