1988-ci ildən bu günədək Ermənistanın apardığı mina terroru nəticəsində minlərlə Azərbaycan vətəndaşı zərər görüb, sağlamlığını itirib. Mən özüm də ermənilərin mina terrorunun qurbanıyam.

Bu sözləri jurnalistlərə açıqlamasında Birinci Qarabağ müharibəsi iştirakçısı, mina qurbanı Söhbət Şirinov söyləyib.

2020-ci ildə Azərbaycanın öz torpaqlarını işğaldan azad etdiyini xatırladan mina qurbanı bildirib: “Amma bu gün də ərazilərimizdə olan separatçıların təxribatlarının şahidi oluruq. Onlar Azərbaycanın suveren ərazilərində minalar basdırırlar. Bu da işğaldan azad olunmuş ərazilərə gələn əhali üçün təhlükə yaradır".

Ermənilərin mina terroru ilə bağlı BMT-yə müraciət ünvanlandığını vurğulayan Söhbət Şirinov deyib: “Beynəlxalq təşkilatlar ermənilərin ərazilərimizdə mina basdırmalarına lazımi hüquqi qiymət vermir. Eyni zamanda, bu istiqamətdə BMT də obyektiv yanaşma sərgiləmir və əməli addımlar atmır, əksinə, ölkəmizə təzyiq edir”.

O təəssüflə qeyd edib ki, ərazilərimizdə 2021-ci il Ermənistan istehsalı olan minlərlə minanın aşkar edilməsinə baxmayaraq, dünya ictimaiyyəti ermənilərin cinayətlərinə səssiz qalır.