Ermənistanın baş naziri Nikol Paşinyanın mayın 23-də Azərbaycanın 86,6 min kvadratkilometrdə ərazi bütövlüyünü tanıdığını, bura Qarabağın da daxil olduğunu bəyan etməsindən sonra onun əleyhinə böyük “cəbhə” formalaşıb. Bu “cəbhə”yə əsasən ölkənin keçmiş prezidentləri Robert Koçaryan və Serj Sarkisyanın başçılıq etdikləri müxalifət düşərgəsi, daha doğrusu, Qarabağ klanı, onların hakimiyyətdə olduğu dövrdə vəzifədə işləmiş Vardan Oskanyan, habelə 2018-2019-cu illərdə Ermənistan milli təhlükəsizlik xidmətinin direktoru olmuş, hazırda parlamentdəki “Şərəfim var” fraksiyasının liderlərindən olan Artur Vanetsyan... kimi şəxslər daxildir.
Bu qaragüruha daxil olanlar son zamanlar daha da fəallaşıb və yeni təşəbbüsə başlayıblar. Söhbət Ermənistanda Qarabağla bağlı referendum keçirilməsi tələbi ilə ictimai təşəbbüs irəli sürülməsindən və bu məqsədlə imzatoplama kampaniyasının başlamasından gedir. “Azad Artsax – referendum” qanunvericilik təşəbbüsünün üzvləri Ermənistan Respublikası adından Qarabağın “öz müqəddəratını təyinetmə hüququ”ndan imtinaya cəhd edən istənilən hökumətin Ermənistanın konstitusiya quruluşuna qarşı çıxdığını vurğulayıblar. Təşəbbüsün müəllifləri Qarabağdan imtinanın kriminallaşdırılması prosesini başlatdıqlarını və vətəndaşların dəstəyinə ehtiyac duyduqlarını bildiriblər. Başqa sözlə desək, “Hayakve” qanunvericilik təşəbbüsü Ermənistan Respublikası adından Qarabağın başqa dövlətin bir hissəsi kimi tanınmasına (?) yönəlmiş istənilən hərəkəti cinayət saymağı təklif edir.
Konstitusiya hüququ üzrə mütəxəssis Aram Orbelyan təşəbbüslə bağlı deyib ki, Ermənistan konstitusiyasında səsvermə hüququna malik ən azı əlli min vətəndaşın vətəndaş təşəbbüsü kimi parlamentə qanun layihəsi təklif etmək hüququ təsbit olunub: “Söhbət qanunvericilik prosesinin öhdəlik hissəsi kimi vətəndaş təşəbbüsündən gedir. Yəni, əgər 50 min Ermənistan vətəndaşının imzasının toplandığı təsdiqlənən kimi o, qanun layihəsi kimi qəbul olunması üçün parlamentin gündəliyinə daxil ediləcək”. O, əlavə edib ki, Ermənistan vətəndaşları bununla ölkə tarixində ilk dəfə qanun layihəsinin müəllifi olacaqlar: “Biz bu qərara baş nazir Nikol Paşinyanın Qarabağı Azərbaycanın bir hissəsi kimi tanımağa hazır olması barədə bəyanatından sonra gəlmişik. Əsas məqsədimiz beynəlxalq strukturlara çatdırmaqdır ki, vətəndaşlar baş nazirin mövqeyinə qarşıdırlar və onun dediyinin əksinə olaraq, Qarabağı, anklavları Azərbaycana vermək istəmirlər”.
Qeyd edək ki, imzaların toplanması Ermənistanın bütün inzibati rayonlarında aparılır. İmza toplanılması üçün 60 gün (iyunun 21-dən avqutsun 19-dək) vaxt müəyyən olunub. Ancaq tələb olunan 50 min imzanın toplanılması indiyədək mümkün olmayıb. Təşəbbüsün icraçıları onu “vətəndaş təşəbbüsü” adı altında gizlətsələr də, onun arxasında dayanan əsas qüvvə keçmiş prezident Serj Sarkisyanın rəhbəri olduğu Respublika Partiyasıdır. Ona bu prosesdə Robert Koçaryanın qurub yaratdığı, lakin rəhbərliyi Seyran Ohanyanın etdiyi parlamentdəki “Hayastan” fraksiyası dəstək verir.
