Parlamentin iclasında bu barədə geniş müzakirə aparıldı
Dünən Sahibə Qafarovanın sədrliyi ilə Milli Məclisin payız sessiyasının növbəti plenar iclası keçirildi. Sədr iclasın ölkəmizin və xalqımızın həyatında dönüş yaradan tarixi bir gün ərəfəsində keçirildiyini bildirdi. Dedi ki, oktyabrın 18-də Müstəqilliyin Bərpası Gününü qeyd edəcəyik. Diqqətə çatdırdı ki, son yüz ildən artıq dövrdə Azərbaycan xalqı siyasi müstəqillik imkanına iki dəfə nail olmuşdur. 1918-ci il mayın 28-də qurulmuş Azərbaycan Xalq Cümhuriyyəti cəmi 23 ay yaşaya bilmişdir.
1991-ci il oktyabrın 18-də müstəqilliyini bərpa edən dövlətimiz üçün də, əslində, eyni tale yazılmışdı. O zaman hakimiyyətə gəlmiş iqtidar cəmi bir il ərzində Azərbaycanı siyasi, iqtisadi və hərbi böhran vəziyyətinə salmışdı. Ölkə vətəndaş müharibəsi və dağılmaq həddinə gəlib çıxmışdı. Müstəqil Azərbaycan dövlətinin iflasa uğramaq təhlükəsi yaranmışdı. Lakin taleyin hökmü ilə bu dəfə Heydər Əliyev fenomeni dövlət müstəqilliyinin itirilməsinə yol vermədi. 1993-cü il iyunun 15-də ali dövlət rəhbərliyinə qayıdan Ümummilli lider qüdrətli zəkası və müdrikliyi, yenilməz iradəsi və qətiyyəti sayəsində Azərbaycanın siyasi varlığını qoruyub saxlaya bildi.
Parlamentin Sədri Ulu öndərin anadan olmasının 100 illiyi münasibəti ilə bu il mayın 16-da və iyunun 14-də Milli Məclisin xüsusi iclaslarının keçirildiyini xatırlatdı və bugünkü müasir Azərbaycanın Heydər Əliyevin xalq və Vətən naminə fədakarlığının parlaq nişanəsi olduğunu bildirdi.
Ümummilli liderin inkişaf strategiyasını yeni çağırışlar şəraitində yaradıcı surətdə davam etdirən möhtərəm Prezident İlham Əliyevin daxili və xarici siyasəti ölkəmizə heyrətamiz uğurlar qazandırmışdır. Milli Məclisin oktyabrın 12-də keçirilən xüsusi iclasında da vurğulandığı kimi, cənab İlham Əliyevin ölkəmizə rəhbərlik etdiyi 20 il ərzində Azərbaycan dünyanın ən dinamik inkişaf edən dövlətləri sırasına çıxmışdır. Cəmiyyət və dövlət həyatının bütün sahələrində yeniləşmə və yüksəliş dövrü yaşanmışdır. Dövlət idarəçiliyi sistemi təkmilləşdirilmiş, Birinci vitse-prezidentlik institutu təsis edilmişdir. Möhtərəm cənab Prezidentin ən yaxın silahdaşı olan görkəmli siyasi və dövlət xadimi Mehriban xanım Əliyeva bu məsul və şərəfli vəzifəni layiqincə yerinə yetirir.
Sahibə xanım oktyabrın 15-də cənab İlham Əliyevin Xankəndi, Ağdərə, Xocavənd, Xocalı şəhərlərində, Əsgəran qəsəbəsində Dövlət Bayrağını ucaltmasını xatırlatdı və dedi ki, xalqımız bu unudulmaz hadisəni böyük qürurla izlədi. Üç il öncə eyni duyğuları Şuşada, Laçında, Ağdamda, Kəlbəcərdə və digər şəhərlərdə bayrağımız yüksələrkən yaşadığımızı vurğuladı.
