Azərbaycan Respublikasının Keniya Respublikasında fövqəladə və səlahiyyətli səfiri Sultan Hacıyev bu ölkənin Baş naziri və eyni zamanda, xarici işlər və diaspora naziri Musalia Mudavadi ilə görüşüb.
Səfirlikdən bildirilib ki, səfir görüşdə Azərbaycan ərazilərinin 30 illik işğaldan azad edilməsi nəticəsi olaraq regionda sülh və əməkdaşlıqda unikal fürsətin yaranması, bu fürsətdən istifadə edilməsi üçün Azərbaycan tərəfinin səyləri haqqında məlumat verib. Bu xüsusda, minatəmizləmə proseslərinin bərpa və yenidənqurma işlərinə mənfi təsiri xüsusilə qeyd edilib.
Görüşdə iki ölkə arasındakı mövcud əməkdaşlıq gündəliyi və onun müxtəlif istiqamətlərdə inkişaf perspektivləri müzakirə olunub. Həmçinin 2024-cü ildə Keniya və Azərbaycan arasında diplomatik münasibətlərin qurulmasının 20 illiyinin qeyd edilməsinin iki dost ölkənin əməkdaşlığının daha da möhkəmlənməsinə müsbət töhfə verəcəyi qeyd edilib.
Azərbaycan və Keniya arasında həm işgüzar, həm də turizm məqsədli səfərlərin təşkili, bunun üçün müvafiq inzibati məsələlərin həllinin vacibliyi vurğulanıb.
Baş nazir M.Mudavadi və səfir S.Hacıyev Keniya və Azərbaycan münasibətlərinin inkişaf perspektivləri barədə fikir mübadiləsi aparıblar. Dinamik inkişaf edən əlaqələrin daha da genişlənməsi üçün informasiya və kommunikasiya texnologiyaları, enerji, turizm, investisiya, kiçik və orta biznesin əməkdaşlığı, ticarət, mədəniyyət, idman və digər sahələrdə böyük potensialın mövcud olduğu bildirilib.
Görüş zamanı digər qarşılıqlı maraq doğuran məsələlər müzakirə edilib.
