Tarixi Naxçıvan təşəbbüsü Turana gedən yolu qısaldır
Biz hər zaman bir-birimizin yanında olmalıyıq, Türk Dövlətləri Təşkilatının inkişafı ilə bağlı bütün üzv ölkələr öz dəyərli töhfələrini verirlər, o cümlədən, Azərbaycan. Azərbaycan bütün dövrlərdə bu təşkilatın güclənməsinə hər zaman öz dəstəyini əsirgəməmişdir və bizim xarici siyasət prioritetləri arasında təşkilata üzv ölkələrlə əlaqələr birinci yeri tutur. Bunu mən Prezident kimi dəfələrlə bəyan etmişəm, eyni zamanda, biz bunu əməli işlərdə də göstərmişik.
İlham ƏLİYEV,
Azərbaycan Respublikasının Prezidenti
Bakı, 7 sentyabr 2023-cü il
Bəzi ekspertlər yazırlar ki, Türk dövlətlərinin əməkdaşlığının genişləndirilməsi SSRİ-nin çökməsindən sonrakı vəziyyətin tələb etdiyi çağırışlara cavab olaraq intensivləşmişdir. Doğrudur, burada da həqiqət var. Ancaq ulu öndər Heydər Əliyev hələ SSRİ dövründə də bu məsələni daim diqqətdə saxlayırdı. Məsələn, Mixail Qorbaçovun göstərişi ilə Qazaxıstan kimi böyük türk dövlətinə qeyri-qazax millətindən olan Gennadi Kolbin rəhbər təyin olunanda Kremldə yeganə türk təmsilçisi olan Heydər Əliyev buna ciddi şəkildə etiraz etmişdi.
Xatırladaq ki, Qazaxıstanın dövlət başçısı Dinmühəmməd Kunayevlə Heydər Əliyevin dostluğu bütün türk siyasətçilərinə örnək sayılırdı. Heydər Əliyevin Sov.İKP MK Siyasi Bürosunda Qazaxıstana yeni rəhbər təyinatında Gennadi Kolbinin namizədliyinin əleyhinə çıxmışdı. Heydər Əliyev o vaxtlar Qazaxıstan Nazirlər Sovetinin sədri olan Nursultan Nazarbayevin namizdəliyini təklif etmişdi. Zaman sübut etmişdi ki, Heydər Əliyev Kolbinin namizədliyinə etiraz edəndə tamamilə haqlı idi. Belə ki, Gennadi Kolbin Qazaxıstanın qısamüddətli və uğursuz rəhbəri olmuş, Alma- Atıda Jeltoksan hadisələri baş vermişdi və qazaxların qanı axıdılmışdı...
SSRİ-nin dağılmasından sonra da türkdilli dövlətlərin əməkdaşlığının genişləndirilməsinə ən böyük töhfəni məhz Heydər Əliyev vermişdi. Bu töhfə Azərbaycanla Türkiyə arasında inşa edilən “Ümid körpüsü”ndən başlanmış və Türkdilli Ölkələrin Əməkdaşlıq Təşkilatının Türk Dövlətləri Təşkilatına çevrilməsi kimi möhtəşəm beynəlxalq uğurla nəticələnmişdir.
Məlum olduğu kimi, Türkdilli Dövlətlərin Əməkdaşlıq Şurasının fəaliyyətinin əsas məqsədi türk ölkələri arasında hərtərəfli əməkdaşlığa yardım etməkdən ibarətdir. Bu beynəlxalq hökumətlərarası təşkilat türkdilli ölkələrin dövlət başçılarının 3 oktyabr 2009-cu il tarixində Naxçıvan şəhərində keçirilən Zirvə görüşündə imzalanmış Naxçıvan Sazişinə əsasən yaradılmışdır. Qurumun Dövlət Başçıları Şurası, Xarici İşlər Nazirləri Şurası, Yüksək Vəzifəli Şəxslər Komitəsi, Ağsaqqallar Şurası, Katibliyi, Koordinasiya Komitəsi, eləcə də Türk Şurasının Budapeştdəki Nümayəndəliyi fəaliyyət göstərir.
Xüsusilə vurğulanmalıdır ki, Azərbaycan, Qazaxıstan, Qırğızıstan və Türkiyə arasında qurulan təşkilatın üzvlərinin sayı qısa müddətdə 7-yə çatıb. Daha 2 dövlət – Macarıstan və Türkmənistan isə müşahidəçi statusu almışlar. Türk Şurası ötən illərdə böyük inkişaf yolu keçib.
