Hayastan rəhbərliyinin Avropada və okeanın o tayındakı tərəfdaşlarının yardımı və təhriki ilə başladığı yeni “diplomatik kampaniya”nın konturları görünməkdədir. Məqsəd aydındır: özünə sərfəli variantı sülh danışıqları masasına daşımaq, dialoqun müxtəlif aspektləri üzrə Bakı ilə “kəllə-kəlləyə” gələ bilmək cəsarətini əldə etmək. Bundan ötrü Ermənistan son vaxtlar nüfuzlu beynəlxalq təşkilatların, yaxud belə institutların “patronajları” ilə danışıqlara baş vurur, onların ofislərinin yerləşdiyi ölkə və şəhərlərə səfərlər edirlər. Son otuz ildə Azərbaycana qarşı həyata keçirdikləri işğala, hər cür qanunsuzluqlara, tutduğu ədalətsiz mövqeyinə indi, quyruğu qapı arasında qalanda, “haqq qazandırmağa” çalışan hayların əli hər yerdən üzülüb. İndiyə qədər sal qaya kimi söykəndiyi şimallı “patronu” da indi ona yiyə durmaqdan vaz keçir. Bu da təbiidir. Üzləşdikləri hazırkı situasiyanın ssenari müəllifi məhz İrəvanın özüdür və o, indiki mərhələsində yalnız özündən küsməlidir.
Hesab edirik ki, bu mənada ötən il tərəflər arasında sülh dialoqunda ciddi dəyişikliklərə səbəb olmuş bir olayı oxuculara xatırlatmaq yerinə düşər. 2022-ci ildə Soçi görüşündən sonra danışıqlar prosesində yaranan fasilə məhz Kremlin “fəaliyyətinin” bəhrəsi idi. Keçən il bu formatda aparılan görüşləri və sülh danışıqlarını uğurlu hesab edən ekspertlər hətta ilin sonlarında sülh müqaviləsinin imzalananacağını proqnozlaşdırırdılar. Rusiyanın Soçi şəhərində “Valday” Beynəlxalq Diskussiya Klubunun XVIII konfransına qədər hadisələr Bakının irəli sürdüyü şərtlər çərçivəsində cərəyan edirdi. Məhz həmin konfransda Vladimir Putin Nikol Paşinyana xitabən “Siz Vaşinqton variantına razılıq verməklə Qarabağı Azərbaycanın tərkib hissəsi kimi qəbul edirsiniz”, – dedi. Əslində, bununla o, yalnız Paşinyana deyil, bütün ermənilərə xəbərdarlıq etmiş oldu. Rusiya liderinin həmin “ismarıcından” sonra sülh danışıqlarında fasilə yarandı. Bununla da ikitərəfli sülh danışıqlarının, sadəcə, formatı deyil, həmçinin məzmunu dəyişikliyə məruz qaldı.
Yalan həqiqət qiyafəsində
İrəvan bu dəstəyi əldə etməkdən ötrü son vaxtlar həm daxildə, həm də xaricdə diplomatik fəaliyyətini xeyli gücləndirib. Bu fəaliyyəti bir növ “gücləndirilmiş rejimli diplomatik kampaniya” da adlandırmaq mümkündür. İçəridə və çöldə təşkil etdikləri siyasi təmaslar da birbaşa bu kampaniyanın qaydalarına görə təşkil olunur. Hayastan Milli Assambleyasının vitse-spikeri Ruben Rubinyanın İrəvanda səfərdə olan Almaniya XİN-in Şərqi Avropa, Cənubi Qafqaz və Mərkəzi Asiya ölkələri üzrə idarəsinin siyasi direktoru Matias Lütenberqlə görüşü də elə bu qəbildən sayılmalıdır. Hayastan parlamentinin sədr müavini alman diplomatla görüşdə Azərbaycanın “Laçın dəhlizini qanunsuz bloklaması” nəticəsində “Dağlıq Qarabağda” əmələ gələn təhlükəsizlik və humanitar xarakterli “çətinliklərə” toxunub. Bu “problemlərin” BMT Beynəlxalq Məhkəməsinin məcburi icra qüvvəsinə malik qərarında da yer aldığını alman diplomatın nəzərinə çatdırıb.
Daha sonra Almaniya XİN rəsmisini Təhlükəsizlik Şurasının katibi Armen Qriqoryan qəbul edib. Həmin görüşdə də Qriqoryan yüksək qonağın diqqətinə “Dağlıq Qarabağ ətrafında yaranmış böhranı” çatdıraraq bu bölgədə “etnik təmizləmənin qarşısını almaq üçün beynəlxalq ictimaiyyətinin səylərini birləşdirməyin” vacibliyini xüsusi qeyd edib. Hayastan rəsmisi, həmçinin Avropa İttifaqının mülki missiyasının Ermənistandakı fəaliyyətini, onun regional təhlükəsizliyin saxlanmasında xidmətlərini yüksək qiymətləndirib.
