Dünyanın inkişaf etmiş ölkələrində nəqliyyat parkının yenilənməsi məqsədilə istismar müddəti keçmiş avtomobillər utilizasiya prosesinə cəlb edilir. Artıq bu sahədə beynəlxalq təcrübə də formalaşıb. Hətta köhnə avtomobillərin utilizasiyası ilə məşğul olan iri şirkətlərin sayı 200-ü ötüb.
Son illər ölkəmizdə də bu məsələ getdikcə aktuallığını artırır. Belə ki, “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nda ölkəmizdə yol hərəkətinin təhlükəsizlik səviyyəsini yüksəltmək, ekoloji vəziyyəti yaxşılaşdırmaq, eləcə də yerli avtomobil istehsalını stimullaşdırmaq məqsədilə köhnə, texniki-təhlükəsizlik və ekoloji cəhətdən yararsız nəqliyyat vasitələrinin utilizasiya proqramının hazırlanması və tətbiqi nəzərdə tutulub. Bundan əlavə, “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nda istismarı ekoloji cəhətdən zərərli sayılan fiziki və mənəvi cəhətdən köhnəlmiş nəqliyyat vasitələrinin idxalının və istifadəsinin məhdudlaşdırılmasına dair tədbirlərin görülməsi qeyd olunur.
Milli Məclisin iyunun 6-da keçirilən iclasında “İstehsalat və məişət tullantıları haqqında” qanuna dəyişikliklər müzakirəyə çıxarılıb. Dəyişikliklərdə Azərbaycanda istehsal-buraxılış vaxtından 4 il keçən minik avtomobilləri üçün utilizasiya haqqının müəyyənləşdirilməsi, köhnə avtomobillərin utilizasiyası fondunun yaradılması, köhnə avtomobilləri utilizasiyaya verən şəxslərə yeni avtomobil alan zaman güzəşt tətbiq edilməsi, avtomobillərin utilizasiyaya verilməsi prosedurunun müəyyənləşdirilməsi, avtomobillərin utilizatorlarının reyestrinin aparılması və s. nəzərdə tutulur. Xatırladaq ki, qanun layihəsi səsverməyə çıxarılaraq birinci oxunuşda qəbul edilib. Dəyişikliklər isə 2024-cü il sentyabrın 1-dən qüvvəyə minəcək.
Qeyd edək ki, layihəyə əsasən, “Tullantılar haqqında” qanunla müəyyənləşdirilmiş qaydada utilizasiyaya verilməzdən əvvəl nəqliyyat vasitəsi dövlət qeydiyyatı üzrə daimi uçotdan çıxarılmalıdır. Bu məqsədlə nəqliyyat vasitəsinin sahibi və ya sərəncam vermək hüququ olan digər şəxs tərəfindən aidiyyəti orqanlara müraciət edilir. Müraciət qəbul edildikdən sonra 3 iş günü müddətində həmin orqan tərəfindən araşdırma aparılaraq nəqliyyat vasitəsinin dövlət qeydiyyatı üzrə daimi uçotdan çıxarılması və ya səbəblər göstərilməklə dövlət qeydiyyatı üzrə daimi uçotdan çıxarılmasından imtinası barədə qərar qəbul edilir və müraciət edən şəxsə bu barədə yazılı məlumat verilir.
Eyni zamanda, “İstehsalat və məişət tullantıları haqqında” qanuna edilən dəyişiklikdə Azərbaycanda güzəştin və birdəfəlik ödənişin maliyyələşdirilməsi, habelə nəqliyyat vasitələrinin utilizasiyası üzrə tədbirlərin stimullaşdırılması və təşviqi məqsədilə müvafiq icra hakimiyyəti orqanının müəyyən etdiyi orqan (qurum) tərəfindən nəqliyyat vasitələrinin utilizasiya fondunun yaradılması nəzərdə tutulur. Yeri gəlmişkən, nəqliyyat vasitələrinin utilizasiyası fondu məqsədli büdcə fondu sayılır. Fondun utilizasiya haqqı, kreditlər və qrantlar, hüquqi və fiziki şəxslərin könüllü ianələri, beynəlxalq təşkilatların və digər donorların ayırmaları, eləcə də qanunla qadağan olunmayan digər mənbələr kimi müstəqil mədaxil mənbələri hesabına maliyyələşəcəyi nəzərdə tutulur. Nəqliyyat vasitələrinin utilizasiyası fondunun vəsaitinin formalaşdırılması və istifadə qaydasını müvafiq icra hakimiyyəti orqanının müəyyən etdiyi qurum müəyyən edəcək.
Bununla belə, Milli Məclisin deputatı Vüqar Bayramov hesab edir ki, ölkəmizdə utilizasiya ilə bağlı ayrıca qanunun qəbul olunmasına ehtiyac var. İstehsalat tullantılarının utilizasiyası ilə maşınların utilizasiyasının fərqli proses olduğunu düşünən deputat bildirib ki, ABŞ və Avropa ölkələrində utilizasiya prosesi 12 il müəyyən edildiyi halda, bizim layihədə bu, 4 il nəzərdə tutulur. Bunun əsaslandırılmasına ehtiyac duyulduğunu vurğulayan deputat bildirib ki, müddətin az götürülməsi idxal avtomobillərinin xərclərini də artıracaq.
