Qarabağdakı erməni separatçılarının lideri Arayik Arutyunyan 17 iyun gecə saatlarından etibarən oturaq aksiyaya başladığını elan edib. Yeni aksiya ilə əlaqədar ermənilərə müraciət edən Arayik onları oturaq aksiyada fəal iştirak etməyə səsləyib, Azərbaycana, habelə beynəlxalq təşkilatlara xitabən çoxsaylı tələblər irəli sürüb. O bildirib ki, “Xankəndinin blokadası”na son qoyulmalı, Laçın yolu açılmalı, “arsax xalqı”nın bütün tələbləri “təcili” yerinə yetirilməlidir. Baş separatçı qeyd edib ki, əgər onların tələbləri nəzərə alınmasa, o zaman “daha sərt tədbirlərə” əl atacaqlar.
Separatçılardan açıq terror hədəsi
Araik “daha sərt tədbirlər” deyəndə konkret hansı addımları atacaqlarını bidlirməsə də, separatçı liderin yeni terror aktlarını və təxribatları nəzərdə tutduğu şübhəsizdir. Aydındır ki, taleləri başqalarının yardımı və mərhəmətindən asılı olan erməni separatçılarının Azərbaycana nə hərbi, nə iqtisadi, nə də siyasi baxımdan təzyiq göstərmək imkanı var. Söhbət ancaq terror və təxribatdan gedə bilər ki, bu da Azərbaycana təzyiq üçün vasitə hesab edilə bilməz. Birincisi, ona görə ki, Azərbaycanın yaxın tarixi, 44 günlük Vətən müharibəsi onu göstərdi ki, ölkəmizlə terror və təhdid dili ilə danışmaq mümkün deyil. 2020-ci ilin 10 noyabr Bəyanatı, Ermənistanın imzaladığı kapitulyasiya sənədi ölkəmizlə terror dili ilə danışmaq istəyənlərin aqibətinə ən yaxşı sübutdur. Bu isə o deməkdir ki, Arayikin terror hədəsi Azərbaycan üçün praktiki baxımdan əhəmiyyət kəsb etmir. Baxmayaraq ki, bu bəyanat Qarabağdakı erməni separatçılarının niyyət və məramının beynəlxalq müstəvidə ifşa olunması baxımından mühüm faktdır və ölkəmiz ondan hökmən istifadə etməlidir.
Ağalarından Arayikə “İrəli!” komandası...
A. Arutyunyanın hədə-qorxu bəyanatı ilə bağlı maraq doğuran məqamlardan biri də bu bəyanatın niyə indi və hansı qüvvələrin dəstəyi ilə ortaya çıxması ilə bağlıdır. İxtiyarı öz əlində olmayan, hər zaman himayədarlarının göstərişi ilə hərəkət edən Arayikin məlum bəyanatı, sahiblərinin baş separatçıya “irəli!” komandası verdiyini göstərir. Məhz bunun nəticəsidir ki, 44 günlük müharibədə sağ qalmaq üçün Ermənistanın dərinliklərində gizlənən Arayik, birdən-birə cəsarətli bəyanatlar verməyə başlayıb. Post-müharibə dövründəki proseslərin təhlili göstərir ki, Qarabağdakı separatçılarının əsas himayədarlarından biri qismində Rusiya sülhməramlıları çıxış ediblər. Xankəndi və ətraf ərazilərə Ermənistandan qanunsuz silah-sursatın daşınması, separatçıların Azərbaycan Ordusunun mövqelərini atəşə tutmasına göz yummaları, Azərbaycan toponimlərini erməniləşdirmələri və s. kimi faktlar bunun isbatıdır. Rusiya sülhməramlılarının razılığı və dəstəyi olmadan Arayikin beynəlxalq aləmə meydan oxuması, Azərbaycanı sərt tədbirlərlə hədələməsi mümkün deyil. Onun son bəyanatının ikinci səbəbkarı isə rəsmi İrəvan, hökumətdəki revanşist qüvvələr ola bilər. Mümkündür ki, İrəvan Arayiki bu cür açıqlamalar verməyə sövq etməklə sülh müqaviləsinin imzalanmasını qeyri-müəyyən vaxta qədər təxirə salmağa çalışır. Ola bilsin, Paşinyan rejimi bununla göstərmək istəyir ki, Qarabağ ermənilərinin mövqeyi İrəvanın “sülhpərvər” mövqeyi ilə üst-üstə düşmür və buna görə də Qarabağdakı ermənilərin iradəsinə zidd hansısa sülh müqaviləsinin imzalanması mümkün deyil. Başqa sözlə desək, İrəvan Qarabağ separatçılarının sülh müqaviləsinin mümkün üçüncü tərəfi kimi “diriltməyə”, onları bir qüvvə kimi Azərbaycana qəbul etdirməyə çalışır. Hansı ki, sadə ermənilərlə dialoqa hazır olduqlarını bəyan edən Azərbaycanın separatçılarla masa arxasına əyləşməsi mümkün deyil və bu, ölkəmizin siyasi dəst-xəttinə, mili maraqlarına ziddir.
Sonrakı peşmançılıq fayda verməyəcək
Arayik Arutyunyanın “oturaq təxribat”ı, Azərbaycanın ünvanına təhdidlər səsləndirməsi baş separatçının “dəmir yumruq” həsrətində olduğunu göstərir. Arayikin ölkəmizi təhdid etməsi onu göstərir ki, Qarabağdakı separatçılara qarşı anti-terror əməliyyatının keçirilməsi artıq bir zərurət kimi meydana çıxmaqdadır. Əslində, bu açıqlama ölkəmizin Qarabağda yeni anti-terror əməliyyatı keçirməsini şərtləndirən ciddi arqumentlərdən biridir. İndiki şəraitdə belə bir əməliyyatın keçirilməsi ölkəmizin qanunları ilə yanaşı, beynəlxalq qanun və konvensiyalarla da təsbit edilən bir hüquqdur. Ölkəmizə qarşı ünvanlanan real terror təhlükəsinin qarşısını öncədən almaq, dövlətimizin və xalqımızın təhlükəsizliyini təmin etmək zərurəti belə bir əməliyyatı vacib edir. Şübhəsiz, anti-terror əməliyyatına start veriləcəyi təqdirdə 44 günlük Vətən müharibəsində olduğu kimi, Qarabağdakı separatçıları qısa zamanda darmadağın edəcəyi birmənalıdır. Ancaq Ordumuz bu əməliyyata başlayacağı təqdirdə Arayik belə bir suala cavab axtarmalı olacaq: Azərbaycan əsgərinin “dəmir yumruğ”undan qurtulmaq, qaçıb aradan çıxmaq üçün 44 günlük müharibədə olduğu kimi, bu dəfə də şansı onun üzünə güləcəkmi?
Seymur ƏLİYEV