Dünən isə Hayastanın xarici işlər naziri Ararat Mirzoyan Vyanaya işgüzar səfərə gedib. O, burada avsriyalı həmkarı ilə görüşəcək, ardınca mətbuat konfransı keçirəcək. Mirzoyanın əsas görüşləri beynəlxalq təşkilatların Avropadakı nümayəndələri ilə planlaşdırılıb. Elə səfərin əsas məqsədi də beynəlxalq institutların rəhbərləri ilə görüşmək, onlardan sülh danışıqlarında Ermənistanın yanında olmalarını xahiş etməkdir.
Kampaniyaya hərbçilər də cəlb olunub
Bəlkə İrəvanın məlum kampaniyada hərəkətverici qüvvəsi rolunda Rusiya XİN-in Bakıya ünvanladığı son bəyanatı çıxış edib. Axı həmin ziddiyyətli bəyanatda haylara “siyasi gediş ismarıcını” verən belə bir məqam da var: “Rusiya tərəfi “Dağlıq Qarabağın” (?) normal həyatını bərpa etmək üçün beynəlxalq ictimaiyyətin səylərinə fəal töhfə vermək niyyətini təsdiqləyir”. Baş separatçı Arayik Arutyunyanın Paşinyanın poçtalyonluğunu etdiyi Şarl Mişelə ünvanlanmış məktubunda nə yazdığını təxmin etmək olar: “humanitar böhran”, “etnik təmizləmə”, “120 min erməninin acından ölmək təhllükəsi” və bu qəbildən “əzabkeş xalqın” miskin obrazının təqdimatı. Timsahın göz yaşlarını tökməklə problemlərini həll etməyə uğursuz cəhdlər edən hayları dünya artıq yaxşı tanıyır və onların saxta göz yaşlarına inanmır. Qərbin bəzi aktorları artıq bunu açıq şəkildə büruzə verməyə başlayıblar. İrəvan isə əsl simalarının hələlik tam ifşa olunmadığı okeanın o tayından nələrisə ummağa girişib. İyulun 17-18-də Ermənistan silahlı qüvvələrinin baş qərargah rəisi, müdafiə nazirinin birinci müavini Edvard Asryanın ABŞ-a işgüzar səfəri bu mənada maraqlı assosiasiyalar doğurur. Asryan Vaşinqtonda Amerika Milli Qvardiyasının tərəfdaşlıq proqramının 30 illiyinə həsr olunmuş konfransda iştirak edib. Tədbir çərçivəsində E.Asryan ABŞ Milli Qvardiyası bürosunun rəisi general Daniel Hokanson, ABŞ-ın Avropa Komandanlığının strategiya, planlaşdırma və siyasi məsələlər üzrə direktoru, general-mayor Daniel Lasik, eləcə də Kanzas ştatının general-adyutantı, Milli Qvardiyanın komandiri, briqada generalı Maykl Venerdi ilə görüşlər keçirib. Həmin görüşlərdə Ermənistan-ABŞ əməkdaşlığının hazırkı səviyyəsi və inkişafın perspektivləri müzakirə edilib. Əlbəttə, hərbi və məxfi xarakter daşıyan İrəvan-Vaşinqton təmaslarının Amerikadakı güclü erməni lobbisinin yaxından yardımı ilə təşkil olunduğunu güman etmək olar. Hər halda Hindistandan istədiyi silah-sursatı ala bilmədiyi deyilən Hayastan iqtidarının bu məsələni Vaşinqtonla müzakirə edə biləcəyi də istisna olunmur.
Qatar hələ keçməyib
İndi isə qayıdaq Cənubi Qafqaza, daha doğrusu, burada söz sahibi olmaq hüququnu əlində möhkəm tutmağa çalışan Rusiya amilinə. Kremldən ötrü Ermənistan-Azərbaycan münasibətlərinin nizamlanması, eləcə də sülh danışıqlarının müsbət sonluğa qovuşması kənar vasitəçilərin təşkil etdiyi platformalarda, masalarda mümkün deyildir. Üstəlik, Moskva bir daha sülhün hələ tez olduğunu rəsmən bəyan etdi, “Dağlıq Qarabağ ermənilərinin təhlükəsizliyi, statusu” barədə açıq söylədi. Ətrafında diskussiyası səngiməyən Rusiya XİN-in bu bəyanatının hansı zərurətdən doğduğu bəlli olsa da, onu indiki mərhələdə yetişdirən amillər maraq doğurur. Kremlin bu bəyanatı bəlkə Türkiyə Prezidenti Rəcəb Tayyib Ərdoğanın NATO-nun Vilnüs Zirvəsində 2025-ci ildə Rusiyanın Qarabağı tərk etməsi ilə bağlı verdiyi açıqlamaya cavabdır? Ola bilər. Biz artıq Qərbin məqbul təşəbbüslərindən sonra Kremlin belə siyasi jestlərinə adət etmişik. Ukrayna müharibəsi ilə əlaqədar Cənubi Qafqaza diqqəti azalan Rusiya əlini hələ bu bölgədən çəkməyib. Onun niyyəti 2030-cu ilədək Qarabağda qalmaqdır. Əslində zəfərimizlə başa çatan 44 günlük müharibədən sonra onun bugünədək apardığı “antisülh missiyası”nın nüvəsində bu amil dayanır. Moskva üçün “qatar hələ keçməyib”, amma hər şeydən göründüyü kimi, əvvəl-axır Qafqaz eşolonu onun əlindən çıxacaq.
