Ötən əsrin 90-cı illərindən start götürən rəqəmsallaşma prosesi cəmiyyətin yüksək tərəqqisi üçün yeni imkanlar yaradıb. Xatırladaq ki, rəqəmsallaşma kağız daşıyıcılarındakı məlumatların elektronlaşdırılması, internet resursuna çevrilməsidir. Artıq dünya ölkələri “Dördüncü Sənaye İnqilabı” prosesində lider mövqeyinə yüksəlmək üçün innovativ texnologiyaların, elektronlaşmanın bütün imkanlarından maksimum yararlanmağa çalışırlar.
Son illər dünya iqtisadiyyatına inteqrasiya yolunu seçmiş Azərbaycan Respublikası da mühüm enerji və nəqliyyat-logistika layihələrinin təşəbbüskarı və əsas iştirakçısı kimi bütün sahələrdə rəqəmsallaşmaya keçid mərhələsinə qədəm qoyub. Hazırda ölkəmizdə rəqəmsal texnologiyalardan istifadəyə daha çox üstünlük verilir, bu istiqamətdə mühüm tədbirlər həyata keçirilir. Məhz bunun nəticəsidir ki, ölkəmizdə rəqəmsal iqtisadiyyatın qurulması, innovasiyaların tətbiqi getdikcə daha çox aktuallıq kəsb edir.
Müasir neft-qaz sənayesini innovativ texnologiyalardan ayrı təsəvvür etmək çətindir. Artıq beynəlxalq təcrübə də bu sahədə əldə olunmuş yüksək uğurlardan xəbər verir. Belə ki, bir sıra qabaqcıl konsaltinq şirkətlərinin araşdırmaları sübut edir ki, rəqəmsallaşma neft-qaz sahəsində 100 milyard dollaradək vəsaitə qənaət etməyə imkan verə bilər. Bununla yanaşı, audit və konsaltinq xidmətləri göstərən tanınmış beynəlxalq şirkətlərin analitikləri də hesab edirlər ki, hazırda bazarda təmsil olunan rəqəmsal həllərin əksəriyyəti məhz neft-qaz sənayesində əməliyyat xərclərinin azalmasına xidmət edir. Neft və qaz sənayesində rəqəmsal keçid istehsal gücünün artması, vaxta və vəsaitlərə qənaət, daha təhlükəsiz əməliyyatlar, eləcə də resursların rasional idarə olunmasına imkan yaradır. Eyni zamanda, süni intellektə qoyulan investisiyaların neft və qaz sahələrində məhsuldarlığı artırmağa imkan verəcəyi də bu üstünlüklər sırasındadır.
Azərbaycanın karbohidrogen ehtiyatlarının xarici şirkətlərlə birgə işlənməsini nəzərdə tutan neft-qaz sazişlərinin işlək platformaya çevrilməsi ilə əlaqədar ölkəmizə mütərəqqi texnologiyaların, qabaqcıl təcrübələrin axını xeyli güclənib. Belə bir şəraitdə ölkəmizin neft-qaz sənayesi də rəqəmsal texnologiyalara keçid etməyə başlayıb. Elə mayın 31-də neft, qaz və enerji sektorunda əhəmiyyətli bir platformaya çevrilmiş Bakı Enerji Həftəsi çərçivəsində keçirilmiş “Neft və qaz sənayesində rəqəmsallaşma və avtomatlaşdırma sahəsində innovasiyalar” mövzusunda xüsusi panel müzakirəsinin keçirilməsi də təsadüfi deyildi.
Məlum olduğu kimi, bir neçə il əvvəl Azərbaycan Dövlət Neft Şirkəti (SOCAR) rəqəmsal transformasiya proseslərinin idarə olunması üçün Xəzər İnnovasiya Mərkəzini (CIC) təsis edib. Artıq CIC SOCAR-da istifadə olunan bütün proqram təminatını ətraflı təhlil edib və optimallaşdırmaya ehtiyac olan sferaları müəyyənləşdirib. Mərkəz 2018-ci ildən isə kəşfiyyat və hasilat sahəsində rəqəmsal layihələrin reallaşdırılmasına başlayıb. Hazırda çoxsaylı risk və qeyri-müəyyənliklərin mövcud olduğu qazma sektoru tamamilə SAP ERP platformasına arxalanır. Burada bütün proseslər, o cümlədən planlaşdırma, qazma və buruqların istismara verilməsi prosesləri avtomatlaşdırılıb.
