Cari ilin ikinci rübündən etibarən ölkəmizdə “Avro-5” standartına uyğun dizel yanacağının istehsalına başlanılıb. Yeni növ yanacağın istehsalına Heydər Əliyev adına Neft Emalı Zavodunda (NEZ) həyata keçirilən yenidənqurma və modernləşdirmə layihəsi çərçivəsində görülən işlərdən sonra nail olunub.
Bu barədə ilkin məlumat SOCAR-ın Bakı Enerji Həftəsi çərçivəsində keçirilən Xəzər neft-qaz sərgisindəki stendində əksini tapıb.
Məlumata görə, 1953-cü ildə fəaliyyətə başlayan zavodda indiyədək 364 milyon ton neft emal edilib. Hazırda müəssisədə 30 adda məhsul istehsal edilir. Ümumi istehsalın isə 10 faizi ixraca yönəldilir.
Qeyd edək ki, Heydər Əliyev adına Bakı Neft Emalı Zavodu ölkəmizin neft məhsullarına olan tələbatını tam ödəyir. Hazırda NEZ-də yenidənqurma və modernləşdirmə işləri davam etdirilir.