Sərsəm başların çarəsi...
İndi özlərinə dəstəkçi aradıqları Qərbin bir çox dövlətlərinin, eləcə də beynəlxalq təşkilatların son iki-üç ildə hayları necə varsa, eləcə tanımaq imkanları oldu. Yalana, böhtana, təhrifə dövlət səviyyəsində rəvac verən İrəvanın döydüyü qapılardan əliboş dönməsinin əsas səbəbi də məhz budur. Qərbin ikiüzlülüyündən gileylənən, “Bəs biz Qarabağı otuz il necə saxladıq?”– deyə təəccüblənən ABŞ-ın Stenford Universitetinin siyasi elmlər doktoru Artur Xaçikyan Ermənistan rəhbərliyini bu cür ittiham edir: “Əgər Ermənistanın kadastr şəhadətnaməsi olmadığını düşünürdünüzsə, niyə beş il əvvəl hakimiyyətə gəldiniz. Bu adamlar müharibəni, sülh danışıqlarını, korrupsiyaya qarşı mübarizəni iflasa uğratdılar, demokratik ölkə qura bilmədilər. Demokratik ölkədə məmur vətəndaşın üzünə tüpürməz, ölən hərbçilərin valideynlərinə belə qəddar münasibət göstərilməz. Son 105 ildə erməni xalqı belə ağır vəziyyətdə olmayıb. Cəmiyyətimizin davranışı da anlaşılmazdır. Xalqımız sanki narkotikin təsiri altındadır”.
Amerikalı erməni alimin gəldiyi son qənaət Hayastan cəmiyətinin hazırkı ictimai-siyasi, sosial-psixoloji mənzərəsini tam çılpaqlığı ilə təsvir edir. Onun soydaşlarının təsirinə məruz qaldığı “natkotik”in adı isə iki əsrdir beyinlərini yuyan şovinizm, daşnakçılıq, “miatsumizm”, qonşularına qarşı torpaq iddiaları kimi mərəzlərdir. Bunun müalicəsini isə dünyanın dörd tərəfində axtarmağa dəyməz. Pozulmuş başlarının çarəsəni özləri tapmalıdırlar...
Fərhad MƏMMƏDOV,
politoloq
Azərbaycan sülh danışıqlarında Ermənistanın destruktiv mövqeyindən geri çəkiləcəyini gözləyir. Bu, beynəlxalq səviyyədə tanınmış sərhədlər, o cümlədən beynəlxalq hüquq çərçivəzində normal prosesdir. Liderlər səviyyəsində aparılan danışıqların əsas leytmotivi budur və misal üçün, Brüssel formatında faktiki hər mövzunu müzakirə etmək mümkündür. Ermənistan hökuməti “Dağlıq Qarabağ (?) problemini” müxtəlif beynəlxalq platformalarda müzakirə predmetinə çevirməyə cəhdlər göstərir. Azərbaycan isə deyir ki, yaxşı, siz bizim 86,6 min kvadratkilometrlik ərazimizdən danışırsınız, amma öz hərəkətləriniz ilə bəyanatınızı gözdən-nüfuzdan salırsınız. Dediyinizə müvafiq olaraq, əslində, belə hərəkətlərə son verməməlisiniz. Ya da biz sizi buna son qoymağa məcbur edəcəyik. Prinsip etibarı ilə Bakı bunun bir addımlığındadır.
Qərb ictimaiyyəti nəyə görəsə belə düşünür ki, Ermənistan rəhbərliyi əlindən gələni edib. Bu zaman onlar əsas arqument kimi Paşinyanın Azərbaycanın ərazi bütövlüyünü tanımasını göstərirlər. Hesab edirəm ki, Bakı bu nəticəyə danışıqlar vasitəsilə deyil, güc tətbiqi ilə nail olub. Əgər keçən ilin sentyabrında Azərbaycan Ordusunun uğurlu hərbi əməliyyatı olmasaydı, Paşinyan Praqada məlum etirafı etməzdi. İndi onlar vaxt qazanmaq, müxtəlif üsullara əl atmaq istəyirlər. Qarşıdakı beş-altı ayda real nəticə əldə olunmalıdır.
İmran BƏDİRXANLI, “Xalq qəzeti”