***
Sadə ermənilər isə müxalifətin bu təşəbbüsünə qarşıdırlar. “Araratnyus”un jurnalistləri İrəvan sakinlərinin bu mövzuya münasibətini öyrənməyə çalışaraq, onlardan imzatoplamada iştirak edib-etməyəcəklərini soruşublar. Çoxu yekdilliklə “yox!” cavabını verib. Bu cavablar Ermənistan əhalisinin radikal-revanşist kəsimi təşkil edən şəxslərə münasibətini üzə çıxarmaq baxımından əhəmiyyət daşıyır. İrəvan sakinlərindən biri deyib: “Əlbəttə, yox. Ona görə ki, müxalifəti ciddi qəbul etmirəm. Onların hərəkətləri sadəcə, gülüş doğurur. Siz deyirsiniz ki, onlar Qarabağı xilas etmək istəyirlər? Qoy, ora getsinlər və xilas etsinlər”. Digər bir erməni isə bildirib: “Onlar utanmazdırlar, başa düşürsünüz, utanmaz. Mən nəyə görə onların kələk klubunda iştirak etməliyəm?! Məgər normal və ağıllı insan buna gedərmi? Bu biveclərin başqa işi-gücü yoxdur. Ona görə də bu cür çirkin işlərlə məşğuldurlar. Siz deyirsiniz ki, onlar Qarabağı xilas etmək istəyirlər... Qoy, onlar özlərini xilas etsinlər. Qarabağ bəhanəsi ilə hakimiyyətə gəlməyə cəhd etmək bəsdir. Ermənistanın bütün bəlalarında məhz keçmiş hakimiyyətlər təqsirkardır. Amma onlar öz cinayətlərini Paşinyanın üstünə yükləyiblər. Onlar çirkin yollarla hakimiyyətə gələ biləcəklərinə ümid etməməlidirlər. Bu, heç zaman baş verməyəcək”.
Digər bir İrəvan sakini isə deyib: “Bu, müxalifətin ölkəyə xəyanətidir. Məgər Qarabağın Azərbaycanın tərkibində olub-olmayacağını “Hayakve” müəyyən edəcək?! Onların heç nəyi həll etmədiyi dəqiqdir. Niyə bu insanlar Qarabağ haqqında əvvəllər düşünmürdülər? Onlar öz zamanlarında (iqtidarda olanda-S.H.) ancaq ölkəni qarət etməklə və oğurluqla məşğul idilər. İndi bu metodla Qarabağı xilas etmək istəyirlər?! Bu, yalandır”.
***
Qarabağ ətrafında yaranmış duruma sadə ermənilər kimi politoloqlar, ictimai-siyasi şəxslər də öz münasibətlərini bildirirlər. Nəinki N.Paşinyana yaxın olanlar, hətta müstəqil şəxslər də müxalifətin bu təşəbbüsünün iflasa uğrayacağını vurğulayırlar. Politoloq Robert Gevondyan deyib ki, “Hayakve” təşəbbüsünün arxasında parlament müxalifəti dayanıb və onlar bununla daxili problemi həll etməyə çalışırlar: “Bu təşəbbüs üçün yetərli imzalar toplanılsa belə, “Hayakve” parlamentdə iflasa uğrayacaq. Onu da qeyd etməliyəm ki, hazırda Qarabağda daxili siyasi mübarizə gedir. Bu da məhz onların özünə ziyan vurur”.
Parlamentdəki “Vətəndaş razılaşması” fraksiyasının deputatı Akop Aslanyan isə “24nyus.am”a müsahibəsində deyib: “Mən bir dəfə demişəm, yenə təkrar edəcəm. Qarabağ 70 il ərzində Azərbaycanın tərkibində olub. Bütün bu illər ərzində insanlar orada sakit yaşayıblar və heç kim onları narahat etməyib. Bəs bu gün nə baş verib? Levon Ter-Petrosyan, Robert Koçaryan və Serj Sarkisyan da öz vaxtlarında Qarabağın Azərbaycanın tərkib hissəsi olduğunu tanıyıblar. Keçmiş hakimiyyətlər hər zaman Azərbaycana söz veriblər ki, onların torpaqlarını qaytaracaqlar. Bəs niyə qaytarmayıblar? Biz müharibəni bu gün uduzmamışıq. Biz 1994-cü ildən məğlub olmağa başlamışıq. Uzun illər keçmiş hakimiyyətlər dövlətçiliyimizi, ordumuzu, iqtisadiyyatımızı, təhsili məhv ediblər. Onlar ölkəni tamamilə qarət ediblər, acınacaqlı quberniyaya çeviriblər. Bu gün Arayik Arutyunyan oturaq aksiya keçirir. Bu necə olur? Qoy, əvvəlcə istefa versin, sonra bu cür işlərlə məşğul olsun. O, bununla heç nəyə nail ola bilməyəcək. Heç bir ölkə onu Qarabağ məsələsində dəstəkləməyəcək”.
A.Aslanyan daha sonra deyib ki, son illərdə Ermənistanı bir milyona yaxın insan tərk edib: “Bu, olduqca böyük rəqəmdir. İnsanlarda qorxu əmələ gəlib. Onlar yeni müharibədən ehtiyat edirlər. Çoxları uşaqlarının hərbi əməliyyatların qurbanı olmasını istəmirlər. Onlar müharibədə məğlub olmuş ölkədə yaşamağı ar bilirlər. Ona görə də buradan qaçırlar”.
