Bu günlər İkinci Qarabağ müharibəsində cəbhə xəttindən xeyli uzaqda yerləşən Gəncə şəhərinə Ermənistan tərəfindən raketlər atılması və nəticədə dinc sakinlərin qətlə yetirilməsinin növbəti ildönümü ilə bağlı tədbirlər keçirilir. Döyüş meydanında uduzan, günbəgün ağır itkilər verərək geri çəkilən Ermənistan Azərbaycanın dinc şəhər və kəndlərini ağır silahlarla vurur, sanki qisasını günahsız insanlardan almağa çalışırdı.
2020-ci ilin oktyabr ayında Gəncə Ermənistan silahlı birləşmələri tərəfindən ayrı-ayrı günlərdə 5 dəfə bombalandı. Şəhərə birinci hücum oktyabrın 4-də baş verdi və nəticədə bir mülki şəxs – Əliyev Tunar Qoşqar oğlu şəhid oldu, 30-dan çox dinc sakin yaralandı. Bu, İkinci Qarabağ müharibəsinin gedişində dinc yaşayış məskəninə ilk hücum idi.
Gəncə ikinci dəfə oktyabrın 5-də raket atəşinə məruz qoyuldu. Nəticədə 3 mülki şəxs yaralandı. Şəhərə üçüncü raket hücumu oktybarın 8-də, dördüncü raket hücumu isə həmin ayın 11-də baş verdi. Dördüncü hücum zamanı şəhərdə 10 mülki şəxs şəhid oldu, 40-dan çox insan yaralandı. Bu hücum həm də tərəflər arasında əldə olunmuş atəşkəs razılaşmasından sonra edildi və bununla da atəşkəs pozuldu.
Ermənistanın Gəncəyə beşinci raket hücumu 17 oktyabrda baş verdi. Həmin hücum daha ağır nəticələr verdi, hamısı mülki şəxslər olmaqla, 16 nəfər həlak oldu, 55 nəfər yaralandı. Eyni zamanda, yaşayış binası dağıdıldı, şəhərin infrastrukturuna, digər binalara və avtomobillərə ziyan dəydi. Ümumiyyətlə, münaqişə zonasından 100 kilometrdən artıq məsafədə yerləşən Gəncə şəhərinə raket hücumları nəticəsində aralarında qadın və uşaqlar da olmaqla 26 mülki şəxs həlak oldu, 142 nəfər yaralandı.
Doğrudur, ermənilərin bu hücumları BMT, Avropa İttifaqı və Türkiyə tərəfindən qınandı, ancaq bu günə qədər günahsız insanların həlak olması ilə bağlı heç kəs cinayət məsuliyyətinə cəlb olunmayıb.
Azərbaycan Prezidenti İlham Əliyev 2020-ci ilin 12 oktyabrında Türkiyənin “Haber Global” televiziya kanalına müsahibəsində bildirmişdi ki, gecə saatlarında mülki əhaliyə qarşı dəhşətli cinayət törədilib. Gəncə şəhəri “Toçka-U” raketləri ilə atəşə məruz qalıb. Bunun nəticəsində mülki şəxslər həlak olub və yaralanıb: “Bu, erməni faşizminin eybəcər sifətinin növbəti təzahürüdür. Artıq dünya erməniləri, onların hamiləri və islamafob dairələr bu cinayəti gizlədə bilməyəcək”.
Prezident 2020-ci il oktyabrın 20-də xalqa müraciətində deyirdi: “... Mənfur düşmən bizim yaşayış məntəqələrimizi daim atəşə tutur, hər gün cəbhəboyu şəhərlərimiz, kəndlərimiz mənfur düşmənin atəşinə məruz qalır. Bu namərd atəşə ən çox məruz qalan Tərtər rayonudur, eyni zamanda, Ağdam, Goranboy, Ağcabədi, Bərdə, digər şəhər və rayonlarımız düşmən tərəfindən atəşə tutulur. Gəncə şəhərinə namərd zərbələr nəticəsində dinc əhali həlak olur – uşaqlar, qadınlar, qocalar. Düşmən üçün bunun fərqi yoxdur. Onlar döyüş meydanında məğlubiyyətə uğrayır, Azərbaycan Ordusunun qarşısında duruş gətirə bilmir və bizi durdurmaq üçün, bizə zərbə vurmaq üçün bütün dünyanın gözü önündə mülki əhaliyə qarşı cinayət törədir. Bütün dünya görür ki, Azərbaycan hansı mənfur, vəhşi düşməndən öz doğma torpaqlarını azad edir”.
Bəli, Qarabağ münaqişəsi dövründə azərbaycanlılara qarşı qətliamlar, soyqırımları törətmiş cinayətkarlar artıq cəzalarını almağa başlayıblar. Qarabağda həyata keçirilmiş antiterror tədbirlərindən sonra Araik Arutyunyan, Bako Saakyan və digərləri tutularaq Bakıya gətiriliblər. Arutyunyan Gəncəyə zərbə endirilməsi ilə bağlı əmr verdiyini etiraf edib. İnanırıq ki, dövlətimiz Gəncəyə və digər dinc regionlarımıza zərbələr endirilməsinə səbəb olan digər cinayətkarların da tutularaq Azərbaycanın ədalət mühakiməsinə təslim edilməsini təmin edəcək. Bu canilər gec də olsa, qanunlarımız qarşısında cavab verməlidirlər.
Yeganə HACIYEVA,
politoloq
44 günlük Vətən müharibəsi günlərində Ermənistan Azərbaycanın mülki əhalisinə qarşı müharibə cinayətləri törətdi. Bir neçə şəhərimiz müharibə qanunlarına zidd olaraq hücuma məruz qaldı. Hərbi obyektlərin yerləşmədiyi böyük şəhərlərimiz – Gəncə və digərləri gecə saatlarında, insanlar yuxuda olarkən, qırğınların sayı daha çox olsun deyə, atəşə tutuldu. Beləliklə, İkinci Dünya müharibəsindən sonra ilk dəfə ATƏT coğrafiyasında bu təşkilatın üzvü olan bir ölkə digərinin ərazisini, mülki insanlarını raket atəşinə tutdu.
Gəncə kimi böyük bir şəhərimizin hədəfə alınmasına dünyanın susqunluq nümayiş etdirməsi ermənilərin bu prosesi sonradan da təkrarlamasına səbəb oldu. Bunlar təbii ki, Azərbaycan dövləti və əhalisinin iradəsini sındırmaq, eləcə də müharibənin gedişini dəyişmək, müharibənin nəticələrini öz xeyrinə dəyişmək üçün cılız cəhdlər idi. Bu, eyni zamanda, müharibə cinayətləri idi və Beynəlxalq Ədalət Məhkəməsində mühakimə üçün mövzu ola biləcək addımlar idi. Bunlar Ermənistanın Azərbaycanın mülki əhalisinə qarşı növbəti terror əməlləri idi.
Cəbhədə uğursuzluğa uğrayan və bunu qəbul edə bilməyən Ermənistan Gəncəni və mülki əhalimizin yaşadığı digər yerləri ballistik raketlərlə atəşə tuturdu. Bütün bunlar artıq Azərbaycan insanının qan yaddaşında möhkəmlənmiş, unudulması mümkün olmayan hadisələr, insanlıq əleyhinə cinayətlər idi. İndi qalır bu terror aktlarının həyata keçirilməsi üçün əmr verənlərin layiq olduqları cəzaya çatdırılması. Azərbaycan bu istiqamətidə də fəaliyyətini davam etdirir. Cinayətkarların cəzalarına çatmasına az qalır.
Paşa ƏMİRCANOV
XQ