Otuz iki il əvvəl baş vermiş Xocalı soyqırımını anmaq, qardaşlarımızın kədərlərini paylaşdığımızı yenidən ifadə etmək, günahkarların cəzalandırılması məsələsinə diqqəti çəkmək istəyirəm. Xocalı qətliamı günahkarlarının cəzalandırılmaması nəticəsində dünyada soyqırımlar indi də davam edir.

AZƏRTAC xəbər verir ki, bu sözləri TÜRKPA-nın Hüquq məsələləri və beynəlxalq əlaqələr komissiyasının sədri, Türkiyə Böyük Millət Məclisinin deputatı Osman Mesten Bakıda keçirilən TÜRKPA-nın Hüquq məsələləri və beynəlxalq əlaqələr komissiyasının 11-ci iclasında deyib.

“Otuz iki il əvvəl Xocalıda insanları, sadəcə, türk olduqları üçün qətlə yetirən canilərin cəzalandırılmasını tələb edirik. O gün Xocalıdakı görüntülər yayımlanmasına baxmayaraq, bütün dünya kar və kor oldu. Qardaş Azərbaycan xalqının məruz qaldığı bu haqsızlıq və zülm Qarabağ Zəfəri ilə bir az yumşalıb. Qarabağ Zəfəri bütün Türk dünyası üçün Qələbə olub”, - deyə Osman Mesten əlavə edib.