Azərbaycan Türk Dövlətləri Təşkilatı ilə yanaşı, onun əlaqədar orqan və qurumları olan TÜRKSOY, TÜRKPA, Türk Akademiyası, Türk Mədəniyyəti və İrsi Fondu, Türk Biznes Şurası ilə də sıx əməkdaşlıq edir. Üzv ölkələr arasında elm, təhsil, mədəniyyət və incəsənət sahəsində əməkdaşlığın genişləndirilməsi, beynəlxalq səviyyədə türk dünyasının ortaq dəyərlərinin tanıdılması və təşviq edilməsi sahəsində aktiv rol oynayır. Təsadüfi deyildir ki, təşkilatın 2012-ci ildə Bişkekdə keçirilmiş ikinci Zirvə görüşündə Azərbaycanın təşəbbüsü ilə yaradılmış Türk Mədəniyyəti və İrsi Fondu 2015-ci il tarixindən etibarən qərargahı Bakı şəhərində yerləşməklə beynəlxalq təşkilat kimi fəaliyyətə başlamışdır.
Qurumun nizamnaməsində nəzərdə tutulan qarşılıqlı yardımlaşma məsələsi daim diqqət mərkəzindədir. Məsələn, TDƏŞ-in Dövlət Başçıları Şurasının 2020-ci il aprelin 10-da videokonfrans vasitəsilə keçirilən Fövqəladə Zirvə Görüşü “COVID-19 pandemiyası ilə mübarizədə həmrəylik və əməkdaşlıq” mövzusunda idi. Fövqəladə Zirvə Görüşündə “Türkdilli Dövlətlərin Əməkdaşlıq Şurasının Bakı Bəyannaməsi” qəbul olunmuşdur.
Fəxrlə yada salırıq ki, həm TDƏŞ, həm də TDT hər zaman Ermənistan və Azərbaycan arasında mövcud olmuş münaqişə ilə bağlı Azərbaycanın haqlı mövqeyini dəstəkləmişdir. TDƏŞ-in Katibliyi 2020-ci ilin iyul ayında baş vermiş Tovuz hadisələri və sentyabrın 27-dən başlayaraq Ermənistan tərəfindən həyata keçirilən təxribatlarla bağlı mütəmadi bəyanatlar vermiş, TDƏŞ baş katibi Bağdad Amreyev 2020-ci ilin 20 oktyabr tarixində Gəncə şəhərini ziyarət etmiş, Ermənistan tərəfindən Gəncənin raket atəşinə tutulması ilə bağlı Türk dünyası adından həmrəyliyi nümayiş etdirən bəyanat vermişdir. Eyni zamanda, TDƏŞ nümayəndə heyəti işğaldan azad edilmiş Ağdam və Füzuli rayonlarına da səfər etmişdir.
2021-ci il noyabrın 12-də İstanbulda keçirilmiş Türkdilli Dövlətlərin Əməkdaşlıq Şurasının VIII Zirvə görüşündə dünyanın siyasi sistemində önəmli bir platformaya çevrilməkdə olan Türk Şurasının bundan sonra Türk Dövlətləri Təşkilatı adı ilə fəaliyyətini davam etdirməsi haqqında qərar qəbul edilmişdir.
Bu sətirləri TDƏŞ-in TDT-yə çevrilməsindən sonrakı üç faktla yekunlaşdırmaq istəyirik. Birinci, Türk İnvestisiya Fondu yaradılmışdır. İkinci, ötən il martın 31-də TÜRKSOY Daimi Şurasının Bursa şəhərində keçirilən növbədənkənar iclasında Şuşa şəhərinin 2023-cü ildə Türk Dünyasının Mədəniyyət Paytaxtı elan olunmuşdur. Üçüncü, bu ilin fevralında Türkiyədə baş vermiş sarsıdıcı zəlzələnin nəticələrinin aradan qaldırılmasına kömək etmək üçün Azərbaycan Prezidenti İlham Əliyevin təşəbbüsü ilə martın 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşü keçirilmişdir.
Sammitin açılışında çıxış edən Prezident Rəcəb Tayyib Ərdoğan Türkiyədə baş verən zəlzələdən sonra “Fəlakət– Fövqəladə halların idarə edilməsi və humanitar yardım” mövzusunda Fövqəladə Zirvə görüşünün keçirilməsi təşəbbüsünə görə Prezident İlham Əliyevə minnətdarlığını ifadə edərək demişdir: “Zirvə görüşünün keçirilməsi çağırışı ilə çıxış edən can Azərbaycanın Prezidenti cənab İlham Əliyevə şəxsən öz adımdan və millətim adından təşəkkürlərimi bildirirəm”.
Qardaş xalqların bu möhtəşəm təşkilatını 14 yaşının tamam olması münasibətilə təbrik edirik. Qədim türk dastanlarında və rəvayətlərində uşağın 14 yaşı tamam olanadək ondan hünər gözləmirdilər. 14 yaşda isə o, ağlını və gücünü sübut etməli idi. İnanırıq ki, qarşıdakı müddətdə həmin ağıl və gücün şahidi olacağıq. Turana doğru gedən yolumuz aydın və uğurlararla dolu olsun!
İttifaq MİRZƏBƏYLİ
XQ