Var️danyanı həbs edən Azərbaycan, söyülən isə Ermənistandır

Ermənilərin və ermənipərəstlərin “DQR”-in keçmiş “dövlət naziri”, milyarder Ruben Vardanyanın Azərbaycanın Laçın nəzarət-buraxılış məntəqəsində həbsi (onlar bunu oğurlanma kimi hallandırırlar) ilə bağlı maraqlı, bir çox hallarda gülüş doğuran reaksiyaları yayılmaqdadır. Rusiyanın məlum rəsmi təbliğatçılarının səhifələrinə nəzər yetirmək kifayətdir ki, “Vardanyan ajiotajı”nın miqyası və xarakteri barədə aydın təsəvvür yaransın. 

Əvvəlcə diqqəti cəlb edən medial-spektral təmayül on­dan ibarətdir ki, paylaşım­larda Vardanyanın keçən il Rusiya pasportundan imtina edərək, yaşamaq üçün “Dağ­lıq Qarabağa” getmək qərarı­nı özünün verdiyi qeyd olunur. Sərvəti milyard dollarla öl­çülən bu erməni əsilli rusiyalı “iş adamının” qərarının motiv­ləri barədə məşhur Marqonun (Marqarita Simonyan) gəldiyi gənaətə diqqət yetirək:

“On illər ərzində özünə böyük kapital toplayan, xaric­də nüfuzlu və zəngin dostlara malik, müxtəlif festivallarda gur alqışlara “qonaq edilən” Vardanyanın həyatında er­məni xalqının milli maraqla­rından savayı maraqlı heç nə qalmamışdı...” – yazan Simonyanı bundan daha çox Rubenin Rusiya vətəndaşlı­ğından imtinası hiddətləndirir. Hə də, əgər belə etməsəydi, indi Marqonun qulluğunda canla-başla durduğu siyasi Kreml “yerli milyarderini” dar­da qoymazdı. 

Simonyanın yaxın rə­fiqələrindən biri, Tina Kan­delaki “X”-də belə yazır: “Dostlar, mənim yaxın dos­tumu, Dağlıq Qarabağın (?) sabiq dövlət naziri (?) Ru­ben Vardanyanı Azərbaycan hərbçiləri həbs ediblər. İndi Vardanyanın həyat yoldaşı onunla birlikdə dua etməyi­mi xahiş edir”. Tanrıya dua etmək məsələsinə qarışa bil­mərik, amma bu paylaşıma yazılan şərhlərdə və reaksi­yalarda əsl bayram əhval-ru­hiyyəsi hiss olunmaqdadır. 

* * * 

Qabrielyanov soyadlı biri­sinin məlum hadisəyə müna­sibəti isə, yəqin, erməniəsilli izləyiciləri “dərin düşüncələrə” qərq edib: “Ruben Vardanya­nı həbs ediblər, Samvel Ba­bayanı isə böyük məmnuniy­yətlə buraxıblar. Paşinyanın dövləti cinayətkar olduğunu və İlham Əliyevin çaldığına oynadığını göstərmək üçün sizə daha hansı sübutlar la­zımdır?”. O, şərhinin sonunda Vardanyanla yanaşı, Baba­yanın da həbs olunmadığına görə “qanının qaraldığını” vurğulayır. 

Həbs hadisəsi ətrafın­da “dərin və hərtərəfli təhlil” aparan Rıbar belə bir mən­tiqi nəticəyə gəlir ki, ümu­miyyətlə, Vardanyanın bir­mənalı şəkildə rusiyapərəst mövqedə dayandığı barədə danışmağa dəyməz. Onun fikrincə, “Bakıda kimsə Var­danı oğurlamaqla (?) (həbs etməklə - red.) hadisə ilə bağlı Moskvanın mümkün re­aksiyasına ciddi ümidlər bəs­ləyib və bu, özlüyündə daha çox nümayişkaranə şəkildə peysərə vurulan silləyə bən­zəyir. “Amma yeri gəlmişkən onu da yada salaq ki, formal olaraq Azərbaycan Rusiya tərəfinə heç nə irəli sürə bil­məz. Ona görə ki, il yarımdır ki, Ruben Vardanyan Rusiya vətəndaşı deyil. Hə, böyük ehtimalla son nəticədə Var­danyanı buraxacaqlar. Bura­da Azərbaycan hakimiyyəti üçün əsas və vacib məsələ yerli əhaliyə və beynəlxalq ic­timaiyyətə onu göstərməkdir ki, Artsaxın (?) bütün keçmiş funksionerləri, statuslarından asılı olmayaraq, məsuliyyətə cəlb ediləcəklər”, – Rıbar ya­zıb. Əlbəttə, maraqlı olduğu qədər də yanlış ehtimaldır. Bakının “həbs səhnələri­ni daxilə və xaricə nümayiş etdirməyə” ehtiyacı yoxdur. Azərbaycan sadəcə onun ərazisində onun qanunlarına zid fəaliyyət göstərən ünsür­lərin layiq olduqları cəzaya çatmalarında maraqlıdır. Hə­min ünsürlərin hansı ölkəyə, hansı dairələrə mənsub ol­malarından asılı olmayaraq. Və törədilən cinayətə görə cəzada baiskarın statusu nəzərə alınmır. Vəssalam! 

Karnauxov Vardanyanın saxlanması ilə bağlı Paşinya­nın ünvanına təhqirlər yağdı­ran naməlum “erməni donu­zunun” qeydlərini paylaşıb.

Solovyev Simonyanın yazdığını profilində yerləşdir­məklə kifayətlənib. Yəni, necə deyərlər, ağrımayan başına dəsmal bağlamaq istəməyib.

Bütün bu paylaşımlar­da, şərhlərdə diqqəti ən çox çəkən bilirsiniz nədir? “Qa­nunsuz sərhəd postunda” er­məni biznesmeni “oğurlayan” Azərbaycanın ünvanına sen­zuradan kənar bir kəlmənin belə olmaması. Buna heç bir platformada rast gəlmədik! Mətnlərin hamısı ya quruca xəbərdən, ya da Ermənista­nın ünvanına hətta yazılması mümkün olmayan təhqiramiz ifadələrdən ibarətdir. 

Kremlə yaxın media “car­çılarının” bir qismi susur. Bu isə o deməkdir ki, “Ermənis­tanın ünvanına yeni ittihamlar yağdırmaq üçün düzgün te­zislər üzrə təlimat” hələ döv­riyəyə daxil olmayıb. Deməli, “Vardanyan media-tamaşa­sı”nın ikinci hissəsi irəlidədir. 

İ.HƏSƏNQALA
XQ