Sabah qardaş ölkə Cümhuriyyətin 100 yaşını qeyd edəcək

Dünya tarixində elə qüdrətli xalqlar və millətlər var ki, onlar tarixin müxtəlif mərhələlərində bəşəriyyəti irəli aparan yüksək sivilizasiyalar yarada biliblər. Amma bu, cəmi bir neçə millətə nəsib olub. Tarixdə belə toplumlardan biri qədim və şanlı tarixi olan Türkiyə dövləti və xalqıdır. 

Təqribən min illik dövlətçilik təcrübəsi olan Türkiyə dünyanın orta və yeni əsrlər tarixində təmsil olunduğu böyük bir coğ­rafi məkanda iqtisadi, mədəni, mənəvi inkişafın üstün istiqamətlərini müəyyən edən, öz dövrünə görə mütərəqqi sayılan idarəçilik sistemi yarada bilib. Bu zaman hər şeyin fövqündə, ilk növbədə milli əx­laqla bərabər, bəşəri və humanist dəyər­lər dayanıb. 

Bu gün dünyanın ən ünlü alim və si­yasətçiləri etiraf edirlər ki, Anadoludan qərbə – Balkanlara və əks istiqamət­də Yaxın və Orta Şərqə doğru geniş bir ərazini tutan Osmanlı dövləti özündən əvvəlki imperiyalardan fərqli olaraq nə­zarətində olan torpaqları yağmalamaq niyyətində olmayıb, əksinə, onların mə­dəni inkişafının və təhlükəsizliyinin qay­ğısına qalmağa çalışıb. 

Biz burada Osmanlını ideallaşdır­maq niyyətindən tam uzağıq, amma onun müsbət cəhətlərini danmaq, inkar etmək mümkün deyil. Konkret misal çək­mək olar. Yəhudilər və ərəblər beş yüz il Osmanlı hakimiyyəti altında olduqları zaman bir dəfə də olsun etnik zəmində vuruşmayıblar. Belə faktlar onlarcadır. 

Türk xalqının xoşbəxtliyi həm də ondadır ki, XX əsrin əvvəllərində, yəni yeni tarixin ən kritik dönəmində Osman­lı özünün keçmişinə ehtiram, gələcəyə inam bəsləyərək imperiya iddialarından əl çəkdi, müasir dövrün çağırışlarına uy­ğun sivil, demokratik dövlətini qura bildi. Qəhrəman və ulu türk xalqı milli istiqlalını qoruyub saxlamaq üçün möhtəşəm Ça­naqqala (1915), Meydan (1922) savaşla­rını qazandı. 

XX əsrin görkəmli dövlət xadimlərin­dən olan Mustafa Kamal Atatürkün və onun fədakar əqidə və silah yoldaşlarının titanik səyləri sayəsində qurub yaradılan müasir Türkiyə artıq bir əsrdir ki, dünya­nın ən sivil və demokratik dövlətlərindən biri sayılır. Bəli, cəmi bir gündən sonra, oktyabrın 29-da Türkiyə Cümhuriyyətinin yaranmasının 100 ili tamam olur. Bu, bü­tün türk dünyası üçün sonsuz qürur mən­bəyi olan bir tarixdir. 

Qeyd etmək lazımdır ki, 1991-ci il ok­tyabrın 18-də öz milli suverenliyini bərpa etdikdən sonra ölkəmizi ilk tanıyan xarici dövlət məhz qardaş Türkiyə olmuşdur. AMEA-nın Tarix İnstitutunun Beynəlxalq əlaqələr tarixi şöbəsinin müdiri, tarix elm­ləri doktoru, professor Tofiq Mustafazadə fəxrlə vurğuladı ki, son otuz ildə Azərbay­can–Türkiyə əlaqələri hərtərəfli inkişaf yolu qət edərək olduqca yüksək səviy­yəyə çatmışdır. 

Professor, həmçinin bildirdi ki. hazır­da dünyada ikinci elə bir iki dövlət tapmaq olmaz ki, Azərbaycan ilə Türkiyə qədər bir-biri ilə bu qədər dost, yaxın və qardaş olsun. 44 günlük şanlı Vətən müharibə­sində Türkiyə dövləti və xalqı daim yanı­mızda olmuşdur. Qədirbilən Azərbaycan xalqı bunu heç vaxt unutmayacaq. 

Xoşbəxtlikdən bu gün xalqlarımızın sevimli liderləri cənab İlham Əliyevin və sayın Rəcəb Tayyib Ərdoğanın müdrik rəhbərliyilə Azərbaycan və Türkiyə döv­lətləri arasındakı sıx əməkdaşlıq bütün istiqamətlər üzrə güclənir və möhkəmlə­nir. Heç bir qüvvə bizim qardaşlığımıza xələl gətirə bilməz. Axı biz birlikdə güc­lüyük! 

Məsaim ABDULLAYEV
XQ