Erməni diasporunun pulla ələ aldığı Beynəlxalq Cinayət Məhkəməsinin 2003-2012-ci illərdə baş prokuroru olmuş Luis Moreno Okampo Azərbaycan əleyhinə fəaliyyətini davam etdirir. Nəinki davam etdirir, hətta genişləndirir. O, Ermənistanın media orqanlarına tez-tez müsahibələr verir, xaricdə Azərbaycan əleyhinə keçirilən tədbirlərə böyük həvəslə qatılır.

Okampo belə müsahibələrdən birini bugünlərdə “Amerikanın səsi”nə verib. Müsahibəni “Novosti–Armeniya” bey­nəlxalq informasiya agentliyi də öz sə­hifəsində yerləşdirib. O, müsahibə zama­nı yenə ölkəmizə böhtanlar atıb. Deyib ki, dövlətlər Qarabağdakı “soyqırımı” tanımaq istəmirlər. Çünki bunu etsələr, müəyyən hərəkətlərə əl atmalı olacaq­lar. “BMT Təhlükəsizlik Şurasında hər ölkə öz maraqlarını qoruyur, lakin onla­rın bu məsələdə heç bir marağı yoxdur. Hüquqi baxımdan hər şey aydındır. Bu, siyasi baxımdan çətindir, çünki ABŞ İran­la münaqişə çərçivəsində Azərbaycanı dəstəkləyir. Avropanın regionun enerji re­surslarına ehtiyacı var. Beləliklə, hüquqi reaksiyaya təsir edən bir çox siyasi ma­raqlar var”, – deyə Okampo bildirib.

Okamponun sayıqlamaları bununla bitməyib. Onun fikrincə, ABŞ, Rusiya və Fransa Qarabağ məsələsində razılığa gələrək Azərbaycana təzyiq göstərə və Laçın yolunun açılmasına tez bir zaman­da nail ola bilərlər. Əlavə edib ki, bu, ən sadə yoldur.

Okamponun müsahibəsini oxuduqca bu insanın iyrənc fantaziyası barədə dü­şünməyə bilmirsən. Yaxud da, görünür, ermənilərdən aldığı pullar onu elə vəziy­yətə salıb ki, artıq gözü ayağının altını görmür. Fakt budur ki, Ermənistan Qara­bağla bağlı məsələni avqust ayında BMT Təhlükəsizlik Şurasının iclasına çıxar­mışdı. TŞ-nin əksər üzvləri əsasən ermə­nipərəst dövlətlərdən ibarətdir. Bununla belə, məsələni diqqətlə incələyən dövlət­lər Azərbaycanın beynəlxalq hüquqa zidd addım atmadığını görərək müzakirələrdə də buna əsaslanan yanaşma nümayiş et­dirdilər.

Sabiq prokuror ermənilərə məsləhət verməyi də unutmayıb. Onun sözlərinə görə, əgər ABŞ, Rusiya və Fransanın Qarabağ məsələsində razılığa gələrək Azərbaycana təzyiq göstərməsi ideyası işə yaramasa, təbii ki, əhalinin təminatı­nı hava yolu ilə həyata keçirmək variantı var: “Amma mən hesab edirəm ki, bu, B planıdır”.

Onu da bildirək ki, Luis Okampo sent­yabrın 6-da ABŞ Konqresinin Nümayən­dələr Palatasının Tom Lantos adına İnsan Haqları Komissiyasında Qarabağın “blo­kadası” məsələsi ilə bağlı dinləmələrə qa­tılıb. O, Qarabağdakı “böhranlı vəziyyətlə” bağlı “ekspert rəyi”ni təqdim edib. Avqust ayında isə argentinalı hüquqşünas ermə­nilərdən pul alaraq onların xeyrinə 28 sə­hifəlik “ekspert rəyi” hazırlamışdı.

Ümumiyyətlə, Okampo pula həris bi­risidir. Bir neçə il öncə ofşor maliyyə fəa­liyyəti ilə bağlı suala cavabında başabəla prokuror Beynəlxalq Cinayət Məhkəmə­sindəki maaşının onun üçün kifayət et­mədiyini bildirmişdi. Azərbaycan əleyhinə qərəzli ekspert rəyinin müəllifi dəfələrlə qalmaqalların mərkəzində olub, manipul­yasiyalarda və hüquq normalarının po­zulmasında şübhəli bilinib. Okampo əsas işindən əlavə ofşor maliyyə fəaliyyəti ilə məşğul olub, həmçinin Müəmmar Qəd­dafi rejimi ilə yaxın əlaqələri olan liviyalı iş adamına məsləhət verməkdə şübhəli bilinib. “Financial Times” Fransanın “Me­diapart” araşdırma saytının materiallarına istinadən yazır ki, Luis Moreno Okam­ponun məhkəməsiz qətllərdə və digər cinayətlərdə ittiham olunan liviyalı iş ada­mı Həsən Tatanaki ilə münasibəti 40 min sənədin sızmasından sonra məlum olub.

Okampo deyib ki, o, Tatanakiyə Liviya daxilindəki məsələlərlə, məsələn, vətən­daş müharibəsinin dayandırılması ilə bağlı məsləhətlər verib. “Sənədlərə görə, Moreno Okampoya üç il ərzində hər il 1 milyon dollar, üstəgəl gündə 5 min dollar ödənməli idi. Bildirilir ki, üç aydan sonra müqaviləyə xitam verilib, keçmiş prokuror isə 750 min dollar qazanıb”, – nəşr qeyd edir.

H.Tatanaki Liviyada keçmiş diktatorun oğlu Seyf əl-İslam Qəddafi ilə əlaqələri olan tanınmış simadır. 2007-ci ildə onlar qədim Kirena şəhərində çoxmilyonluq turizm layihəsinin planlarını açıqlayıblar. Luis Moreno Okampo da onların ofşor maliyyə fəaliyyətlərində şübhəli bilinirdi.

Hələ 2010-cu ildə Beynəlxalq Cinayət Məhkəməsinin prokuroru kimi, Okampo 37-ci Beynəlxalq İnsan Hüquqları Fede­rasiyasının forumunda iştirak etmək üçün Ermənistana səfər edib. O, həmin vaxt Ermənistanın prezidenti olan Xocalı cəl­ladı Serj Sarkisyanla görüşüb. Görünür, görüş onda çox güclü təəssürat yaradıb, yəqin ki, erməni lobbisinin maliyyə moti­vasiyası da onu həvəsləndirib. Bu məna­da indi özünün əsas iş yerindən məhrum olmuş, pula böyük ehtiyac duyan Okam­ponun ermənilərin xeyrinə istənilən addı­mı atması təəccüblü deyil.

Səxavət HƏMİD
XQ