Azərbaycanın İnsan Hüquqları üzrə Müvəkkili (Ombudsman) Ermənistan tərəfindən əsir götürülmüş və qanunsuz olaraq azadlıqdan məhrum edilmiş Azərbaycan hərbi qulluqçusunun həbs müddətinin uzadılmasına etiraz edib.
Bəyanatda əsir götürülmüş Azərbaycan Ordusunun əsgərləri Bəbirov Aqşin Qabil oğlunun və Axundov Hüseyn Əhliman oğlunun saxta ittihamlarla azadlıqdan məhrum edildikləri xatırlanıb:
“Bu dövr ərzində onlar vəkillə təmin olunmayıb, müxtəlif işgəncələrə və pis rəftara məruz qalıb və beləliklə də beynəlxalq hüquq normaları kobud şəkildə pozulub.
Təəssüflə qeyd etmək istərdik ki, bu məsələ ilə bağlı dəfələrlə edilən müraciətlərə baxmayaraq, düşmənçilik mövqeyini hələ də davam etdirən Ermənistan hakimiyyəti həmin şəxslərin həbs müddətini uzatmaqla növbəti dəfə beynəlxalq hüququn tələblərini heçə sayaraq, aparılan sülh danışıqlarına zərbə vurmaq niyyətini nümayiş etdirib.
Sənəddə Ermənistan tərəfindən bu günlərdə onların həbs müddətinin uzadılması ilə bağlı verilmiş qərəzli “qərar”ın beynəlxalq hüququn norma və prinsiplərinə tamamilə zidd olduğu bildirilir və əsgərlərimizin dərhal azad olunması bir daha qəti şəkildə tələb edilir.
***
Xatırladaq ki, 2 gün əvvəl Ermənistan məhkəməsi əlverişsiz hava şəraitində məhdud görmə səbəbindən yolu azaraq Ermənistan tərəfə keçən və orada əsir saxlanılan hərbçimiz Hüseyn Axundovun həbs müddətini 3 ay uzadıb. Məhkəməsi mayın 8-də digər hərbçi qulluqçumuz Aqşin Bəbirovu 11,5 il müddətinə azadlıqdan məhrum edib.