Möhtərəm Prezidentin Xankəndi şəhərində etdiyi proqram xarakterli çıxışından danışan parlamentin rəhbəri bunu dövlət başçısının ulu öndər Heydər Əliyev və xalqımız qarşısında bir növ hesabatı adlandırdı. Cənab Prezidentin rəhbərliyi ilə 20 il ərzində görülən işlər Azərbaycanın iqtisadi, siyasi və hərbi potensialının artırılmasına, torpaqlarımızın işğaldan azad edilməsinə, xalqımızın firavan həyatının qurulmasına yönəlmişdir. Həyata keçirilən dövlət siyasəti milli maraqlarımızın qorunmasını və irəli aparılmasını təmin etmişdir. Düşmən üzərində qazanılan möhtəşəm qələbə Ulu öndərin 100 illik yubileyinə ən böyük töhfə olmuşdur. Prezidentin qaldırdığı Dövlət Bayrağı bu qədim diyarımızda əbədi dalğalanacaqdır.
Sonra Milli Məclis Müstəqilliyin Bərpası Günü münasibəti ilə Prezident İlham Əliyevə və Birinci vitse-prezident Mehriban xanım Əliyevaya təbrik məktubları ünvanlamağı qərara aldı.
S.Qafarova üç il öncə bu gün erməni silahlı birləşmələrinin Gəncə şəhərinin mərkəzini qadağan olunmuş silahlar, o cümlədən ballistik raketlər ilə atəşə tutduğunu, nəticədə, 15 nəfər dinc sakinin həyatını itirdiyini 79 mülki şəxsin isə yaralandığını xatırlatdı. Gəncə şəhərində, eləcə də Azərbaycanın digər yaşayış məntəqələrində erməni terroru nəticəsində həlak olmuş dinc sakinlərin xatirəsi anıldı.
Cari məsələlərin müzakirəsi zamanı deputatlar dövlət başçımızın Xankəndiyə və digər ərazilərimizə səfərindən söhbət açdılar. Qeyd edildi ki, 15 oktyabr 2023-cü il tarixi ədalət təntənəsinin rəmzi olmaqla, Azərbaycan xalqının yaddaşına əbədi həkk olunacaq. Məhz bu tarixdə Azərbaycan Respublikasının Prezidenti, müzəffər Ali Baş Komandan İlham Əliyev ölkəmizə rəhbər seçilməsinin 20-ci ildönümündə Xankəndidə, Xocalıda, Ağdərədə, Xocavənddə, Əsgəranda və Sərsəng su anbarının ərazisində Dövlət Bayrağımızı qaldırmaqla Azərbaycan xalqının çoxillik əzablarına, iztirablarına, həyəcanına son qoydu, torpaqlarımızın hər bir qarışına sahib çıxdı, regionda tüğyan edən separatçılığın kökünü kəsdi, ölkəmizin tarixi Zəfərini rəsmiləşdirdi.
Vəhdət Partiyasının sədri, deputat Tahir Kərimli dedi ki, onun artıq bir müxalifət partiyasının rəhbəri kimi torpaqlarımızı işğaldan azad edib Azərbaycanın ərazi bütövlüyünü təmin edən, suverenliyini bərpa edən, bütün İslam dünyasının lideri olan Prezident İlham Əliyevə qarşı çıxmağa haqqı yoxdur. Belə bir problemləri həll edən liderə qarşı necə müxalif mövqedə olmaq olar?
S.Qafarova gündəliyə 16 məsələ daxil edildiyini bildirdi. “Bakı şəhəri Binəqədi rayonunun, Sumqayıt şəhərinin və Abşeron rayonunun sərhədlərinin müəyyənləşdirilməsi haqqında” qanun layihəsi barədə məlumat verən komitə sədri Siyavuş Novruzov qeyd etdi ki, sənədə əsasən, Binəqədi qəsəbəsinin ərazisindən 1 213 ha torpaq sahəsi, Abşeron rayonunun inzibati ərazisində yerləşən 375 ha və 2 min 223,67 ha torpaq sahəsi Sumqayıt şəhərinin inzibati ərazisinə verilir. Bu Sumqayıtın daha da inkişafı məqsədi ilə həyata keçirilir.
Qanun layihəsinin qəbulundan sonra S.Qafarova bildirdi ki, gündəlikdəki digər 12 məsələ ikinci oxunuşda təqdim edilib.
Qanun layihələri müzakirələrdən sonra qəbul edildi.
Birinci oxunuşda təqdim edilən 3 qanun layihəsinin müzakirəsindən sonra müvafiq qərar qəbul olundu. Bununla da Milli Məclis öz işini bitirdi.
Əliqismət BƏDƏLOV
XQ