2021-ci il aprelin 9-da “SOCAR Tower”də istehsalat əməliyyatlarının vahid rəqəmsal mərkəzdən idarə olunması, ixtisaslaşmış sahələr üzrə xüsusi toplantıların keçirilməsi, iri həcmli və kritik layihələr üzrə müzakirələr aparılması, operativ qərarların qəbul edilməsi, eləcə də böhran vəziyyətləri və fövqəladə halların idarə olunması funksiyalarının yerinə yetirilməsi üçün nəzərdə tutulmuş Vizualizasiya Mərkəzi istifadəyə verilib. Bundan əlavə, artıq uzun illərdir ki, SOCAR-da biznes proseslərinin avtomatlaşdırılması ilə yanaşı, korporativ rəqəmsal idarəetmə platformasının yaradılması da uğurla davam etdirilir. Bu proses hazırda şirkətin bütün əsas fəaliyyət sahələrini əhatə edir. Yeri gəlmişkən, şirkətin Neft Mədən Korporativ Verilənlər Bazasında Azərbaycanın neft-qaz sənayesi tarixində indiyədək qazılmış, hazırda istismarda olan və istismar fondundan çıxarılmış 44 min quyunun 50 faizdən çoxu artıq rəqəmsallaşdırılıb. Hazırda mütəxəssislər həmin bazadan istifadə edərək interpretasiya proqram təminatı vasitəsilə yataqların modelini qura bilirlər.
Azərbaycan Respublikası Elm və Təhsil Nazirliyi İnformasiya Texnologiyaları İnstitutunun şöbə müdiri, dosent Yadigar İmamverdiyev hesab edir ki, rəqəmsallaşma ilə neftvermə əmsalını 45-50 faizə çatdırmaq mümkündür. Hazırda ölkəmizə yüksək texnologiyaların həm “Əsrin müqaviləsi”nin iştirakçısı olan şirkətlər, həm də Azərbaycan Dövlət Neft Şirkəti vasitəsilə gətirildiyini xatırladan Y. İmamverdiyev SOCAR-ın bəzi neft yataqlarında ağıllı neft-mədən konsepsiyasının həyata keçirilməsini təqdirəlayiq addım hesab edir. Onun fikrincə, real proseslərin rəqəmsal platformada onlayn rejimdə əks olunması insan faktorunu minumuma endirməklə risklərin azalmasına gətirib çıxarır.
İlham ŞABAN,
Neft Araşdırmaları Mərkəzinin rəhbəri
Hazırda köhnə neft yataqlarına kapital qoymaqdansa yenilərini axtarmaq daha məqbuldur. Amma Azərbaycanın yerli istehsalçı şirkəti GL-in rəhbəri Asif Zeynalovun fikrincə, karbohidrogen yatağı özü canlı orqanizm kimidir. Hər insanın sağlamlığının bərpası tibbi nöqteyi-nəzərdən individual xarakter daşıdığı kimi, yataqların neftverimliyinin artırılması da onun xüsusiyyəti və geoloji xarakterinə bağlıdır.
Ona görə də yeni yataq axtarışı və ya köhnəsinə kapital yatırımı sırf yerin təkində müəyyən limitlənmiş hissədə baş verənlərlə əlaqəlidir. A.Zeynalov buna misal kimi “Salyan Oil” əməliyyat şirkətindəki yataqlarda davamlı olaraq 21 illik hasilat azalmasının GL-in quyuların mənimsənilməsinə tətbiq etdiyi innovativ həllər hesabına artım nümayiş etdirdiyini diqqətə çatdırıb.
Yeri gəlmişkən, bir məqamı da diqqətə çatdırım ki, innovasiya işçilər arasında qorxu, hürkü yaradan amil kimi də özünü göstərir. Çünki onun əsasında yenilik var və bir çoxları hesab edirlər ki, yeniliyin tətbiqi ilə iş yerlərini itirə bilərlər. “Neft-qaz sənayesində avtomatlaşdırma və rəqəmsallaşdırma” mövzusunda moderatorluq etdiyim paneldə SOCAR-ın baş geoloqu Arzu Cavadova bu məsələyə toxunaraq bildirdi ki, rəqəmsal texnologiyalar, ilk növbədə, əmək məhsuldarlığının artırılmasına hesablanıb. O isə insan kapitalına bağlı məfhumdur. Yəni xəsarətsiz iş şəraiti, minimum boşdayanmalar və nəticədə gəlirlik artır. Hətta bu halda iş yerini kimsə itirsə belə, gəlirlərin artması hesabına məşğulluq imkanları genişlənir.
Vaqif BAYRAMOV, “Xalq qəzeti”