Məğlubların öz aralarında müqəssir axtarması təbiidir, amma...
...Hayların təqsirsizi olmur. Hətta, əli müsəlman qanına bulaşmamış ermənilər belə hamılıqla “miatsum” epidemiyasına yoluxur və bu faktın özü cinayət əməlinə bərabər tutula bilər.
44 günlük müharibədə məğlubiyyətin səbəblərini araşdıran istintaq komissiyası hökumətin silah-sursata xərclədiyi vəsaitin şəffaflığını yoxlayır. Hayastan parlamentindəki “Şərəfim var” fraksiyasının katibi Tiqran Abramyan hələ müharibəyə qədər büdcədən ordunun silahlanmasına ayrılmış 608 milyard dramın hara “uçduğu” barədə yazıb. O, bununla bağlı müdafiə nazirliyinə rəsmi sorğu göndərdiyini, 2018-2020-ci illərdə hansı silahların, nə miqdarda və hansı qiymətə alındığını aydınlaşdırmaq istədiyini ərz edir. Amma, bildirir ki, nazirlik bir aydan çoxdur onun sorğusuna cavab vermir. Abramyan, əslində, problemin nazirliyin “məxfi informasiyanın” açıqlanmasını istəməməsində deyil, hökumətin verdiyi əmrlə bağlı olduğunu deyir. “Şərəfim var”ın katibi qeyd edir ki, 2018-2020-ci illərdə Paşinyan hökumətinin böyük həcmli sövdələşmələri “Su-30” qırıcı təyyarələrinin və İordaniyadan “Osa-AK” HHM komplekslərinin satın alınması ilə bağlıdır.
Abramyan iddia edir ki, həmin dövrdə hökumətin bəyan etmədiyi digər satın-almalar da olub və o vəsait baş nazirin təqdim etdiyi rəqəmlərdə öz əksini tapmayıb. Hayastan parlamentinin üzvünün gəldiyi qənaət maraq doğurur: komissiyada elan olunan rəqəmlərin reallığa heç bir aidiyyəti yoxdur, yaxud, bir qayda olaraq, manipulyativ xarakter daşıyır. Yəni, bütün bu fəaliyyət imitasiyadan başqa heç nə deyil. Erməni deputat bir az da irəli gedərək soydaşlarının, ümumiyyətlə, onilliklər boyu “Böyük Ermənistan”, “Dağlıq Qarabağ”, “erməni soyqırımı” uğrunda apardığı mübarizəsini sadəcə, imitasiya hesab edir. Buna görə də bu gün saxta, yalançı mübarizənin fəsadlarını yaşadıqlarını etiraf edən Abramyan hazırkı hakimiyyət üçün də böyük miqdarda dezinformasiyanın cəmiyyətə üfürülməsinin vacib amil olduğunu yazır: “Guya onlar təslim olmamaqdan ötrü əllərindən gələn hər şeyi etdilər, amma alınmadı”.
Bəli, mübarizəni imitasiya etməyin bədəli ağır olur, Tiqran Abramyan! Düz yazırsan, belə saxtakarlıq böyük ərazilərin, çoxlu insan həyatının itirilməsinə gətirib çıxarır. Amma bundan daha betəri mübarizəni imitasiya edən xalqın sağlam düşüncədən məhrum olması, ağlını itirməsidir. Təəssüf ki, sənin təmsilçisi olduğun millət neçə əsrdir yoluxduğu və sağalmaz mərəzə çevrilmiş ağıldan-bəladan əziyyət çəkir. Adamın Allah şəfanızı versin deməyə də dili gəlmir...
İ.HƏSƏNQALA, “Xalq qəzeti”