Erməni politoloq Armine Adibekyan isə Paşinyanın əleyhinə olan fikirlər söyləyib: “Siz soruşursunuz ki, bütün ölkə Qarabağın Azərbaycanın tərkibində olmasına razıdırmı? Mən kinayə ilə deyirəm ki, hə, əlbəttə! Nikol Paşinyan bu məsələdə heç nəyi həll etmir. O, prosesin subyekti deyil və etiraz etmək hüququnu itirib. Ona hər şeyi diktə etmək olar və o, onları icra edəcək. Böyük oyun gedir. Bu oyunda Ermənistanın maraqları qurban verilir. Paşinyan və onun komandası bunlara görə cavabdehdir. Yeni müharibə başlaya bilər və biz buna hazır olmalıyıq. Bizim vəzifəmiz ordunu gücləndirmək və sərhədləri möhkəmləndirmək olmalıdır. Ancaq bundan əvvəl Paşinyanı və onun komandasını ciddi cəzalandırmaq lazımdır”.
***
Ermənistanda olduğu kimi Azərbaycanın Qarabağ iqtisadi rayonunda yaşayan haylar arasında da qovğa yaşanır. Bu istiqamətdə sonuncu hadisə separatçıların “parlamentinin sədri” Artur Tovmasyanın “istefa” verəcəyini açıqlaması olub. “Nyus.am” saytı bildirib ki, Tovmasyan “istefa”sını iyulun 27-də “parlamentin” “növbədənkənar sessiyasında” elan edəcək. “Sessiya” baş separatçı Arayik Arutyunyanın təşəbbüsü ilə çağrılıb. “İstefa”nın səbəbi Tovmasyanın səhhəti ilə əlaqələndirilsə də, onun son proseslər fonunda baş verməsi diqqətdən yayınmır. Görünür, Tovmasyan vəziyyətin həlledici qərarlar qəbul etmək tələb etdiyini düşünərək, məsuliyyətdən yayınmağa çalışır. O da bildirilir ki, artıq bu “vəzifə”nin kimə təklif olunacağı barədə qərar qəbul edilib.
İyulun 26-da A.Arutyunyanın, guya, keçirdiyi oturaq aksiyanı dayandırdığı açıqlanıb. O, bu barədə “Facebook” səhifəsində məlumat verib. Əlavə edib ki, aksiya nəticəsində müəyyən nəticələr (?) əldə etdiyinə inanır.
Separatçıların “dövlət naziri” Qurgen Nersisyan isə Rusiyanın yanaşmasını dözülməz adlandırıb. Nersisyan sosial şəbəkə hesabında yazıb: “Rusiyanın daim bəhanələr gətirmək və fəlakətli vəziyyətin (?) substantiv həllini təmin etməmək yanaşması dözülməz hala gəlir. Ermənistan hakimiyyəti bəyan edib və bəyan etməkdə davam edir ki, beynəlxalq mexanizm çərçivəsində Bakı-Xankəndi dialoqu zəruridir. “Artsax xalqı” da başa düşür ki, dialoq danışmaq, müzakirə aparmaq, hüquqlarımızı qorumaq, regionda sülhün bərqərar olmasına töhfə vermək üçün lazımdır. Amma Rusiya xarici işlər nazirinin dünənki bəyanatından belə məlum olur ki, Ermənistan dialoq zamanı müzakirə olunacaq məsələlərin spektrini artıq müəyyən edib, yaxud İrəvan Azərbaycanın təklif etdiyi müzakirə mövzusu ilə razılaşıb”.
Göründüyü kimi, separatçılar, guya, artıq hər zaman onları dəstəkləyən Rusiyadan da narazı olduqları barədə gözə kül üfürürlər. Onlar mövcud gərginliyin başa çatmasının yeganə yolunun Azərbaycana iqtisadi və sosial reinteqrasiyadan keçdiyini nə qədər tez anlasalar, bir o qədər yaxşı olar.
Rizvan HÜSEYNOV,
hərbi-siyasi şərhçi
– Ermənistanda müxalifətdə olan partiyaların təşəbbüsü ilə imzatoplama kampaniyasının keçirilməsi, yaxud digər tədbirlər heç bir effekt verməyəcək. Onlar bununla həm özlərini, həm də erməni cəmiyyətini aldadırlar. Çünki buna bənzər tədbirlər əvvəllər də baş tutub. Heç bir səmərəsi olmayıb. Keçmişdə hakimiyyətdə olanlar isə hər zaman olduğu kimi yenə də öz mənafelərini düşünürlər. Onların erməni xalqına zərrə qədər də faydası dəyməyib. İndi bu yolla gündəmə gəlmək istəyirlər. Ancaq unudurlar ki, onların dövranı keçib. Dövlət başçımızın dediyi kimi, “Miatsum” kitabı, separatizmin kitabı bağlanıb. Müstəqillik xülyası statusun dalınca gedib. Statusu isə biz hələ İkinci Qarabağ müharibəsi zamanı lazım olan yerə göndərmişik. Qarabağ ermənilərinin dünyaya haray-həşir salmağının heç bir mənası yoxdur. Yeganə yol Azərbaycan qanunlarına tabe olmaq, ölkəmizin normal vətəndaşlarına çevrilməkdir. Yalnız bu halda onların bütün çətinlikləri öz həllini tapacaq.
Səxavət HƏMİD, “Xalq qəzeti”