Ərşad HÜSEYNOV,
nəqliyyat üzrə ekspert
Utilizasiya müasir dövrdə istifadəyə yararsız avtomobillərin yığışdırılmasının texnoloji qaydalara uyğun mədəni bir prosedurudur. Qabaqcıl ölkələrdə yararsız avtomobillərin dövriyyədən çıxarılması, onun müəyyən materiallarının təkrar emal edilməsi və onlardan imkan daxilində yenidən istifadə olunması üçün belə bir üsul tapılıb. Utilizasiyanın əsas hədəfi odur ki, həm yol hərəkətinin təhlükəsizliyi, həm də ekoloji baxımdan istismara yararsız avtomobillər dövriyyədən çıxarılsın. Onların müəyyən materialları: metal, polimer və plastik materialdan olan hissələri, təkərləri, şüşələri təkrar emala yönəldilsin, yaxud da ətraf mühit üçün zərərsiz hala gətirilsin.
Ölkəmizdə avtomobilləşmə prosesi sürətlənməkdədir. Ona görə də köhnə, istismara yarasız avtomobillərin sayı artdıqca utilizasiyaya ehtiyac yaranır. Artıq bu ehtiyacın qarşılanması üçün müəyyən hüquqi addımların atılmasına başlanılıb. Prinsipcə utilizasiya könüllü bir prosesdir. Utilizasiya xüsusi ayrılmış subyektlər, yəni utiluzator tərəfindən həyata keçirilməlidir. Utilizatorun əsas funksiyası isə köhnə, istismara yararsız avtomobilləri təhvil almaq, onları imkan daxilində təkrar emal etməkdən ibarət olacaq. Bundan başqa, utilizasiya könüllü proses olmaqla yanaşı, onun həyata keçirilməsində müəyyən bir inzibatçılıq və həvəsləndirmə tədbirlərinin də tətbiqi nəzərdə tutulur. Həvəsləndirmə tədbirləri isə ondan ibarət olacaq ki, özünün köhnə, yararsız avtomobilini utilizasiyaya verən vətəndaş təsdiqləyici sənəd əldə edəcək. Həmin sənəddə də utilizasiyaya verilmiş avtomobilin əvəzində avtomobil sahibinə müəyyən güzəşt nəzərdə tutulacaq. Güzəştin məbləğini isə Prezidentin müəyyən etdiyi orqan təyin edəcək. Böyük ehtimalla bu orqan Nazirlər Kabineti olacaq.
Vətəndaşlara ödəniləcək güzəşt utilizasiya fondunun vəsaitləri hesabına təmin ediləcək. Bunun üçün Nazirlər Kabineti müəyyən qaydalar qəbul edəcək. Utilizasiya fondunun vəsaitləri isə, avtomobil sahibləri tərəfindən edilmiş ödənişlər hesabına formalaşdırılacaq. İstehsal olunduğu vaxtdan 4 ildən çox müddət keçmiş avtomobillər istər ölkəyə gətirilərkən, istərsə də ölkə daxilində istismar olunarkən utilizasiya fonduna ödənişlər edilməlidir. Yeri gəlmişkən, xaricdən idxal olunan avtomobillərə görə utilizasiya fonduna ödəniş gömrük rəsmiləşdirilməsi, daxildə dövriyyədə olan avtomobillərə görə utilizasiya fonduna ödəniş isə texniki baxış zamanı ediləcək.
Bütövlükdə isə, utilizasiya ilə bağlı lazımi təbliğat və təşviqat işləri aparılsa, həvəsləndirmə tədbirləri qaydasında olsa, ölkənin avtomobil parkında istismara yararsız, ömrünü başa vurmuş maşınların dövriyyədən çıxarılması xeyli asanlaşacaq. Bu da ölkənin ayrı-ayrı yerlərini köhnə avtomobillərin qəbristanlığına çevirməkdən xilas edər. Yeri gəlmişkən, bu problem planetimizin hər yerində olduğu kimi, ölkəmizdə də müşahidə olunur. Düzdür, bizdə əhali sayı o qədər də çox deyil, avtomobilləşmə səviyyəsi cəmi 13-14 faiz təşkil edir. Amma planetimizdə 1 milyarddan artıq minik avtomobili var. Bununla yanaşı, hər il 80-100 milyona yaxın yeni minik avtomobili istehsal olunur. Təsəvvür edin, utilizasiya olmasa, bir neçə ildən sonra milyardlarla avtomobil haralardasa yığılıb qala bilər. Ölkəmizdə bu məsələ, hələlik, ciddi narahatlıq yaratmasa da, yaxın illərdə vəziyyət dəyişə bilər. Düşünürəm ki, utilizasiya könüllü və digər prinsiplər əsasında ədalətli şəkildə həyata keçirilsə, köhnə, istismara yararsız avtomobillərin küçələrdən, yollardan yığışdırılması işi rahat olar.
Mirbağır YAQUBZADƏ, “Xalq qəzeti”