15 oktyabr 2003-cü il – xilaskar Prezident, müzəffər Ali Baş Komandan, yenilməz sərkərdə İlham Heydər oğlu Əliyevin seçicilərin böyük əksəriyyətinin səsi ilə Azərbaycan dövlətinin sükanı arxasına keçdiyi gündür.
Ümummilli liderin siyasi kursunun yeganə düzgün yol olduğunu görən xalqımız həmin gün keçirilən seçkilərdə onun layiqli varisi İlham Əliyevi dəstəkləyərək, 76,8 faiz səslə onu özünə yeni Prezident seçdi. O, xalqa ilk müraciətində “Mən hər bir azərbaycanlının prezidenti olacağam!” – demişdi. Bu illər ərzində o, verdiyi sözə əməl etdi, hər bir azərbaycanlı üçün sadəcə Prezident deyil, layiqli Prezident olmağı bacardı. Bu gün həmin ifadənin həqiqətə çevrildiyi tarixə şahidlik etmək hər bir azərbaycanlıya yalnız qürur hissi yaşadır.
Prezident İlham Əliyev öz varlığı, əməlləri ilə bu 20 ildə əsrə bərabər möhtəşəm bir tarixə imza atıb. Bu möhtəşəm tarixin müəllifi də, yazarı da, yaradıcısı da İlham Əliyevdir.
Prezident İlham Əliyevin ali dövlət vəzifəsində ilk günlərdən başlayaraq idarəçilikdə nümayiş etdirdiyi yüksək məharət, həyata keçirdiyi qətiyyətli, milli maraqlara söykənən daxili və xarici siyasət çox keçmədən öz müsbət nəticələrini verdi. Xalqın öz liderinə inam və etimadı yüksək dərəcədə artdı. Məhz buna görə də 2008-ci, 2013-cü və 2018-ci illərdə keçirilən prezident seçkilərində də İlham Əliyev yenidən inamlı qələbə qazandı.
Ötən 20 ilə nəzər salanda işğal altındakı torpaqlarımızın azad olunması, ərazi bütövlüyümüzün bərpası ilə nəticələnmiş Vətən müharibəsində qazanılmış möhtəşəm Qələbə, əlbəttə ki, bu illərin zirvəsində dayanır. Prezident, Ali Baş Komandan İlham Əliyevin rəhbərliyi ilə qazanılmış Qarabağ Zəfəri xalqımızın qəhrəmanlıq tarixinə qızıl hərflərlə yazıldı. Azərbaycan qalib ölkəyə, xalqımız qalib xalqa çevrildi. Bu Qələbə sayəsində regionda yeni reallıqlar yarandı.
Bu illər ərzində Azərbaycan Ordusunun döyüş qabiliyyətinin artırılması, Silahlı Qüvvələrin maddi-texniki bazasının möhkəmləndirilməsi sahəsində atılan ardıcıl addımların nəticəsidir ki, Azərbaycan Ordusu bu gün dünyanın ən güclü 50 ordusu sırasında yer alır. Məhz bu ordu öz Ali Baş Komandanının qüdrətli sərkərdəliyi ilə 2020-ci il sentyabrın 27-də Ermənistanın hərbi təcavüzünə cavab olaraq qurtuluş savaşına başladı və dünyanı heyrətə salan hərbi uğurlara imza atdı. 30 ilə yaxın müddətdə işğal altında qalan torpaqlarımız 44 gün ərzində azad olundu. Qarabağın tacı, döyünən ürəyi olan Şuşanın fəthi tariximizə Zəfər Günü kimi yazıldı. İki gün sonra isə işğalçı Ermənistan kapitulyasiya sənədinə imza atmağa məcbur oldu. Beləliklə, BMT Təhlükəsizlik Şurasının 27 il kağız üzərində qalmış qətnamələrini Azərbaycan özü icra etdi.
Dünya hərb tarixində xüsusi yer tutan bu müharibə Prezident İlham Əliyevin daha bir keyfiyyətini – sərkərdəlik məharətini üzə çıxardı. O, əməliyyatlara şəxsən nəzarət edir, döyüşən orduya tapşırıqları birbaşa özü verirdi. Qələbəni şərtləndirən mühüm amillərdən biri də Azərbaycan Prezidentinin diplomatiya müstəvisində çevik siyasəti oldu. Müharibə dövründə dövlətimizin başçısı İlham Əliyev beynəlxalq mətbuata 30-dan çox müsahibə verdi ki, bu da münaqişə ilə bağlı həqiqətlərin beynəlxalq ictimaiyyətə çatdırılmasında mühüm rol oynadı.
