Belə çıxır ki, Azərbaycanın Xarici İşlər Nazirliyinin ölkəmizin vətəndaşlarının başqa məmləkətə səfərlərinə məhdudiyyət qoymalarının vacibliyi ilə bağlı çağırış yayması düzgün deyilmiş. Burada söhbət heç də yalnız ondan getmir ki, çağırış İrana səfərlə bağlı idi. Yəni, İranın Xarici İşlər Nazirliyinin rəsmi nümayəndəsi Nasser Kannaninin özünün sosial şəbəkə hesabında yazdıqlarının məntiqini anlamaq çətindir. Nəhayət, haranı öz vətəndaşı üçün təhlükəli görməsi Azərbaycan XİN-in öz işidir. Nəzərə alaq ki, qurumun açıqlamasında səbəblər də sadalanmaqdadır. Üstəlik, Azərbaycan vətəndaşı olan tələbə gəncin İranda qanunsuz saxlanılması və ona cinayət işi açılması faktı var. Amma məsələ təkcə bu deyil.
Əlbəttə, N.Kannaninin etiraz haqqına sözümüz yoxdur. Hərçənd, onun başqa dövlətin rəsmi qurumunun öz vətəndaşlarına səslənməsindən narahatlıq keçirməli olmadığı düşüncəsindəyik. Həm də o düşüncədəyik ki, İran kimi ölkənin xarici siyasətindən məsul şəxsin söylədikləri köhnə stereotiplərə əsaslanmamalıdır. Hansı köhnə stereotiplərə, bu barədə söz açmazdan əvvəl bildirək ki, İran XİN-in rəsmi nümayəndəsinin fikirlərində xoş niyyət ifadəsinə oxşayan məqamlar da var.
Məsələn, Kannani bildirir ki, İslam Respublikası qarşılıqlı hörmət çərçivəsində dostluq xarakteri daşıyan siyasətini davam etdirmək niyyətindədir. Onun mövcud xüsusda vizanın ləğvi və azərbaycanlı bacı-qardaşlara qucaq açmaq kimi müsbət ritorikasını təqdir etmək mümkündür. Ancaq o deməməlidir ki, “Azərbaycan xalqı sivil islami İrandan deyil, İsrail rejimindən qorxmalıdır”. Niyə belə deməməlidir, çünki Azərbaycan XİN-in açıqlamasında kifayət qədər konkretlik var. Yaxşı olardı ki, İran rəsmisi bu konkretliyə reaksiya verəydi. O zaman daha səmimi təsir bağışlayardı. İndilik isə onun mövqeyi səmimi yox, qıcıq ehtimalı olan hərəkət kimi qiymətləndirilməkdədir.
***
Azərbaycan dövləti öz vətəndaşlarını zərurət olmadığı təqdirdə, İrana səfər etməməyə çağırmaqla, vurğunu bu il yanvarın 27-də Tehranda səfirliyimizə olunmuş silahlı basqının üzərinə qoyur. Məlum olduğu kimi, sözügedən terror aktı zamanı İran vətəndaşı Yasin Hüseynzadə əlindəki avtomat silahla ali diplomatik missiyamızın binasına daxil olmuş, mühafizə xidmətinin rəisi Orxan Əsgərovu qətlə yetirmişdi. Hadisə nəticəsində daha bir şəxs yaralanmışdı. Yalnız mühafizə xidmətinin əməkdaşı Vasif Tağıyevin cəsarəti - yalın əllə silahlı terrorçunu zərərsizləşdirməsindən sonra hücumun qarşısı alınmışdı. Həmin vaxt səfirliyimizin binasının qarşısında dayanmış İran polisinin terrorçuya loyal yanaşması, sərbəst şəkildə qapıdan içəri girməsinə göz yumması diqqət çəkmişdi. Bunu təhlükəsizlik kameraları da qeydə almışdı.
Azərbaycanın XİN-in məlumatı bir məqamın üzərinə yenidən qayıdılmasını zəruriləşdirməkdədir. Əlbəttə, məlum terror aktından əvvəl də İranın Ermənistan təəssübü, eləcə də ölkədəki bəzi siyasi dairələrin anti-Azərbaycan çıxışları səbəbindən, Bakı ilə Tehran arasında gərginlik hökm sürürdü. Lakin sözügedən qanlı olay gərginliyi daha yüksək səviyyəyə qaldırdı desək, yanılmarıq. Hətta, müəyyən beynəlxalq dairələrdə ölkəmizlə İslam Respublikası arasında müharibə riskinin yarandığı da vurğulanmağa başlandı. Bu sayaq mülahizələr fonunda terrorçunun, bir növ, kultlaşdırılması, eləcə də onun barəsində zəruri hüquqi ölçü tədbirinin götürülməməsi, guya psixi problemlərinin olduğu önə çəkilib məsuliyyətdən uzaq tutulması əsəbləri bir qədər də tarıma çəkdi.
Nəhayət, Azərbaycanın İrandakı səfirliyi fəaliyyətini dayandırdı. Diplomatik missiyamızın əməkdaşları və onların ailələri xüsusi reyslə ölkəmizə gətirildi. Hazırda səfirliyin missiyasını Təbrizdəki konsulluğumuz yerinə yetirməkdədir. Azərbaycan XİN həm də buna görə İrana səfərə getməməyi tövsiyə edir. Nəzərə alaq ki, Təbrizdəki konsulluq məhdud təmsilçilik deməkdir və onun vətəndaşlarımızın hüquqlarının qorunmasında aktiv iştirak edə bilməməsi anlaşılandır. Axı İran böyükdür və kiçik diplomatik missiya ölkənin hər yerində təsirə malik deyil.
Azərbaycan XİN-in açıqlamasındakı vacib xüsuslardan biri də İrana məcburiyyət qarşısında səfər edənlərin yüksək ehtiyatlılıq nümayiş etdirmələrinin vacibliyinin vurğulanmasıdır. Nazirlik bunu kəskin şəkildə tövsiyə edir. Qurumun məlumatında, həmçinin, İslam Respublikasında olan vətəndaşlarımıza mühafizə və təhlükəsizlik qaydalarına riayət etmək də tələb olunur ki, bu da özlüyündə diqqətçəkən məqam sayıla bilər. Görünür, cənab Kannanini bu da narahat edir.
Yazımızda Azərbaycan cəmiyyətini İrandan narazı salan məqamları açıqladıq. Yaxşı olardı ki, ölkənin XİN rəsmisi həmin məqamlardan da danışaydı. Məsələn o, bildirə bilərdi ki, Azərbaycan səfirliyinə hücum faktı araşdırılır. Tədbirlər görülür ki, nəinki azərbaycanlılar, digər dövlətlərin vətəndaşları da terror xofundan uzaq dursunlar, İranda özlərini təhlükəsiz mühitdə hiss etsinlər. Yəni, cənab Kannani bunları deyə, daha doğrusu, yaza bilərdi. Yazmadı və İranın Azərbaycan dövlətinə ittihamındakı ənənəvi İsrail xəttini əsas götürdü. Bu isə onun fikirlərindəki xoş məqamları da ikinci plana keçirdi. İndi biz neynəyək? İran-Ermənistan sarsılmaz qardaşlığının “İslamdan irəli gələn ən böyük məziyyət olduğunu tirajlayaq? Bildirək ki, İrəvana qucaq açmaq Tehran üçün həyati vacib məsələdir? İstəmirik axı, belə şeyləri yada salıb qan qaraldaq. Arzu edərdik ki, cənab Kannani də bunu düşünsün.
R.ƏVƏZ. “Xalq qəzeti”