Bu ilin sentyabr ayında müzəffər Ali Baş Komandanın əmrləri ilə həyata keçirilən antiterror tədbirləri nəticəsində Azərbaycan Ordusu cəmi 23 saat ərzində düşmən üzərində qəti Qələbəsinə imza atdı.
Əlbəttə, Vətən müharibəsində qazanılmış Qələbə həm də həyatın bütün sahələrində əldə olunmuş uğurlarla, dinamik inkişafla bilavasitə bağlıdır. Prezident İlham Əliyevin də vurğuladığı kimi, Azərbaycan heç vaxt indiki qədər güclü olmayıb. Dövlət başçımızın praqmatik liderlik xüsusiyyətləri ilə rəhbərlik etdiyi və ölkədə bütün sahələrdə uğurla həyata keçirilən siyasət nəticəsində Azərbaycanın beynəlxalq arenadakı mövqeyi möhkəmlənib, Azərbaycan dünyada söz sahibinə çevrilib. Bu gün regionda Azərbaycanın iştirakı olmadan, onun milli maraqları nəzərə alınmadan hər hansı beynəlxalq, irimiqyaslı layihələrin reallaşması mümkün deyil. Azərbaycan bu gün dünyada bir çox transmilli layihələrin təşəbbüskarı və uğurlu icraçısı, etibarlı tərəfdaşı kimi tanınır. Bakı–Tbilisi–Ceyhan əsas ixrac neft kəməri, Azərbaycan qazını Avropaya çatdıran Cənub Qaz Dəhlizi, TAP layihəsi, Avropanı Asiya ilə birləşdirən Bakı–Tbilisi–Qars dəmir yolu, Şərq-Qərb və Şimal-Cənub beynəlxalq nəqliyyat dəhlizləri ölkəmizi energetika və nəqliyyat mərkəzinə çevirib. Azərbaycan bu gün dünyanın məhdud saylı kosmik ölkələri sırasında yer alır.
Prezident İlham Əliyevin yürütdüyü siyasət Azərbaycanın müttəfiqlərinin və dostlarının sayını artırıb. Ölkəmiz BMT Təhlükəsizlik Şurasının qeyri-daimi üzvü seçilib. Özündə 120 ölkəni birləşdirən və BMT-dən sonra dünyada ən böyük siyasi təsisat olan Qoşulmama Hərəkatına sədrlik Azərbaycana keçib. Təşkilata sədrlik müddətinin daha bir il artırılması Prezident İlham Əliyevin qlobal liderlik səylərinə verilən yüksək qiymətdir.
Bu gün Azərbaycan dünyanı həm də işğaldan azad edilmiş ərazilərdə həyata keçirdiyi nəhəng bərpa və quruculuq işləri ilə heyrətləndirir. 30 il düşmən tapdağı altında qalan torpaqlarımız məhz Prezident İlham Əliyevin əzmkarlığı ilə cənnətə çevrilir. Uzun illər yurd həsrəti ilə yaşayan insanlar öz doğma torpaqlarına qayıdırlar.
Ölkə və xalq olaraq əldə etdiyimiz uğurların təməlində məhz onun gərgin əməyi sayəsində yaranan sağlam ictimai-siyasi mühit, xalqla iqtidarın birliyi dayanır.
Bu illər ərzində Azərbaycan xalqı hər zaman öz liderinə – Prezidentinə güvənib və inanıb! Xalq öz Prezidentini sevir! Xalq öz Prezidentinin arxasındadır!
Əminik ki, bu qarşılıqlı inamla 20 ildə əsrə bərabər möhtəşəm bir yol qət edən xilaskar Prezident, müzəffər Ali Baş Komandan, yenilməz Sərkərdə cənab İlham Əliyev Azərbaycanımızı bundan sonra da üfüqdən boylanan daha uca zirvələrə aparacaqdır!
Jalə ƏLİYEVA,
Milli Məclisin deputatı, filologiya elmləri doktoru, professor
